بداية تحياتي للجميع وكل عام وانتم بخير بمناسبة عيد الاضحي المبارك
انهارده 2 في الشهر الجديد وكلنا منتظرين لوحة شرف شهر نوفمبر
مين هو احسن مراقب
مين احسن مشرف
مين احسن عضو
مفيش احسن ومفيش مميز
ومفيش اوسمه


مع احترامي لكل المنتديات ولكل الادارات
منتدانا مفيهوش الاتي

• اعمل مية موضوع واحصل علي الاشراف
  
• اعمل الف مساهمه واحصل علي لقب امير المنتدي
  
• اعملي الف مشاركة ونخلييكي زهرة المنتدي
  
• المشرف لازم يتواجد يوميا في المنتدي مش اقل من خمس ساعات
  
• والمراقب خمستاشر....هههههههههههه
  
• العضو اللي مايدخلش لمدة اسبوع ...عزيزي العضو عضويتك تم ايقافها بسبب عدم استخدامك لها
  

مش هتلاقي برضو الاتي

• مجرد انك تفتح صفحة يفتحلك 3 صفحات اعلانات جمبها
  
• وعلي دا الحال طول ماتفتح موضوع او تكتب رد
  
• اعلانات في كل جنب من المنتدي
  
• اشي احمر في اصفر واشي بيلمع
  

وكمان عندنا مش هتشوف الاتي

• عفوا يتوجب عليك التسجيل لرؤية بقية الموضوع
  
• عفوا الروابط غير متاحه الا للاعضاء المسجلين والمفعلين
  
• عفوا المحتوي مخفي ضع ردا لتشاهد الروابط
  

عفوا لسنا مثل الباقين
مبندعيش ان منتدانا احسن منتدي
ولا ان ادارته واعضاؤه ملايكه
في منتديات كتير محترمه ومميزة عننا بمراحل

وعشان محدش يفهمني غلط
كل اللي انا ذكرته سواء كانت وسائل لتحفيز الاعضاء للنشاط في المنتدي
او وسائل للكسب المادي من الاعلانات وغيرها
او وسائل لجذب الزوار عن طريق اخفاء الروابط
كلها وسائل مشروعه لا فيها حاجة عيب ولا حرام

لكن من وجهة نظري المتواضعه مافيهاش احترام للعضو او الزائر اللي داخل الموقع
الموقع بيقدم محتوي معين والله عجبك المكان وحبيت تسجل فاهلا بيك وسطنا ويسعدنا وجودك
قرات موضوع وعجبك وحبيت تشكر صاحبه ليك مطلق الحرية
شايف انه مايستاهلش يترد عليه فبرضو انت حر
المسالة عمرها ماتقاست بعندك كام مساهمه ولا رتبتك ايه في المنتدي
المهم احترامك للناس واحترام الناس ليك
ومهم كمان انت مين ... انت مين من خلال مواضيعك مساهماتك وتعليقاتك وردود افعالك
وفكرك واسلوبك في التعامل كل ده مهم اوي

اسف طولت عليكم اوي بس موضوع كان لابد منه
بعد ماحصل ان ......

• ناس زعلت بعد اعلان لوحة الشرف وشايفه انها الاحق
  
• ناس قالت ان الموضوع كله مجاملات مش اكتر
  
• ناس قالت هنترك المنتدي وناس تركته بالفعل
  

كل ده بسبب لوحة الشرف
اللي من وجهة نظري مهياش دايما بتبقا مقياس حقيقي
ومش دايما بيبقي الاختيار صح
احنا مش مؤسسة حكومية ومعينين لجنة جوده بتراقب العمل طول الشهر وبتقيم في الاخر
الموضوع كله بيبقا مجرد وجهة نظر وجايز بنسبة كيبرة جدا تكون غلط

المنتدي منتداكم انا واحد زيي زيكم
الفرق بيننا اني فكرت في يوم من الايام اني اعمل موقع ومنتدي لابوتريكه
والحمد لله وفقني ونفذت الفكرة
وخلاص دلوقتي كلنا اعضاء في مكان واحد
مفيش حد احسن من حد
"لا فضل لعربي علي اعجمي الا بالتقوي"

بالنسبة للوحة الشرف
أفضل مراقب وافضل مشرف وافضل عضو

• هو كل واحد عمل حاجة عشان يحسن من صورة الموقع ويخليه احسن
  
• هو كل واحد قدم معلومة مفيدة لاخوانه في الموقع وافادهم بحاجة
  
• هو كل واحد بيتعامل باسلوب راقي ومحترم عشان يبقي صورة مشرفة لنفسة وللموقع باعتباره احد اعضاء الموقع ده
  

اعذروني علي الموضوع اللي ممكن
الكتير منكم يعتبره مالهوش لازمة او كلام فاضي
بس كنت حابب اوضحكلم حاجة بسيطة من خلاله اتمني انها تكون وصلت


وكل يييير وانتو بخيييير بمناسبة العيد الكبييير

هو ده احمد تريكة اللى انا اعرفه
عاقل ورزين ومقنع كمان
والله يا بنى انت بتتكلم صح قوى قوى اخر حاجة
حلوة اخر حاجة دى ؟ ههههههههههههههههه
وحشتنى يا ابو حميد وبرافو على التوبيك او بمعنى اصح الفكرة اللى بتطرحها فيه
ربنا يوفقنا جميعا ويعلى منتدانا الرائع ده كمان وكمان
وكل عام وانت بخيير يا امييير

فعلا يا احمد فى ناس كتير بتزعل من الموضوع دا
واللى انت عملتة صح
واحنا عندنا فى المنتدى كل الاعضاء والمشرفين والمراقبين مميزين
من غير اوسمة
وتسلم يا كيبر على الاقتراح الهاااااايل دا
والى الاماااام دائما

كل سنة وانتو طيبيــــــــــــــــــــــــــــــــن ياتريكاوية
مااظنش يااحمد انى عندى اضافة بعد اللى اتقال
ربنا يحميك

بجد مفيش احسن من كده
بس انا عاوز اعرف مين الي اقترح عليك الاقتراح ده

هههههههههههههههههههههههه

طب بنسبه للمشرفين

امته هيكونو مرقبين

هههههههههههههههههه


تسلم ياغالي
والله عندك حق في كل الي قلته

ويارب المنتدي يكبر بينا وبيك والاعضاء المميزون دول



<li>
</li>

ده فعلا الراي الصواب

مشكور علي الموضوع جدا

أحييك ياسيادة الادمن على القرار السليم ده

لان اى عضو يعمل حاجه فى المنتدى
مش مستنى رد فعل
لانه بيعمل ده لحبه للمنتدى
مش عشان يبقى مميز ولا ياخد وسام

وكل يييير وانتو بخيييير بمناسبة العيد الكبييير
حلوه كل يير والكبير
مش ده سجع برضو على مااذكر يعنى

وكل سنه وانت طيب يااحمد
وربنا يكرمك ويوفقك

دايما متميز والله

وكل يوم بتعمل منك حاجه جديده والله

ربنا يوفقك يااااااااااااااااااارب

شكرا يا جماعه ليكم كلكم علي تعليقاتكم الجميلة
والظريفة كمان من البعض
بحبكم كلكم والله بجد وربنا يديم الود والمحبه بيننا
بس انا حابب اوضح نقطة صغيرة
انا ماقلتش الكلام دا عشان الغي فكرة الاوسمة
التكريم ده شئ موجود في كل مكان ويعتبر نوع من التقدير لمجهود الاخرين
ومش انا اللي هاجي واقول انه غلط
لا طبعا
احنا زي ماحنا وهيبقي فيه مسابقات واوسمة وفيه مميزين
لكن لازم نكون فاهمين الغرض والمقصود منها كويس

وختاما لوحة شرف شهر نوفمبر

المراقب المميز
محمد زيزو


المشرف المميز
حوده سيد


العضو المميز


دعاء التريكاويه
وهبه بيبو