المصـري هـوّ اللـي



لو عمل حاجة حلوة يبعت لجاره طبق يدوقه

وهو اللي لو لقى الدنيا بتشتّي يجري يخبّط عليك يقولك لمّ الغسيل

وهو اللي لو شم عندك حاجة بتتحرق يجري يطمن عليك لا تكون اتخنقت

وهو اللي لو سمع صوت زعيق وخناق عندك يجي يصلح

وهو اللي لو لقى خناقة في الشارع يقف يحوش مش بس يتفرّج‎

وهو اللي لو لقى حد بيغرق يجري ينط في الميه حتى لو هيغرق معاه

وهو اللي لو اتفرط منك كيس الجوافة في الشارع يقف يلمّ معاك

**********

المصري هو اللي لو حس انك مزنوق يعملك جمعية مخصوص و يقبّضك الأول

و هو اللي يقف معاك في الأحزان و الأفراح زي مايكون من بقية اهلك

و هو اللي يلمّلك من الركاب فلوس لو مرتبك اتسرق منك في الأتوبيس رغم انه مايعرفكش

و هو اللي لو لقاك في مواصلة و كان عارفك يحلف ميت يمين ليدفعلك الأجرة حتى لو مافيش في جيبه غير نص جنيه

**********

المصري هو اللي يقعد معاك ع الفطار في رمضان

المصري اللي يشتري بالونات لولادك في العيد

المصري اللي يقف جنبك وانت بتدبح الاضحية

المصري اللي يباركلك لما ابنك يجيب مجموع ويساعدك يجيبله شغلانة

المصري اللي ييجي يقولك تجيب كشاكيل و أقلام بالجملة عشان توفر المصاريف

**********


طيبة المصري مش ممكن تلاقي زيّها فى اي بلد تانية


وصلني ع الميل

كلام بسيط اوي بس فيه معاني كتير حلوة
للاسف قلت دلوقتي اوي عن زمان
بس برضو حلوة
وعلي فكرة الطيبة موجوده في كل البلاد وفي كل الشعوب
بس المصريين زيادة حبه

فعلا والله
بس اظن ان العرب كلهم كدة
دى عادات عربية ربنا مايحرمنا منها
شكرا يااحمد
تسلم ايدك
وملاحظة كدة نشاطك فى المنتدى عملت اية فى الامتحانات ياترى؟؟؟
بمناسبة الكلام عن المصريين بردو
ههههههههههههههههههههههههه

تسلم ايدك يا احمد والله توبيك
روعة
وصدقنى عنيا دمعت من كتر الاحساس
بالكلام
يا رب ديم علينا نعمة الاحساس بالناس
والمحبة اللى بتجمعنا مهما حصل
ومهما عدت الايام

وهو اللي لو اتفرط منك كيس الجوافة في الشارع يقف يلمّ معاك

يا أحمد هما بيعملوا كدة عشان ياخدولهم جوافاية من الكيس
ههههههههههههههههههههههه
أنا بهرج بس و الله
بس و الله كل كلمة معاك حق فيها
و عاوزة أضيف..إنه لما بيشوفك رايح الإمتحانات الصبح
بيدعيلك ربنا ينجحك..من غير ما يعرفك أساسا
(و الله حصلت معايا كتييييييييييييييييييييير)

فعلا أنا بموت فى الشعب المصرى و الله
رغم بردو إن ليه شوية فلتات (زى الشتيمة و طولة اللسان )
و أظن إنت بتسمع دة كتير فى الشارع
بس بردو مميزاته أكتر
و دى حاجة ضمن مليووووووون حاجة كويسة
تسلم إيديك يا بو حميد على الtopicالرائع دة
و أنا بقول نديه للآنسة المهذبة نانسى عقرب تغنيها
هههههههههههههههههههههههه

نورتي التوبيك يا ايات وبالنسبة للنشاط دا بس كان حبة بعيد عن الامتحانات
رجعنالها تاني انما لوقتي خلاص خلصنا الحمد لله

@
شكرا برنسيس ع المرور الملكي ده
وبلاش التشاؤم ده
الحلوين كتير
والدنيا بيخير
نورتي يا قمر

@
شكرا يامجدي باشا ع المرور الغالي
وربنا يسمع منك ويديم علينا نعمه الاحساس

@
بيبو شتيمه ايه بس ده وقته
مش شايفة النور الهادي والناس اللي بتدمع والمزيكا الهادية
هههههههههههههههههههه
نورتي يا بيبو

تسلم ايدك يا غالى

تمام

فين المصرى اللى لسه بيعمل كدا بس
ده الناس ماشيه مش طايقه نفسها اساسا
ده كان ايام زمان
سمعنا عنها لكن ماعشنهاش
وربنا يهدى
ميرسى يااحمد ع التوبيك

تسلموا لمروركم جميعا
وتسلمي كتير سارة والله انتي اللي زي العسل
شوفتوا يامصريين
عمالين تقطعوا في شعب بلدكم وسارة نصفتهم
انا شخصيا مصدق سارة ومش مصدقكم

كلامك مية مية يا سارة

موضوع جميل جدا
شكرا ليك يابو حميد

ثانكس ياكيمو .. نورت التوبيك ياريس