جريدة باب دورة المياه






مش عارف حاطين ايديكم على مراخيركم ليه؟؟؟



مع إننا لسه مدخلناش فى دورة الميه



قصدي فى الموضوع



بداية أحب ان انوه أن المقصود هنا هى أبواب دورات المياه العامة يعنى

المراحيض العمومية

-.اففف الله يقرفك

- ماشى ياسيدى ....ماعلينا


وليس المقصود أبواب دورات المياه الفايف ستارز اللي فيها اير فريشينر وليكويد سوب وتواليت بيبر واير دراير لزوم تنشيف الايدين

انما اقصد ابواب دورات الميه الغلبانة التى يرتادها معظم حرافيش الشعب المصرى

اذا كنت على سفر ورجليك خدتك لغاية دورة مياه مسجد الفتح برمسيس او دورة مياه بولاق الدكرور
وسعادتك وقفت فى الطابور لغاية مجه دورك ودخلت



تعالى بقى نتصفح باب دورة الميه ......او بمعنى اصح جريدة باب دورة المياة.... دى مجانية واميز مافيها انها مفيش عليها رقابة

وبتحتوى على كتابات تمثل كل الاتجاهات .... يسارى ماشى ... يمينى ماشى..... صعيدى ماشى ... وبعدين دى شاملة كافة المواضيع من سياسة الى اقتصاد الى رياضة.....

ويشرف على تحريرها واصدارها بشكل يومى جموع الشعب المزنوق ...تعالى نتصفح

موضوعات الجريدة

- الأهلى عمهم وحابس دمهم

- للذكرى الهباب وايام العذاب والزحف على التراب – جندى سويلم البهنساوى – مركز تدريب المعادى

- كله يهون الا اللاهون – جندى مجند حمدى ابراهيم – مركز تدريب اللاهون

- ازازة الزيت بقت ب7 جنيه .... ماشى يا ظلمه

- مجانية تعليم ايه يا ولاد الــ ......

- كل ظالم وله نهاية

- خد عبرة من السادات

- الجمعية فيها لحمة ....ياولاد الكذابة

- امريكا بنت .......!

- يا ولاد الــ...... نهبتوا البلد

- نحن نوفر لك الوظائف بمختلف التخصصات وبمرتبات مغرية... فقط....شدالسيفون

وهكذا سادتى وسيداتى الأفاضل كما ترون فأبواب دورات المياه ليست مجرد حاجزا يستر من يجلس خلفه ... ولكنها متنفسا تستطيع من خلاله جموع الشعب المطحونة ان تعبر عن بعض ما يجيش بصدورها دون خوف من ان يكون هناك مخبر واقف لك ورا الباب.



....بكل بساطة هذا الشعب ...وبكل مايتعرض له من ظلم وطحن وسحق الا انه يرفض ان يصمت ....سيتكلم حتى ولو من وراء باب دورة الميه ..
وتستمر الكتابة...وتستمر القراءة