ايوة حملة

ناس كتير اوي مشتركين فيها ...انا ساعتها حسيت انها اكبر حملة في التاريخ على شخص واحد ... الشخص ده هو ..... تريكاوي !

بدأت اتبين ملامح الحملة دي لما دخلت بيتنا امبارح وفوجئت بإن السجادة
مبلولة جامد اوي ولما فضلت اتتبع مصدر البلل فوجئت بطبيعة هذا البلل
...كانت اللعاب اللي نازل من فم اخويا كافيا جدا علشان يغرق السجادة
والعمارة كلها ...وده طبعا لأنه كان بيتفرج على فيديو كليب من اياهم


نزلت من البيت على امل اني اقعد على كافيتريا علشان اهدي اعصابي فوجئت بإن
الكافتريا تعرض فيديو كليبات ..الله يخربيتكم ...على طول على كافتريا
تانية ..فيديو كليبات ...كافتريا تالتة ...فيديو كليبات .

ناديت على الجرسون اللي كان راجل عنده بتاع ستين سنة ...

خد يا حاج ...ايه اللي مشغلينه ده ؟؟

ده عمرو دياب

ما انا عارف انه بتاع اللي بتقول عليه ...مش عيب عندكم عائلات محترمة بتدخل هنا وتقوم مشغلين بنات بترقص كده ..

وفيها ايه يعني ما هو كله بيبص وكله بيغسل عينيه ..

ما هو اساسا مش كل زباينكم اللي بيقعدوا معمسين.ولا انتم شكلك متعودين أن زباينكم ما بيغسلوش وشهم .

مشيت وانا مخنوق على آخري ..
لقيت " حمادة انتيخانة " صاحبي الشاعر القدير
ازيك يا حمادةعامل ايه سلامات يا راجل –
الله يسلمك يا تريكاوي شكلك مخنوق ومضايق كده فرفش يا راجل –
آه والله يا حمادة انا مخنوق خنقة سودة –
خلاص يا باشا انا اروقك انا حتى مألف شعر قوي لمطرب عزيز حيعمله كليب لكن محترم اوي حاسمعك حتة منه –
قول يا انتيخانة يا شاعرنا الملفظ لافض الله فوك –
اسمع يا تريكاوي ...
ماشي و في حبيبي بتأمل
حاجة خلتني اتمخول
قملة ماشية في شعر حبيبي تتدهول
اخيه عليك يا حبيبي يا مقمل
ليه تزعلني يا حبيبي وتخليني محتار
خلتني احس بأني صرصار
نازل عليه الشبشب وحيحصله انفجار .
تحت الشبشب ويتفعص ويحصله انشطار
ماشي في حبيبي وبتأمل
بس بس يا ابني ايه القرف بقى دي اغنية دي اعلان فليت؟؟

ما خلاص يا تريكاوي المهم دلوقتي ما بقاش الكلمات المهم دلوقتي الهزات
يعني ما دام فيه رقص يبقى الأغنية حتمشي ...السر في الفيبراشين يعني .

طيب انا حاخليك تعمل فيبريشن على انغام الشلاليط يا شاعر الحشرات انت خد طررررااااااااخ آي يا تريكاوي آي طررررررراااااااااااااخ

يا دي النيلة حتى انتيخة بقى يألف شعر فيديو كليبات الدنيا باظت ...

: فضلت ماشي في الشارع ...احمد فكك مني " وده اسمه " لقيته .في الشارع وبعد الأحضان والسلامات قالي
احمد فكك مني : مالك يا تريكاوي شكلك مخنوق تعالى يا راجل انا حشيل عنك
همك ...بص بقى زمان كانوا يقولوا الكتاب خير جليس ....دلوقتي الزمن اتغير
وبقى الأنترنت خير جليس -
تريكاوي : كلام سليم تعالى ندخل سيبر
اهو ده الكلام وتفتيح النوافيخ –
دخلنا السيبر وقعدنا طبعا صاحبكم تريكاوي في النت مش قد كده وشوية ونافذة تطلع لي من الجنب ... hi
ايه ده يا احمد ؟؟ -
ده احنا مرزقين يا تريكاوي –
اكتب : ...هاي كان آي بي يور فريند –
وهو ده مين –
أحنا حظنا بمب بنت امريكانية عايزة تتصاحب علينا .... امال يا ابني مش حضارة سبع تلاف سنة هما احفاد الفراعنة شوية –
ودي عايزة تتصاحب علينا ليه ..؟؟؟ ليه ؟؟؟...ليه ؟؟؟؟ فضلت اسأله وهو ما
يردش منهمك في الكلام مع الأمريكانية لمدة نص ساعة وانا زي الأطرش في
الزفة ...لغاية ما السيبر كله نط من مكانه على صوت كهزيم الرعد ....قفى
محترم نزل على " أحمد فكك مني " ...وصيحة جبارة من مناخيرو العجلاتي وهو
بيقول لأحمد فكك مني ...امريكانية مين ...ده انا يا قفل .

يا جماعة انا حاس ان الموضوع مستهدفنا كلنا ..احنا لو ما وقفناش ضد الحملة
دي احنا ممكن التيار يا خدنا ...ونضيع فعلا ممكن نضيع والتيار يجرفنا
واللي واقف النهاردة للعري والأباحية في اجهزة الأعلام ممكن التيار يجرفه
ويبقى واحد من متابعي العري والأبايحة


-- منقول مع بعض التعديلات و الاضافات --

حلو اوى التوبيك
تسلم ايدك

توبيك اكتر من رااائع
ومعك حق يا احمد
وربنا يهدي شبابانا وبناتنا

كالعاده توبيك رائع
تسلم ايدك
ياريت لو نفكر مع بعض فى حل واى حد يلاقى حل يقوله ونفذه مع بعض
انا عن نفسى هابدء بالتفكير



وعلى فكرة تسلم ايدك مرة كمان بخصوص الاعلانات
الحمد لله
انا من يوميها بصراحه ماشوفتهوش

موضوع فعلا جميل يااحمد
ومهم جدا
اصل كلو بيوصل لكلو
المناظر فى الشارع للفيديو كليب للدردشة عالنت للمواقع الاباحية لقلة البركة لضياع الكرامة


الحصيلة فى النهاية جيل مايعلم بية الا ربنا الا من رحم ربى طبعا
ربنا يثبتنا ويهدى كل الشباب يارب

تسلم ايدك يااحمد