السلام عليكم يا شباب .. كيفكم جميعا .. لعلكم بخير

ليه بنقفش من بعض ؟

ممكن حد فيكم يقول
الله !! طب ليه ماقلتش نزعل تبقي اشيك
في الحقيقة انا قاصد استخدم لفظ نقفش ده لانه فيه فرق كبير بينه وبين الزعل

الاول نقول ايه هو القفش ده .. القفش ده بيحصل للمواتير في العربيات وفـ اي ماكينة ما لما تقف مرة واحدة كده نقول الموتور قفش
وهنا بيبقي اللي حصل خلل او عطل فني مفاجئ ادي الي توقفها وحصول ما نسميه بالـ "قفش" .. ههههههههه

معلش استحملوني شوية

هو ده بقي بالظبط اللي بيحصل معانا خلل واضطراب بسبب سوء تقدير لموقف معين وعدم السماح لانفسنا اننا نفكر ولو شوية جايز الموقف مايتساهلش اننا "نقفش" وانا بصراحة كلامي عن معاملاتنا وتصرفاتنا عامة
ولكن باقصد بيه علي وجه الخصوص معاملاتنا وكلامنا علي النت سواء تشات او علي المنتديات .

لازم نحط في اعتبارنا ان احنا بنقرأ كلام جايز اوي االلي بيكتب الكلام يكون بارع في توصيل الفكرة والاحساس والمعني اللي هو يقصده بالفعل وجايز اوي يخونه التعبير وجايز اوي انت تفهم غلط الغرض

يعني فيه احتمالات كتير نقدر نوصل منها لهدفنا وهو افتراض حسن النية ونسمح لنفسنا بالتفكير ولو للحظات قبل مانحط ادينا علي الكيبورد ونبدأ شن الهجوم ودق طبول الحرب واعلانها معركة لابد ان تنتهي بخسارة احد الطرفين وانتصار الاخر

للاسف ..ماحدش بقي يسمع للتاني .. ماحدش بيدي فرصة لحد يقول وجهة نظره
كل واحد بقي شايف في نفسه المحقق كونان ولا المفتش كرومبو ويجيب كلمة م الشرق علي كلمة م الغرب ويربط مابينهم بطريقة عجيبة ويقول
اه .. صح .. مالهاش تفسير غير كده
ياعم هو انت دخلت في قلبه وعرفت هو يقصد ايه

وكمان ماحدش بقي يواجه .. خصوصا يعني المشاكل اللي بتحصل بسبب النت
تلاقي صاحبنا قام جري راح كاتب توبيك في منتدي في قسم عام ويكتب كلام مبهم ماحدش فاهم منه حاجة غير تلميحات لان الشخص الفلاتي دا اسوأ انسان علي وجه الارض .. وياللي ماشوفتش تعالي شوف
انا ليا تساؤل بس .. هل ده تصرف سليم او له اي فائدة او ممكن نوصل من خلاله لحل
ليه ماتكونش اول خطوةتعملها انك تتكلم مع الطرف التاني في المشكلة وتتناقشوا مع بعض بشكل متحضر وحتي لو ماكانش عندك الجرأة للنقاش
يبقي مالكش الحق انك تعمل شوشرة وتدخل وسطاء في موضوع انت ممكن تكون المذنب فيه اساسا

ياريت ندي لنفسنا فرصة للتفكير ومانتخذش قرارات في لحظة غضب ونرجع نلوم غيرنا عليها
والمشكلة انه بعد مرحلة المعركة دي

صدقوني الخاسر بيبقي الطرفين
خسروا بعض بدون اي داعي او سبب مقنع وعملية رجوع المياه الي مجاريها بتبقي صعبه .. وصعوبتها بتتمثل في الحساسية اللي اتكونت نتيجة الكلام ده كله
وكل واحد قعد يجيب ويودي بينه وبين نفسه ويحسبها ويجمعها ويطرحها
والناتج في النهاية .. صفر

معلش وجعت دماغكم وطولت عليكم .. وخلاصة كلامي
ياريت نبطل نقفش .. ياريت نحسن الظن ببعض
قال سبحانه وتعالي
" إن بعض الظن إثم "


ولو حد فيكم شايف ان في اجابات تانية للسؤال ده
ليه بنقفش من بعض ؟
يتفضل يقوللنا

كلام جميل وكلام يستحق كل التقدير
بس كالعاده فى نقطه صغيره عاوز اوضحها ليك ولكل الناس
تلاقي صاحبنا قام جري راح كاتب توبيك في منتدي في قسم عام ويكتب كلام مبهم ماحدش فاهم منه حاجة غير تلميحات لان الشخص الفلاتي دا اسوأ انسان علي وجه الارض .. وياللي ماشوفتش
......
ممكن انا ااقولك ليه صاحبنا بيعمل كده
لان زى ما انت بتقول (القفش) دا بيجى عن طريق النت او خاصه عن طريق الشات او المنتدى خاصه يعنى
فلازم الرد يكون من مثل العمل نمثل قصه صغيره ابطالها
ظالم عن طريق النت ونسميه (الصديق)
مظلوم عن طريق النت نسميه (الوافى)
فالوفى بيحس ان الصديق حرجه على العام ادام الناس فاول حاجه بيفكر فيها انه يرد كرامته واعتباره
ادام الناس على العام زى ما الصديق عمل معاه
لكن المشكله ان الصديق عاوز يبين للناس ان هو الملاك اللى مش بيغلط ولو غلط لو يعنى غلط
بتبقى غلط بيضه مسموح عنها وعادى مش مشكله
لو جمعت الكلمتين بتوع ابطال الحلقه على بعض
هتلاقى معانها
(الصديق الوافى)
..
النقطه التانيه بمناسبه التوبيك والقفش
انا عن نفسى عمر ما قفش من واحد ومعرفش حاجه اسمها زعل من اى صديق سؤاء اعرفه او معرفوش
وظن ان اللى عامل التوبيك دا عارف كويس مين هو ؟...........؟ وهو ايه بالنسبه للناس ولاصدقائه عموما
ختاما احب ااقول كلمتين
(الصديق الحقيقي : هو الذي يرفع شأنك بين الناس و تفتخر بصداقته و لا تخجل من مصاحبته )
مش تقلل منه ادام الناس بمجرد انك انت تعلى انت ادام الناس
بجد التوبيك كبير والكلام اكتر واانا بتعب على طول من الكلام وقلبى بيوجعنى
تحياتى ليك يا مدين بالتوفيق فى حياتك
ودعواتك معانا
وربنا يهدينى ويهديك ويهدينا جميعا
...........

شكرا ليكي اوي يا عاشقة طيبة علي تعليقك وياريت فعلا كلنا يبقي عندنا ثقافة الاعتذار وباحييكي علي كلامك جدا

تمام يا شعار وانا كمان باحييك علي تعليقك الاروع
واتمني في النهاية ان الهدف من الموضوع يكون وصل للجميع
وهو اننا لازم نبقي اعقل من ان سوء تفاهم يخلينا نندفع ونرتكب حماقات
مش في مصلحتنا وبتقلل من شأننا جدااااا

بخصوص الاخ الوافي (الزائر)
فواضح ان حضرتك ماقدرتش تستوعب الموضوع بيناقش ايه بالظبط وتطرقت لحاجات تانية خالص للاسف غير مفهومة

شكرا لزيارتك .. نورتنا

في الحقيقة يا بوحميد انا كتبت الموضوع ده مخصوص بسبب الكلام اللي انت تقصدة
وباتمني من ربنا ان هدفي يوصل للناس
وان شاء الله خير

ميرسي ليكي يا ضحي

تمام يامحمد انت برضو فتحت نقطة تانية غاية في الاهمية
اختلاف الاراء المفروض والمتعارف عليه انه حاجة منطقية جدا لان كل بني ادم له طريقة تفكير وله وجهة نظره التي لابد وحتما ان تختلف مع البعض
حتي لو اتفقت مع كتير من الناس اكيد اكيد هتختلف مع ناس تانية

وفعلا زي ماانت قلت ياريت نسمع لبعض
اتفقنا يبقي ده شئ جميل
اختلفنا يبقي برضو مفيش مشكلة هنفضل حبايب بس انا رايي مش من رايك في النقطة دي
مع العلم انه ممكن جدا نتفق انا وانت في موضوع اخر ووجهة نظر اخري عن قضية اخري

ياجماعه والله مش عارف اوصلهالكم ازاي
بس مستحيل مستحيل ان الناس كلها تجمع علي راي واحد


كمان انا متفق تماما وباكد علي انه مش من الادب ولا من الذوق ان لما حد يختلف معايا في وجهة نظر
ينقدني او يوجه ليا كلام مش محترم او يحاول يسخر مني او يوبخني او اوا او او ....
لازم يبقي في احترام بينا وبين بعض ولازم نتقبل اراء بعض ونحترمها كمان مش نتقبلها بس

اتمني الموضوع يفيد الكل
وكل واحد يقول وجهة نظره
وياريت الكل يعمل زي محمد ويقوللنا ايه تاني ممكن يكون سبب للخلافات بين الاصدقاء
عشان نتناقش ونحاول نلاقي حلول مع بعض

تمام
ماهو دا اللي انا قصدته لما قلت المواجهه
وان الواحد مننا يسمع التاني زي ماهو عاوز التاني يسمعه