إخوانى وأخواتى التريكاوية
هل يسعدكم أو يفرحكم إنى أترك المنتدى
هل مش هاتزعلوا على فراقى
هل مش هاتحسوا إنكم إفتقدتونى
هل أنا مافرقش معاكم سواء موجود أو مش موجود



هل حد فيكم حاسس إنه عايزنى أمشى
حد فيكم نفسه إنى أبعد عن المنتدى
حد فيكم عايز يقولى إمشى من المنتدى
إنت مش قد المقام



سلمى زميلتنا فى المنتدى قالتهالى
تخيلوا إن ده حصل
ما تستغربوش
ولا تزعلوا من سلمى
لأنها قالتهالى بطريقة مش مباشرة
طبعا عايزين تعرفوا إزاى قالتهالى بشكل غير مباشر
قالتها لما بعتت لياسمين وقالتلها إكتبى توبيك الوداع بتاعى
وقولى للأعضاء اللى فى المنتدى
إنى مش هادخل المنتدى إلا لما ابقى فى كلية وليا قيمتى
مش مجرد واحدة فى صنايع
طيب واللى مش معاه غير ثانوية عامة وماكملش ولا شاف كليات ولا يحزنون
يقعد فى المنتدى يعمل إيه لازم يمشى طبعا
ومش بس يا سلمى انتى كده بتقوليهالى أنا لا
إنتى كده حكمتى كمان على كل اللى فى المنتدى
مش جامعيين إنهم يمشوا وما يرجعوش إلا لما يبقوا فى كليات
يبقى كل الأعضاء اللى فى إعدادى مثلا يمشوا بقى
وما يرجعوش إلا بعد كام سنة علشان يبقوا فى كلية وليهم قيمتهم
تفكيرك غريب يا سلمى والله بجد
صدقينى أنا ما حستش من حد هنا فى المنتدى انه بيعاملنى وحش
ولا بيعاملنى أقل من أى حد تانى من الأعضاء سواء فى الإحترام أو فى الحب
والكلام ده من أيام ما كنت عضو مش دلوقتى وأنا مراقب أو قبل كده وأنا مشرف بس
وجهة نظرك مش فى محلها وعذرك لترك المنتدى مش مقبول
وتركك للمنتدى بجد هايخلينى أزعل منك وهاحس إنك بجد بتقوليلى
إنت المفروض تسيب المنتدى يا مجدى
أرجو تراجعى نفسك وموضوع الكلام اللى حصل فى الدردشة
طبعا انا ماكنتش حاضره بس عموما
ده مش المفروض يأثر عليكى خالص
والشخص اللى ضايقك ده أكيد تفكيره محدود جدا
ويا ريت يراجع أسلوب تفكيره وتقييمه للناس
ويا ريت كمان يفتكر إن النبي صلى الله عليه وسلم
كان أمى ما دخلش كلية ولا حتى مدرسة صنايع
ومع ذلك كان خير البشر أجمعين
أرجو تراجعى نفسك فى القرار الغريب ده
والمنتدى مفتوح حتى للأميين طالما قلوبهم بيضا
ونفوسهم صافية وبيحبو الخير للكل
وعلى فكرة يا سلمى والكلام موجه للورا هى كمان
تعويض حب وصداقة العدد ده من الناس المحترمة
شئ صعب جدا جدا جدا
وختاما أنا آسف لو كان كلامى ضايقك
وياريت تكبرى دماغك شوية وتنسى الفكرة العبيطة دى
ويا ريت كمان تفتكرى إحنا بنعزك وبنحترمك قد إيه
وإلا نبقى إحنا مش فارقين معاكى بقى
سلام

أخوكى مجدى
حاصل على ثانوية عامة فقط

طبعا كل اللى انتى بتقوليه
مظبوط يا الآء وأنا معاكى فيه
وشكرا على كلامك الحلو

ايه يا ناس الكلام ده
معقول
هو لسه فى عقلية بالتفكير ده
حراااااااااااام عليكم
فوقوا بقى
العالم بيتطور من حوالينا واحنا لسه "بنعاير " بعض
ايوة بنعاير
لما يوصل الموضوع للحد ده يبقى فاضل ايه غير اننا نهين بعض
الكل هنا اخوات
ولا وبنات
متعلمين ومش متعلمين
كبار وصغيرين

كلنا
تريكاااااااااااوية

الله يخربيت الافكار السودة دى

دى كلها وسوسة عمونا شوشو والله

يا سلمى انا مش عارف اقولك ايه تانى ده انتى بونبوناية المنتدى

ايه يا جماعة والنبى بلاش الجو ده

والله ربنا شاهد انا بعزكم اد ايه

اوعى حد يهز ثقتك ف نفسك ابدا

وكمان فيها ايها مجدى اهو شاعر المنتدى

ومش معاه غير ثانوية فيها ايه يعنى

واهو شاعر كبير وفنان

ربنا يا جماعة يخليكم لينا وميحرمناش منكم ابدا

كله من شوشو والله استعيذوا بالله منه يا جماعة

ومحدش تقيل ع بيته لتانى مرة

بجد يا مجدي انت انسان طيب اوي
واحنا كلنا بنعزك وبنعتبرك اخونا الكبير
وانت انسان ما شاء الله عليك ذكي وعندك مواهب كتير
وبجد اذا مشيت هنفتقد اخ عزيز علينا وهنفتقد قلم مهم جدا
ده انت شاعر المنتدى الاول والاخير وماتزعلش من سلمى يمكن تكون متنرفزة
شوية او عندها مشكلة او متعصبة فخلتها تقول كده
واحنا عايزينك تراجع نفسك وياريت ماتاخدش القرار ده وماتنفذوش عشان كده هنزعل
واحنا عمرنا مانزعل منك

سلمى :

اتمنى بجد لو سلمى بتقرا الكلام دا دلوقتي تعرف اني بحبها جدا جدا جدا جدا جدا جدا جدا جدا جدا

ولأبعد مدى وهي عارفة كدا كويس جدا ..

وعارفة انها اخر مرة كلمتني قلقتني جدا عليها

وانا هادني قاعدة مستنيه تدخل تطمني عليها

لأني متاكدة انو مش هيرضيها ابدا تسيبني قلقانه

وازا هاقولها حاجة .. هاقولها نصيحة بين الاخوات

اللي يتكلم كلام مستفز ما ترديش عليه .. ممكن هو شايفك ناجحة فغيران ومش قادر يستحمل

فقال ازاي يطع غيرته .. انو يقولك كلام بايخ ويخليك تمشي .. ولو انتي مشيتي هيبقا هو انتصر

وانت ما ترضيهاش لنفسك ولا انا ارضهالك

بس يا سلمى : كلنا هنا بنحبك ..

وياستي انا كفاية .. ولا ايه ؟؟

وانت اكبر من انك تقفي عند السخافات دي

هاستناكي يا جميل ترجعي تنوري المكان

مجدي ..
مرسي ليك والله .. ربنا وحدة يعلم انت انسان غالي علينا قد ايه

وكنت اخ كبير لينا وقد المسؤولية ومازلت حقيقة .. ربنا يخليك لينا

ودايما تدنك كدا تتحفنا بكلامك الجميل .. بس يا مجدي علشان ما ابقاش بكدب عليك ..

انا بس الفترة دي اللي هتوجد معاكم بس بعد كدا .. انت عارف .. ومش هاقدر ارجع عن كلامي

بس والله ازا كان في حاجة عاوزة اقولها لحد فهو انت ..

شكر كتير كبير ليك على زوقك وتفكيرك الرائع

وبجد اتمنى تدنك فاكرني بالخير

................
لورا

الحقيقة انا مش قادرة اضيف كلام بعد كلام مجدى
ربنا يكملك بعقلك
بصراحة انت انسان متميز
وقدرت تعرف هدفك وتحددة
ربنا ينورلك طريقك
بالنسبة لسلمى مااظنش انها هتقدر تغيب
واظن هيا عرفت احنا بنحبها قد اييييييييييييييييييييييييييية

اولا انا مش فاهم نص القصة
معلش اصل ايام الامتحانات عملتلي كلكيعه غباوة في مخي
صعب تروح بسهولة
المهم
بغض النظر
انا مش عاوز اتكلم علي مجدي عشان الناس ماتقولش باجامل صاحبي وكده
بس حقيقي مجدي من يوم ماتعرفت عليه وقبل حتي ماعرف انه ماكملش دراسة
ماحدش يتعامل معاه الا ويكاد يجزم انه انسان مثقف جدا ويمتلك عقلية ناضجة جدا
قد يفتقدها من هم اصحاب الدراسات العليا وليس طلبة الجامعات فقط
علاوة علي الموهبة الفذه اللي يمتلكها في كتابة الشعر
ماعلينا
سلمي كذلك من الناس اللي انا اعرفهم كويس اوي بحكم انها من اقدم الاعضاء هنا في المنتدي
وحقيقي سملي شخصية رائعه
لا ينقصها غير شوية ثقة في نفسها لان الموضوع ده مش اول مرة يثار من قبل سلمي
وانا حاولت اكتر من مرة اوصللها انها مش اقل من اي حد دخل جامعه
ويمكن تفتكره كلام اونطة لما اقوللها ان معظم طلبة هندسة يتمنوا انهم يكونوا متخرجين من التعليم الصناعي لانه افيد واقيم كتير من الثانوية بالنسبة لمجال الهندسة
ماعلينا
المهم انا مش حابب ارغي كتير ولو اني رغيت كتييييير اوي هههههههههههههه

ياريت ياسلمي تسمعي الكلام بقي وتبطلي نشوفية دماغك دي بدل مانكسرهالك

وانت يامجودي بجد تحية كبيرة علي الموضوع الجميل

ربنا يصلح الاحوال ياشباب ويهدي النفوس

مش عاوزين الخلافات تزيد كل دقيقة والتانية
في الاخر كلنا اخوات ولو حد اخطأ المفروض التاني يستحمله
لما طرف يشد الحبل من جهه التاني لازم يرخي من الجهه التانية مايشدش هو كمان
عشان مانقطعش حبل الود يا جماعه

وادعولي عشان مزنوق زنقة مهببه في المادتين بتوع اليومين دول .. هههههههههههه
في رعاية الله - سلام

خلاص ياجماعه شطبنا
موجة الزعل دي راحت لحالها خلاص وكله هياخد علي دماغه بعد كده لو فكر يزعل
هههههههههههههههههههههههههههههه
الموضوع مغلق لان دكان الزعل اتقفل خلاص