هل حسن شحاتة بدأ بالتخريف تغييرات بالجملة في تشكيلة المنتخب المصري التي ستواجه رواندا

شهدت قائمة المنتخب المصري تغييرات بالجملة، والتي دخلت معسكر إعدادي لمواجهة رواندا المرتقبة في الخامس من شهر سبتمبر المقبل بالجولة الرابعة من التصفيات الإفريقية المؤهلة لمونديال جنوب إفريقيا 2010.

وشهدت القائمة عودة نجم الأهلي محمد بركات، واستبعاد لاعبي الزمالك عمرو زكي، ومحمود عبد الرازق "شيكابالا" بصورة مؤقتة لحين البت في إصابتيهما.

ومن المقرر أن يتواجد زكي وشيكابالا في معسكر المنتخب اليوم – الأربعاء – لتحديد مدى إمكانية لحاقهما بمباراة رواندا من قبل الجهاز الطبي للمنتخب.

وقرر حسن شحاتة ضم مجموعة من اللاعبين لأول مرة في تشكيلة الفراعنة أبرزهم مهاجم ليرس البلجيكي محمد "دودي" الجباس، الذي كان ضمه مفاجأة لأنه لم يعلن عنه ضمن قائمة المحترفين المستعدين للمشاركة في المعسكر.

وضم الجهاز الفني لأول مرة حارس المنصورة محمود أبو السعود، ولاعب وسط بتروجيت محمد شعبان، ومهاجم حرس الحدود أحمد سلامة، وزميله أحمد كمال.

وشهدت القائمة غياب مهاجم حرس الحدود أحمد عبد الغني، وحارس مرمى الزمالك عبد الواحد السيد.

من المعروف أن المنتخب المصري يحتل المركز الثاني بالمجموعة الثالثة برصيد أربع نقاط، وبفارق الأهداف عن منتخب زامبيا صاحب المركز الثالث، فيما يتصدر منتخب الجزائر المجموعة برصيد سبع نقاط، ويتذيلها المنتخب الرواندي وبحوزته نقطة وحيدة.

وجاءت قائمة المنتخب على النحو التالي:

في حراسة المرمى:

عصام الحضري (الإسماعيلي)، والهاني سليمان (الاتحاد السكندري)، ومحمود أبو السعود (المنصورة).

في خط الدفاع:

هاني سعيد (الزمالك)، ووائل جمعة (الأهلي)، ومحمود فتح الله (الزمالك)، وأحمد سعيد "أوكا" وأحمد كمال (حرس الحدود).

الجناح الأيمن:

أحمد فتحي (الأهلي)، وأحمد المحمدي (إنبي).

الجناح الأيسر:

سيد معوض (الأهلي)، وعبد العزيز توفيق (إنبي).

في خط الوسط:

محمد شعبان (بتروجيت)، ومحمد أبو تريكة ومحمد بركات وأحمد حسن (الأهلي)، وأحمد عيد عبد الملك (حرس الحدود)، وحسني عبد ربه (أهلي دبي)، ومحمد شوقي (ميدلسبرة الإنجليزي).

في خط الهجوم:

دودي الجباس (ليرس البلجيكي)، وأحمد سلامة (حرس الحدود)، وسيد حمدي (بتروجيت)، وأحمد رؤوف (إنبي).

يعني قولوا هل دة ينفع حسن شحاتة كلنا بنقول له دة مش وقت تجارب احنا في موقف حرج جدا ياريت الموضوع يكون

في كل منتدى ياريت تنشروه دة مش وقت تجارب خالص وقولولي لو انا غلطان ان حسن شحاتة اللي عمله دة صح

رايح يجيب حارس المنصورة عنده عبد المنصف وامير عبد الحميد وهاني سليمان غلط يا كابتن حسن غلط و100 غلط

معاك حق حسن شحاتة للاسف بيجي في الوقت الحرج وبيتفلسف
وبيعاقب زيدان مش وقت معاقبة دلواقتي ويخلية يلعب في ماتش روندا وبعدين يعاقبة
بجد حسن شحاتة بيتصرف غلط
ربنا يسترهاااااااااااااااااااا ياااااااااارب
ونكسب ويكون النصرنا لبلدنااااااا

حسن شحاتة واخد الامور بجدية هو عشان كل الناس بتحبه وعمل عمل محدش عمله يبقى يتحكم بكل شيء لالالالالا حدك مش هتقدر تعديه لازم يرجع زيدان هو زيدان عمل ايه عشان قفل التلفون طيب دفعه غرامة زيدان مخلص ولاعب العند معاه ممكن يقلب الامور

بصراحة يا جماعة انا استفزني العنوان جدا

ايه دا ؟؟؟

والله العظيم عيب علينا .. راجل زي دا يتقال عليه كدا .. تقعدوا تقطعوا فيه .. وتقولوا انه بيتفلسف .. وتبهدلوه اخر بهدله لمجرد ان اللعيبة مش بالصورة اللي عجباكم !!!!!!!!!!!!!

ايه هو دا .. دا جهاز فني كامل بيتابع كل اللعيبة ويشوف مين اللي هيفيده للمرحلة الجاية وبيختاره يعني مش بكيف كابتن حسن شحاته وبس .. وحتى ولو بكيفه وبس ... بقى بعد كل اللي عملوا ومعندكوش ثقة في اختياراته ؟؟

عاوزين ايه تاني كاس افريقيا 2006 و 2008 ومستوى رائع في كاس القارات .. وانجازات تانية كتير

وبعدين ما هو محمد زيدان ما عملش حاجة في مباراة مصر وايطاليا ... وغيره عمل .. ما اقدرش انكر انجازاته الكتير والعظيمة .. بس اللي يستكتر انه يلبس فانلة بلده مرة .. ولا كنوز الدنيا تعوض دا .. وبعدين دا مش بس ما شاركش دا قفل موبايله وبعديها بتلات ايام شارك مع فريقه !!! سلامة بطنه والله .. وعملها قبل كدا مرتين .. يعني دي 3 مرة .. وكل مرة كابتن حسن شحاته يعدي .. بس وبعدين .. اللي مش عاوز فانلة مصر ولا علم مصر .. مصر مش عاوزاه .. ربنا يوفقه في اي مكان ..

وبعدين انتو مش علقتوا المشنقه لعصام الحضري وقلتوا الاهلي ما بيقفش على حد ؟ طب دا نادي .. ما بالكم بالمنتخب ؟؟؟ منتخبنا ما بيقفش على حدا

وفي لاعيبة كتير في مصر ومحرفين تتمنى تلبس فانلة المنتخب .. وعندها الامكانيات .. يبقى هنقعد حاطين رسنا على حدبايع الفكرة دي ليه ؟؟؟

عيب والله تقولوا عليه الكلام دا .. عيب .. مش هو دا المعلم .. انا مش فاهمة انتو بس بتوصلوا لما مصر تكسب وتقعدوا تمدحوا .. والله عليكي يا مصر .. الله عليك يا .......... .. الله عليك يا معلم

بس قبل كدا .. ناخدهم تقطيع ونتمسخر عليهم !!!!! زي قبل ماتش رواندا ..كل صور كاس القارات بتاعت مباراة ايطاليا التعليق اللي عليها (( يلى علشان نروح نتغلب من رواندا )) !!!! بالذمة دا اسلوب تشجيع

الناس بتشجع النادي احسن من كدا ...

دا منتخب بلدنا يا جماعة .. معاه في الحلوة والوحشة .. انما اللي مفهمكم ان دا اسلوب اسمه نقد (( اللي كل ما اكلم حد يقولي نقد )) يبقى غلطان .. وبعدين مش على طول نقد .. انتو لسا شفتوا لعبهم حلو ولا وحش ؟؟ ومش اي حد ينقد لازم يكون خبير .. ليه ؟؟؟ علشان ينقد نقد بناء ((( بــــــــــنـــــــــــــــــــــــــــــــاء ))) يا ناس بناء .. مش نقطع في لعيبه الزمن ما عرفش يجيب زيهم ولا هيجيب زيهم .. ادب واخلاق والتزام ومهارة .. وجهاز فني حلم انه يوصل لكاس العالم

ولا انتو متصورين انها مش فارقه معاهم !!!!

ونفسي افهم بقا (( مش دا امير اللي ما ينفعش ببصلة وبيقف تتخزق شبكته - مش عبد المنصف اللي شال بال6 في ماتش واحد )) انتو شفتوا الحارس دا علشان تحكموا انه اللي قلتوهم احسن ؟؟؟؟؟

جايز اكون دخلت جامد .. بس انا لسا قارية شوية مواضيع تحرق الدم .. هبقى اجيبهالكم علشان تعذروني .. وبصراحة الموضوع ثلاث اربعة يحرق الدم !!!!!!

...................
لورا

ما اعتقدتش ان من حقك تقول غلط يا كابتن حسن
اكيد هو شايف وعارف ودارى بامور لاعيبه اكتر من اى حد تانى
وانت مش وانت قاعد مكانك كده تقطع ف الناس
وايه يعنى "حارس المنصورة" ؟؟
مش ممكن مستواه يبقى احسن من "حضرى" الاجوان ؟؟

طيب بدام هما مش مقصرين ايه سبب الخسارة امام الجزائر تمركز خاطئ تمريرات خاطئة والدفاع متنيل مش عارف حاجة يعني انا عارف انجازات المعلم وانا من اشد المعجبين والمحبين ليه انتي ما اختيش بالك من اسم الموضوع بدأ
حارس المنصورة لو كان كويس كان سمعنا عنه وكان دافع عن فريقه
وانا مابقطعش انا اتحرق دمي زيكم كلكم لما قرأت الخبر على موقع الاي ار تي
صدقوني بجد انا لما كنت بكتب الكلام دة كنت تعبان انا لحظة الكتابة معرفتش ايه اللي بيحصل لازم كلنا نفكر 100 مرة لأن القرارات اللي اخذها حسن شحاتة
اكن احنا في بداية التصفيات بعد دة كله مشوار وتعب وفي الآخر نخسر امام الجزائر 3 مش عيب وانا واثق ان حسن شحاتة قراراته دي ناجحة بإذن الله
بس التفاجؤ ان يعمل التغيرات دي وفي نهاية المشوار وآسف ان تعديت حدودي وشكرا

وبعدين بشهادة الكل المنتخب الروندي تقدم في الفترة اللي فاتت جامد

يبقى لازم نغير ورقنا ويبقى عندنا لعيبة تظهر اول مرة ليه ؟؟؟

1 - نجدد دم المنتخب .. محتاج عناصر جديدة وشها مش مكشوف بدل ما ورقنا كله محروق !!

علشان نمنع الفريق التاني من توقع حركاتنا .. ووقفها

بصراحة اول مرة اشوف ناس بترفض ان ورقها في اللعب يكون مش محروق !!!!

وبعدين بالنسبة لحارس المنصورة .. ماهو عصام ربنا يحميه ويخليه قدها وقدود وهو حامي العرين من زمن .. يعني فكرة انو حد ينزل مكانه صعبه !!

انتو اتكلوا على الله وحطوا ثقتكم في المنتخب وقبليها في المعلم .. وربنا هينصرنا ان شاء الله

ادعو انتو بس في الايام الجميلة دي وربنا ان شاء الله هيتقبل منكم .. وبلاش (( النقد )) !!! بتاعكم دا

......

لورا

انا معاكي مع اني كاتب الموضوع ذلة لسان يعني انا تعصبت مجرد اني أخطأت وانتوا أخطأتوا فهمي خالص فهمي ان انا بقول مش وقت تجديد خالص عماد متعب رجع ليه يجيب احمد سلامة وآسف مرة اخرى للكابتن حسن وكلكم ادعوا ومتشكر يا لروا سوري لورا حسن شحاتة مدرب لن يتكرر كل ماتش مصر بتفوز فيه الحلم بيكبر ويزيد التعصب انشاء الله نوصل كاس العالم بس انا تفاجأت بحارس المنصورة عبد المنصف انا شفته في ماتش بيتروجيت كان كويس والاهداف من اخطاء دفاعية عبد المنصف حارس كبير ياريت ندعي
قولوا معايا

يارب الفرج من عندك يارب
يارب وصلنا لكاس العالم
يارب احمي كل مصري
يارب توفق كل مصري وترفع راية مصر في اعلى العلالي

يارب تقبل منا في هذه الشهر المبارك يارب وسامحيني يا لورا لو تجاوزت حدودي الناتجة عن عصبية تشجيع ..

ولا يهمك .. انا كمان ما كانش لازم انفعل كدا ومش بس من الموضوع من الردود.. بعتذر ليك مرة تانية .. بس انا كنت رديت على الاسئلة .. ياريت اللي هاقوله يطلع صح

اقتباس :: ايه سبب الخسارة امام الجزائر

السبب هو الدوري .. هو دا السبب .. اللعيبة جايه في نهاية دوري اللي متكسر والمصاب واللي ممشي حاله بالعافة .. ببقى فيه في الدنيا نظام دوري الفريق يلعب كل 3 ايام !!!!!!!!!!!! يرضي مين دا بس .. وبعدين ماهو في ماتش الجزائر كان كل اللعيبة اللي انتو مستعجبين انهم مش موجودين دلوقتي موجودين ( عبد الواحد - بدل حارس المنصورة !! وزيدان .... وغيرهم ) عملوا ايه .. وبعدين ما هو كان طبيعي في اي حته في العالم فريق يكسب وفريق يخسر .. وبعدين الجزائر مش فريق قليل .. وبعدين ليه مش بتطيقوا الخسارة .. فين الروح الرياضيه !! وازاي عاوزين فريق كل الدنيا بتقطع فيه طول مشواره ينجح !! وطالما انه لسا في امل انو نوصل لكاس العالم مش من حقنا بقى انه نتكهن بالسيء ونشكك في الناس العظيمة دي ولو لثانية

اقتباس :: حارس المنصورة لو كان كويس كان سمعنا عنه وكان دافع عن فريقه

اكيد علشان فريقه سيء .. فمطلعش .. هو انا نفسي افهم لما فريق يخسر ازاي عاوزين تقنعوني انها غلطة حارس مرمى بس !!!! ازاي ؟؟ دي مش لعبه جماعية .. الكل مسؤول دفاع وخط وسط وهجوم .. حتى الهجوم بيبقى مسؤول لانو لما بيريح بينضغط الدفاع وبيترتب اهداف ..

فبما ان اللعيبة هناك مريحين يبقى اكيد الحارس حتى ولو متميز مش هيبان ..

ومش عارفة انتو ليه شايفين انه هيلعب المباراة الجايه .. لأ ومتاكدين .. وقاعدين تقطعوا في الراجل قبل ما تشفوه !! بقا فيه كدا يعني ؟؟

عموما حصل خير .. وانا كمان بعتذر على هجومي على الموضوع بالشكل دا .. بس بجد انا مش متحمله حد يغلط ولو في عامل النظافة بتاع المنتخب

شكرا

...............

لورا

وانا بعتذر والله كل مصري واقف جنب حسن شحاتة وانا والله بحب حسن شحاتة
بس نشوف ان الحضري اكيد هيلعب اساسي طيب لو اتصاب و مش هيقدر يكمل من الحارس اللي هيجي دي نقطة لازم نقف عندها فريقنا محتاج حاجات كتير ومع السلامة

ولا يهمك يا ابوتريكة 22 ..

انا بعتذرلك جدا على ردي .. بجد انا اسفة جدا ..

ومقدرة بجد احساسك دا .. كل لما بيقرب وقت المباراة بتتشد اعصابنا اكتر .. بس وحياة ربنا خليك واثق في الناس دي .. يستاهلوا مننا اكتر من كدا

شكرا ليك

...........

لورا

يلا بقى مع السلامة عشان انا هنام

» النجيل الصناعي أزمة تهدد المنتخب المصري في رواندا
» حسن شحاتة يلوح بالاستقالة من تدريب المنتخب المصري
» دومينيك ربما يجري اربعة تغييرات على تشكيلة فرنسا أمام هولندا12|6

هل حسن شحاتة بدأ بالتخريف تغييرات بالجملة في تشكيلة المنتخب المصري التي ستواجه رواندا

هل حسن شحاتة بدأ بالتخريف تغييرات بالجملة في تشكيلة المنتخب المصري التي ستواجه رواندا

مواضيع مماثلة

مواضيع مماثلة