يا انا...يا انتى
ااااااااااااااااااااااااه يا دنيا
لما جيتك ما كان لى خاطر
مجبر اعيشك ساكت وصابر
ويوم ما اسيبك ع البعد قادر
محطة فراق من غير تذاكر

محطه ركبت منها
ومحطه هانزل فيها
لا جراحى باخلص منها
ولا الامى بكيت عليها

اداوى جرح تدينى غيره
ولا حد فيكى إختار مصيره
طب هاقولك هاتى اللى تجيبيه
انا اصلى طبعك خدت عليه

بينى وبينك معركه دايره
مراكب وقفتيها ومراكب سايره
مهما عملتى مش هتشوفى دموعى
دا انا دايما عارف طريق رجوعى

كان نفسى ارسم سكتى
وبايدى اكتب قصتى
بس دا شأن رب العباد
بيه بنؤمن مهما الحزن زاد

انا ليا رب اسمه الكريم
دايما معايا فى شدتى
لانى باعامله بقلب سليم
بيكون انيسى فى وحدتى

واقولك بقى ع اللى هيضحكك
مهما عملتى انا باحمده
ولو كان عذابى بيسعدك
اهو دين عليا باسدده

دين لقلب انا يوم جرحته
دين لحب بايدى دبحته
دين لعيون كنت سبب دموعها
دين لسنين كنت باضيعها

باقولك كده و خلاص مش خايف
لعبتى بكل ورقك معايا
بتعشمينى بامل زايف
وبافضل وراه لحد النهايه

بس هالوم عليكى ليه
ما انتى اسمك دنيا
قبل منى كتير هزمتيه
ولا اتهزيتى لو ثانيه


وصدقينى مش هتكسبينى
ما انا ياما شوفت منك مساخر
دا طريق طويل بينك وبينى
والشاطر اللى يضحك فى الاخر