المكان : استوديو تهامى فى مصر القديمة.
الزمان :2009
(تخيل معايا بقى ايه اللى هيحصل )
عربية موديلها قديم تقف قدام الاستوديو وينزل منها (وديع) ويدخل الاستوديو يبص من ورا الباب يشوف مزاج (تهامى باشا.. المنتج) يلاقيه قاعد على الكرسى ورا المكتب بيشرب سيجارة بنى وبيسمع موسيقى صامتة..يمسح وديع الجزمة فى البنطلون عشان تلمع زيادة ..وبعد كده يدخل فجاءة وهومبسوط و بيقول
( بصوت عالى) تهامى باشا..

تهامى باشا(بصوت زى مايكون بالع ضفدعة) : قصر يا وديع
وديع : جايبلك فيلم ..مش هيهز مصر بس لأهيهز العالم كله ..إسمه (لا محبة إلا بعد عداوة).
تهامى باشا(بنفس الصوت): إنجز ياوديع...(شكله كان مستعجل).
وديع(بيتكلم بفخر..مش عارف ليه): القصة عن اللى حصل بعد ماتش مصر والجزائر .
تهامى باشا(بصوت ضعيف): فرجنى ياوديع.
وديع: إدخلوا يارجالة.

هوب كرسى فى الكلوب ..الدنيا ضلمت.. ناس لابسة تى شيرت مصر بتجرى وناس تانية لابسة تى شيرت الجزائر وماسكة مطاوى وسنج بيجروا وراهم .وهما بيقولوا (هنموتكوا يا مصاروة ) ..وتهامى باشا قاعد هيموت من الرعب وفجأة تدخل واحدة بتجرى وتقلع ال تى شيرت المصرى عشان الجزائريين مايعرفوهاش ..
تهامى باشا(يقوم منفوض ويخبط بأيده على المكتب ويصيح بصوت عالى ويقول بأ سى) : أيوه كده يا وديع أخيراااا فهمتنى يا وديع.(حاول تتخيل شكله)
ويقعد وهو بيقول (بصوت عالى برده) للى خلعت ال تى شيرت انتى هتبقى نجمة الموسم وكل موسم.
وديع: ولسه لما تشوفها بعد لما نتصالح.
تهامى باشا (بقرف): مين ده اللى هيتصالح.
وديع (وهو بيضحك بهبل كده): إحنا والجزائر يا باشا
تهامى باشا (بإستحقار): الجزائر
وديع (بنفس الهبل): أه
تهامى باشا (بغضب): دا إنت عاوز تغرقنى معاك...إنسى يا وديع..
وديع (وهو متلخبط):طب يا باشا استنى بس كده لسه ...
تهامى باشا(قاطع وديع واتكلم بصوت الخبرة): وديع... يا وديع .. خد ياوديع.
فتح الدرج وطلع شريط مكتوب عليه (صدره للى يقدره) وقال لوديع إعمل ده يا وديع.
وديع(وهو بيبص لتهامى نظرة المعجب بذكائه): أستاذ ....وياخد الشريط ويمشى وهو بيصيح يالا ياأساتذة......
فجأة يطلع صوت عالى لواحد بيتكلم بجد وهو بيقول:

(فى السنة اللى قطعنا فيها العلاقات مع الجزائر ..صدرنا الغاز لإسرائيل ..وببلاش)
وفى نفس السنة حصل عندنا أزمة فى أنابيب الغاز ولسه محدش يعرف السبب.


(إستهبال عربى ........أم الأجنبى)
</B></I>