مصر هبة الجيل

بقلم/ محمد فتحي



مصر التي أعرفها أحبها في السر وأنقدها في العلن.
أخاف أن تعرف أنني أحبها لهذه الدرجة من العشق فأخسرها، فربما تكون غير
مستعدة لعلاقة حب جديدة بينها وبين واحد من أهلها، لاسيما وأن كل علاقات
الحب التي دخلت فيها تركت في جسدها وتاريخها آثاراً وندوباً وجروحاً لا
يبدو أنها ستندمل يوماً، ومع ذلك تبتسم مصر ولا تظهر ألمها مهما حدث.
تبدو مرفوعة الرأس، مصلوبة الظهر أمام الجميع رغم أنها تعاني من (الأتب).
تقف شامخة وهي تخبئ عكازها بحيث لا يراه أحد مهما شعروا بوجوده.

مصر هي (الصبح بدري).
آذان الفجر ومحاولات الاستيقاظ وتحدي الشيطان، والتسبيح بصوت هامس وانت
نازل على السلم خوفاً من (العاووو) الذي لا تؤمن بوجوده لكنك تخاف منه.

مصر الناس التي تنزل من بيوتها بعد قرآن السادسة والنصف لتقف على أقرب
عربية فول وتضرب الفول بالزيت الحار.الفول مسمار البطن، ووجبة الفقير
والغني التي اتفق الجميع عليها في مصر، و"حط شوية طحينة زيادة".."طب هات
لمونة".."فين المخلل؟".."رغيف صابح يا ابني".."كوز المية فين يا
عم".."الحمد لله".. "حسابك كام يا حاج"؟.
مصر الولد البرئ الصغير الذي ينام فوووووق في أعلى قمة البرسيم الذي
تعب في رصه على العربية الكارو في الفجرية. النوم على البرسيم في الصباحات
الجميلة أحلى من النوم على ريش النعام، والهواء لم يلوث بعد، والسماء
الصافية لدرجة تجعلك تشعر وكأنك سترى الله لو دققت النظر. تولد الشمس
شيئاً فشيئاً والولد على البرسيم يفتح عينه ويدعو بكل شئ..بالرزق الوفير،
والستر، وطولة العمر، ودوام الصحة ، والزوجة الصالحة، وكل شئ لا يمل من
الدعاء به مهما تأخرت الإجابة .

مصر طفل المدرسة الذي تتشاجر معه أمه لإيقاظه، ثم تتشاجر معه ليأكل
الساندوتش، ثم تتشاجر معه ليشرب اللبن، فيتشاجر معها لأن (البقسماط) خلص،
وهو يجب أن (يسقٍّي) البقسماط في اللبن أو الشاي أبو لبن، ولا يقتنع إلا
بعد أن تصالحه أمه ببسكويت (نواعم)، لتوصيه قبل أن ينزل الوصايا المائة
للأم المصرية، والتي تبدأ ب(إوعى حد يقولك تعالى اوديك لبابا وماما تروح
معاه)، ولا تنتهي ب( ما تخليش حد يشرب من زمزميتك)، بل تمتد إلى (خلي بالك
من نفسك)، وتنتهي مؤقتاً بأن تقول الأم "لا إله إلا الله"، فيرد الابن وهو
يبتسم ابتسامته التي تختصر الكون كله "محمد رسول الله".

مصر البنت العسولة ام ضحكة تجنن.أول ضفيرة. أول بوسة على خد بابا و
ماما.أول (توكة) بتشتريها.فرحة هدوم العيد.فركة عنيها من المية ساعة
الحموم. تسريحة شعرها الطويل و(القُصَّة). الطوبة التي ترميها وهي تحجل
على قدمها وتلعب (الأولى). مساعدتها لأمها في غسيل (المواعين). مسكها
للمشابك وامها "بتنشر الغسيل"، ووقفتها أمام المرآة وهي تلعب بعلبة
الماكياج. ملاعبة القطة والطبطبة عليها رغم تحذير الأم من الأمراض. حضنها
للكراريس وهي رايحة الدرس. ابتسامتها بعد أول معاكسة، وخوفها وارتجافها من
أول كلمة (بحبك). حلمها بفارس الأحلام، وبأن تعمل مضيفة طيران تلف الدنيا
بحثاً عنه.

مصر الولد الشقي. الصفعة على وجه بابا وماما على سبيل الهزار.الجري
وإفلات إيد من يمسكها، والتنطيط على السلم، وكسر زجاج الشباك بشوطة الكورة
القوية.الشبطة في البوزو والشيبسي وشيكولاتة جيرسي وعصير المانجو أبو
شفاطة.التأخير في المدرسة والمريلة (المبقعة).اللعب في الشارع.معاكسة
البنات.صيادين السمك، والسبعاوية، ومصر سوريا، وقفاشة الملك، وتيرو،وشد
الكوبس.. كهرباااا، وتريك تراك وأول يوم صيام في رمضان، وفرحة صلاة
الجمعة، وعذاب الثانوية العامة، و"ما تقراش وانت نايم"، و"ما تقربش من
التليفزيون عشان عينك"، و"ذاكر وحل عشان تجيب مجموع". (ربكة) مكتب
التنسيق، والكلية التي لا تحبها ثم تبكي وأنت تتخرج منها.

مصر الارتباط و(بحبك). أول بوسة، وجنينة الأورمان، وكوبري
قصر النيل ،و"اشتري الوردة دي مني يا رب تتجوزها".

مصر القايمة والعفش والاتفاق، و"هاخدها بشنطة هدومها"،
و"احنا بنشتري
راجل"، و"احنا نجهزهالك ونوديها لغاية عندك.. هتكتب المؤخر كام بأه"؟!!.

مصر طابور المدرسة، وتحية العلم، و"بلادي بلادي"، و"مصر يا أول نور في
الدنيا شق ضلام الليل"، والتي حولناها لـ"بيتنا يا أول بيت في الدنيا دخله
حرامي بالليل".
مصر رحلة جنينة الحيوانات، وحديقة الأزهر، وجنينة الأسماك،
ومتحف الشمع، والكبريتاج وبانوراما اكتوبر.

مصر السياحة، والفسح، وركوب الحنطور، و"كرباج ورا يا اسطى"، وبمب
العيد، وسعد نبيها التي هي (سعدنا بيها) في أغنية أهلاً بالعيد لصفاء ابو
السعود؛ لأن مفيش نبي اسمه سيدنا سعد.

مصر الكورة، و"أخير اجوان"، و"الجون مغازل"، و"اللي يخرج من جونه
يتكسر". "خروقة يا كابتن"."باصي يا أناني"."الأهلي حديد"."يا زمالك يا
مدرسة". "العب جتك نيلة ع اللي قلك العبها".حلم كاس العالم، وحسام حسن،
وحسن شحاتة، وشحاتة ابو كف، وكف ريكاردو لجمال حمزة في الماتش، وماتشات
الأهلي والزمالك، و"بيبو وبشير بيبو وبشير بيبو والجون"، والحكام الأجانب،
وماتش الأهلي مع الاسماعيلي في الاسماعيلية، والشماريخ، و"اللي يخاف
يروح"، و"بورسعيد المدينة الباسلة"، و"المصري بيكرهك يا أهلي".

مصر الصحاب والجدعنة، و"الجري نص الجدعنة واحنا جدعان أوي"، و"الندالة
ليها ناسها"، و"قليل الأصل ما يلزمناش"، و"قليل البخت يلاقي العضم في
الكرشة".
مصر (المعايرة)، و"بطل يا اهبل"، و"اتقي شر كل من اقترب من الأرض،"
و"انا مش قصير قزعة أنا طويل واهبل"،و"يا تخين يا ابو كرش"، و"يا ابو اربع
عيووون""، و"واحد اتكبس دمه اتحبس..طق مات"، و"كبسة كبوسة واللي يكبسني
يبقى جاموسة"، و"افتحولي الباب ده..الجاموسة والدة"،و"بريللا بريللا
بريلليلااااا"، و"خلاااااويص...لييييسسسسة".

مصر الزوج والزوجة . ناقر ونقير. خناقة "انتي كنتي عند امك النهاردة
ومسلطاكي عليا"، وإهانة "بس يا ابن امك"، والسؤال الأزلي: "بتحبني زي زمان
واللا لأ"؟.خناقة الماتش والتمثيلية.وخناقة "الأكل اتأخر ليه"، و"الملوخية
مش مظبوطة"، و"الرز معجن"، و"اللبس ما اتكواش ليه"، و"فين الشراب"،
و"ماغسلتيش ليه امبارح بدل الرغي في التليفون"، و"تعالى ساعدني عشان تقدر
انا بتعب قد إيه"، و"قوم هات كوباية مية لنفسك يا سي السيد"، و"هو انا
الجارية اللي ماما جابتهالك"، ومصالحة "ماهو انت بتزعقلي كتير يا حبيبي"،
وبوسة قبل النوم، وليلة الخميس القومية، والصحيان وخري يوم الجمعة بحجة
انه عشان أجازة.

مصر الفرحة أمام السونار قبل أول ولادة، وقلق العملية، والخوف على صحة
مراتك، و"ولد واللا بنت؟..كل اللي يجيبه ربنا كويس"، ودموع الفرحة ما بعد
قومتها بالسلامة، ارتعاشة يدك وأنت تمسك ابنك أو ابنتك للمرة الأولى،
والمشاعر الحنونة التي تولد فجأة، والحيرة في اختيار أسماء الولاد الذين
سيصبحون بعد قليل (العيال) ثم سيكبروا ليصبحوا (قرود)، ومن الدعاء لهم
بالتوفيق للدعاء عليهم(ربنا ياخدكم)، و (الأفأفة) والملل في انتظار العيل
الخامس و"مش هنخلص بأة من حياة الأرانب دي"؟!!

مصر "الضنا غالي"، وكلكم ولادي، و"بحبكم زي بعض"،
و"اتغطى يا ابني كويس"، و"اغسل رجلك قبل ما تنام".
مصر (اللمّة) على الطبلية في الفطار. طبق الجبنة بالقوطة وعليه (ندعة
زيت) و(حبة طحينة)، والعيش الطازة.الفطيرة المشلتتة مع القشطة والعسل
الابيض أو الاسود لما يكون عندنا برد.البتنجان المخلل والبطاطس والفلفل
المقلي،ورائحة قلي الطعمية، وقرص العجة المتين، وأحلى طبق سلاطة خضراء
بالبصل والخل.
مصر المواصلات التي نجري وراءها حتى نفاجأ أننا وصلنا دون أن نركب.

خناقة كل يوم مع التباع في الميكروباص والذي يقسم بأغلظ الإيمان
أن "مش معاه فكَّة" مع إن صوتها (بيشخلل) في جيبه مع كل مطب.
مصر مترو الأنفاق، و(ممنوع التدخين)، و"عديني وراك لو سمحت"
و"مصلحة يا سيد"، و"وريني بطاقتك "، و"غرامة عشرة جنيه".

مصر الشغل الذي تعاني منه ولا تستطيع الاستغناء عنه.
رخامة المدير وغلاسة الساعي الذي يذكرك بما عليك.
مصر الجمعيات، والاقساط، وفاتورة الكهرباء، والتاكسي "اللي ما بيقفش"،
وخناقة الحساب، و"بالراحة في المطبات عشان معانا واحدة حامل"، و"رش المية
عداوة"، و رش المية في الشارع بالخرطوم الاحمر "عشان تجيب طراوة".
مصر الشارع المتسفلت الذي يحفروه بعد سفلتته لأنهم نسوا موضع البلاعة،
ونسوا تركيب كابلات الكهرباء، ونسوا تركيب الغاز، ونسوا أحد الموظفين،
ونسوا أصلاً نفسهم فمشيوا.

مصر المطبات الصعبة التي حفرها الناس بالعتلة والمرزبة لإجبار السيارات
على التهدئة بدلاً من أن تلهف العيل وتدهسه، وفي الغالب يحدث ذلك بعد وصول
الضحايا لعدد مريييييع.

مصر البلاعة التي يموت فيها الناس، وسلك الكهرباء العريان الذي يصعق
الأطفال، وعربية رش المبيدات التي يجرون وراءها ليستنشقوا غازها السام،
والتدخين في كل مكان، والشيشة على كل قهوة، و"فين المبسم بتاعي"، و"حجر
تاني هنا".

مصر بحري و اسكندرية و"مدد يا مرسي يا ابو العباس الاسكندرية يا أجدع
ناس".قلعة قايتباي. جيلاتي (عزة). سندوتشات (جاد).سمك (قدورة). الغداء في
(بلبع).المشي ع الكورنيش. ضرب الفلوكة. الصيد على (اللسان) .ركوب الترام
"أبو دورين".الوقوف عند فرشة الرملي في محطة الرمل لقراءة الجرايد ببلاش،
ومعرفة الكتب الجديدة، ومتابعة أحدث الأفلام الأجنبي المضروبة على سيديهات
بنص التمن.أحمد الابيض والكتاب زيادة بخمسة جنيه عن سعره، وبعد أن يعرفك
ممكن يديهولك ببلاش.

مصر الشراقوة "اللي غدو القطر".المنصورة وجمالها.الدمايطة وشطارتهم
والمشبك.طنطا والحمص والسيد البدوي ومطعم ام محمد.المحلة ومصانع الغزل
والنسيج. المنوفية والمنايفة اللي يتضرب بيهم المثل ويتألف عليهم النكت
رغم ان اتنين منها رؤساء جمهورية.
مصر قبلي والصعايدة الرجالة والدم الحامي والمخ الصعيدي و"ما تقفلش معايا امال".

مصر الآثار، والهرم، وحضارة 7000 سنة، ورمسيس الثاني، ونفرتيتي، وحورس،
وإيزيس وأوزيريس، وحور محب، وإيمحوتب ،ومينا نارمر موحد القطرين،
والفلاح
الفصيح، والكاتب المصري، وإخناتون أول من دعى للتوحيد.

مصر القيمة والسيما، والتاريخ والجغرافيا.
مصر اكوام الزبالة، وطوابير العيش، والجو الحر، والفانلة الجيل
الحمالات،و"توب علينا يا رب من الصيف وبلاويه واللي بيحصل فيه"، والشبشب
البلاستيك،
والدش البارد، و"ابقوا تعالوا صيفوا عندنا".

مصر لسعة البرد في الشتاء.طبق العدس من القزاز.كوباية حمص الشام وكتر
الليمون.طبق الكشري من ابو طارق وكتر الدقة.رز بلبن من المالكي والقنبلة
من عند (الكرنك). طبق المشكل من (حبايب ام هاشم) ، والسمين المعتبر من
(بحَّة) الأصلي
"بتاع الناصرية"، والفاكهة من سوق الاتنين.

مصر كبدة البرنس بتاع امبابة ، وزيزو نتانة في باب الشعرية، وسوبيا
الرحماني في السيدة، وطبق البسبوسة بالقشطة، وحفلة 3 في سينما أوديون،
وفسحة سيتي ستارز و(نزولة) روكسي ، وملاهي دريم بارك.

مصر سلاح التلميذ، والأضواء، وكراسة الأول، والتوقعات المرئية، ورجل
المستحيل، وملف المستقبل، وما وراء الطبيعة، والمكتب رقم 19، والمغامرين
الخمسة، والشياطين ال13.
مصر مكتبة ديوان، و(مج النسكافيه)، وصوت فيروز جاي من بعيد، والشروق
طلعت حرب، ومكتبة مدبولي، وروايات ميريت، وندوة علاء الأسواني كل خميس،
وحفلة توقيع في مكتبة البلد، وندوة في مكتبة حنين، وساقية الصاوي وفرقة
وسط البلد، و حفلات اسكندريلا.

مصر قرف ورق التجنيد، والبحث عن وظيفة ،والقعدة ع القهوة، وأهرام
الجمعة بإعلاناته المبوبة، والدعاء بعدم دخول الجيش أو القسم في محضر تحري.

مصر الشرطة في خدمة الشعب، والشعب مضروب على قفاه من الشرطة ،
و"البلد
دي بقالها يا ابني 7000 سنة بتتنهب ولسة فيها خير"،
و"إن الله لا يغير ما
بقوم حتى يغيروا ما بأنفسهم"، و "كله بتعليمات سيادة الرئيس".
مصر "بالروح..بالدم..نفديك يا فلاااان"، و"حلوة بلادي السمرا بلادي"،
و"بسم الله..الله أكبر بسم الله بسم الله"، و"انا م البلد دي".

مصر النفاق، و"شخبطة سعادتك تخطيط لمستقبل مصر"، و"احنا نتمنى
نلعبعقلة عشان نوصل لصوابع رجليك"، و"أحلام سعادتك خطة
مصر الخمسية يا فندم"،و" لا عاش ولا كان اللي يقول كلمة وحشة
على معاليك"، و" أشد السيفون لفخامتك؟"!!!

مصر الحرامية الكبار، و"اللي له ضهر ما ينضربش على بطنه"، و"انت عارف
انت بتكلم مين؟، و"والله لاوريكم"، و"كل واحد وله زنقة"، و"بكرة تيجي على
حجري يا معلم ونشوف".
مصر "امسك حرامي"، و"هااااا..مين هناك"، و"اقف لاضرب في المليان".
مصر اشارة المرور المتعطلة، والموكب اللي بندعي عليه، وشنطة المدارس
اللي بتقطم ضهر عيالنا، و"سموها التربية قبل التعليم مع إن دلوقتي لا فيه
تربية ولا فيه تعليم".

مصر "يا رب احج"، و"ارزقنا بزيارة النبي يا رب"، و"اغنينا بالحلال من
عندك"، و"استرها علينا دنيا وآخرة يا ستار"، و"لا حول ولا قوة إلا بالله"
، و"حسبنا الله ونعم الوكيل"، و"ربنا ع الظالم والمفتري وابن الحرام"،
و"استر عليا ربنا يستر عليك"، و"ان الله حليم ستار"، و"اصبر يا أخي متسربع
على إيه".
مصر "اللي انكسر لازم يتصلح "، و"شرف البنت زي عود الكبريت"، و"بنات
الناس مش لعبة"، و"امشي من هنا يا واد يا خنفس انت وهو" ، و"اللي يلبس
انسيال وسلسلة دهب ويمضغ اللبانة يبقى لامؤاخذة يعني راجل..............."

مصر غناوي الأفراح، و"اتزحلق واجري يا رمان، وتعالى على حجري يا رمان"،
و"ياللي ع الترعة حود ع المالح"، و"وله يا وله يا عرباااااوي"، و"شفت
العريس قال للعروسة إييييه"، و"بسم الله الرحمن الرحيم وهنبدأ الليلة"،
و"الهنا والمسا ده جاي من عم المنطقة" ، و"نجاملكم في الأفراح"، و"عقبال
ولادك يا أبلة وحوح"، والنقطة اللي نازلة ترف.
مصر جلال الموت، و"على الله الناس تتعظ "، و"يا سبعي يا جملي"، و"ما
تسبنيش يا مستتنيي"، وشريط الشيخ عبد الباسط وهو يقرأ سورة يوسف في
التسجيل القديم، والصوان من فراشة سيد أنور، و"الموت علينا حق"، و"البركة
فيك يا ابني"، و"ربنا يجعلها آخر الأحزان"، و"كان وشه بيضحك واحنا
بنغسله"، و"شفت الخشبة كانت بتجري ازاي"؟، و"والله كانت ليلته حلوة أوي يا
جدعااااان"!!!

مصر التلاوة والمشايخ. الشيخ محمد رفعت ومصطفى اسماعيل ومحمد صديق
المنشاوي ومحمود علي البنا ومحمود خليل الحصري وعبد الباسط عبد الصمد وعبد
الفتاح الشعشاعي وشعبان الصياد ومحمد محمود الطبلاوي وراغب مصطفى غلوش
ومحمد جبريل في دعاء ليلة القدر وهو يصلي بالآلاف في مسجد عمرو بن العاص.
مصر الأزهر والحسين والسيدة زينب والسيدة عائشة والسيدة نفيسة
وأولياء الله الصالحين. مصر الشيخ الشعراوي والشيخ الغزالي والشيخ كشك.

مصر التي ذكرت في القرآن. مصر "خير أجناد الأرض".
مصر رفاعة الطهطاوي ومحمد علي ومحمد كريم واحمد عرابي ومصطفى كامل
ومحمد فريد وسعد زغلول .

مصر علي مصطفى مشرفة وأحمد زويل والبرادعي والنشائي ومجدي يعقوب ومصطفى السيد .
مصر أحمد شوقي وحافظ ابراهيم وابراهيم ناجي وعبد الحميد جودة السحار.
مصر طه حسين ونجيب محفوظ ويوسف إدريس ويوسف السباعي
ومحمد عبد الحليمعبد الله و إحسان عبد القدوس.
مصر بهاء طاهر وخيري شلبي و ابراهيم عبد المجيد والمنسي قنديل والمخزنجي.
مصر أمل دنقل..

مصر بيرم وصلاح جاهين وفؤاد حداد والأبنودي و سيد حجاب واحمد فؤاد نجم وفؤاد قاعود.
رنات الموبايل في انصاص الليالي، والتثبيت بالليل على الكوبري، و"طلع
اللي ف جيبك يا خفيف"، و"عيب يا كابتن انت ما عندكش اخوات بنات واللا
إيه"، و"اروح العنوان ده ازاي يا ابني".

مصرالوصفة الغلط و"التوهة" في كل السكك" ، و"قل من الندر واوفي"،
و"الجميل ده عمري ماحنسهولك أبداً"

مصر كدة على بعضها ومفيش تنقية
مصر باكيدج، وبسعر الجملة، وما ينفعش تحبها بالقطعة
يا تاخدها على بعضها
يا تسيبها كلها

....

دى مقدمة كتاب "دمار يامصر" لـ "محمد فتحى"
بس عجبتنى اوى المقدمة قلت انقلهالكم



علماً بأن
الكتاب صدر 1 يناير 2010، ويباع حصرياً في
جميع فروع مكتبات ديوان حتى 27 يناير

*****************
تجدوا
الكتاب في معرض القاهرة الدولي للكتاب بمدينة نصر
في جناح دار ليلى للنشر والإعلان بسراي كندا

*****************
يباع الكتاب خارج المعرض في مكتبات الشروق وديوان
وفيرجن وعمر بوك ستورز والبلد والكتب خانة