هى حاله الأكيد إنها حصلت كتير
والجايز تكون حصلت لحد هيقرأها دلوقتى
أنا خدتها من زاويتى
وحاولت أعبر عنها بنص
نثر زجل شعر
هى حكايه بنص
يارب تعجبكم
.
.
.


كل الناس هتقول ياسلااااااااام
دى حاجات تحصل فـ الأفلام
وعمود من جرنال أوهام
بس حقيقى أنا هحكى حكايه
مش حدوته وأى كلام


أنا فلاح وبسيط على قدى


كان عندى فى بيتى عصفوره
كنت بقضِى نهارى لواحدى
بالليل ببقى معاها فـ صوره
زى حبيب سهران لحبيبته
عمال بيفضفض وبيحكى
تعبان طول يومه وجاى يشكى
ناخد انا وهى كدا وندى
تطلع شمس الصبح الدافيه
تفرد هيا جناح على صدرى
وننام واحنا ارق اتنين
فاتوا سنين
ووراها سنين

والعصفوره بتحلى وتحلى

وخنقها قفصها بحيطانه
والفلاح عمال يتقدم
بالسن وبالصحه يأخر
والعصفوره بتطلب أكتر
وقت
وحب
وعاوزاه يسهر
زى زمان وازاى بقى يقدر
يفضل طول العمر شباب
؟

خرجت يوم طارت للوحله

اللى يطير مايطيرش لتحت
لازم يوم هيكون خسران
قابلت برا كتير غربان
و اتخدعت
ماهو شكل جديد
قالت يمكن دا التجديد
تلقى معاهم
حاجه تفيد
فاقت على جرح وبيزيد
فـ جناحها المكسور وبينزف
غرق ريشها بلون الدم
خدها جناحها التانى وجابها
بعد تعب رجعت للبيت
بصت ليا لقيتنى لواحدى

نزلت منها دموع على صدرى

ولقيتنى مش قادر أشيلها
ولا اواسى
ولا اقول معلش
اللى خنقها دا عاش يحميها
جارحه كرامتى ازاى هداويها
لسه بحاول أحنن قلبى
وأنطقها من خوفى عليها
عاوز اقول والله بحبك
جت لعينيا عينيها وفجأه
خرجت روحها وهى مكانها
يعنى إتولدت
كبرت
طارت بعدت
رجعت ندمت
فارقت روحها الجسم وفارقت

كل دا كان منى وعلى صدرى


جوا قفصها فرشت دموعى
دخلتِها وقفلت الباب
وهعيش كل العمر أشوفها
أيوه هعيش الجاى انا ليها
وافضل بردو بخوفى عليها
يمكن ماتت
بس انا هفضل
احكى حكايتى واعيد انا فيها

خلصت ؟
لأ


دانا فلاح وبسيط على قدى

كان عندى فى بيتى عصفوره
كنت بقضِى نهارى لواحدى
و.................
..................

............
.......
...