السلام عليكم ورحمة الله وبركاته
انا هحكى لحضراتكم على موقف حصل معايا شخصيا أثر فيا أوى وحسيت لازم احكيه هنا
كنت راجعة من الدرس وركبت الاتوبيس قعدت وكان الكرسى اللى جنبى فاضى
فجأة واحد جه من تحت كدة كان بيسحف فى طرقة الاتوبيس(عنده اعاقة فى رجله.. فيه رجل قصيرة أوى ربنا يحفظنا فهو من الناس اللى هى بتمشى بايديها أكيد شفتو منهم)
بصراحة انا اتخضيت أوى لدرجة انه أخد باله
قعد على الكرسى اللى جنبى على الطرف كدة
وانا لسة كنت خايفة منه مش عارفة لى
المهم فى وسط خوفى بدأ هو يقرأ القرءان ويرتله
بسم الله ما شاء الله على صوته
زى صوت القراء المشاهير من احمد العجمى ومشارى راشد صوت رائع فعلا
انا طبعا اطمنت وحسيته محترم
ومن جوايا اتضايقت اوى من نفسى انى خفت منه وانه حس بكدة غصب عنى فى الاول
انا بحترم جدا الناس اللى بتقرا قرءان فى اى وقت وفى اى مكان بصوت عالى وسط الناس
(الشباب دلوقتى: الأغانى طبعا ملهاش حل ولا عمرو دياب الجديد لازم الاتوبيس كله يسمعه معايا الا من رحم ربه)
لكن دة حافظ القرآن ما شاء الله رغم ظروفه دى وبصوت رائع وبيقراه بصوت عالى فى وسط الناس بكل فخر
فى قصة فتاة اسلمت بسبب انها سمعت واحدة بتقرا قرءان فى المترو بصوت عالى
المهم الاتوبيس اتملى وجت بنت وقفت لأن مفيش مكان
تخيلو دونا عن كل الشباب والاولاد والرجالة اللى فى الاتوبيس يقوم هو ليها عشان يقعدها؟؟؟
انا مصدقتش بجد ...كل دة وهو مستمر فى قراءة القرءان
والغريبة ان بردو البنات اللى ركبو خافو منه واشمئزوا من منظره
كان نفسى اقولهم عيب تخافو من واحد محترم زى دة وحسيت انى متغاظة منهم اوى وهو مستمر فى القراءة ولا يبالى لكل دة ومبتسم كمان
تخيلو الراجل دة بقى واقف برجل واحدة وماسك بالبتاعة اللى فوق بايده عشان يسند نفسه
اتأثرت اوى بيه فعلا
(الشباب دلوقتى ولا فى دماغهم بنات ولا ناس كبيرة واقفة وهم يقولو طب وهم اى اللى يخليهم يركبو والاتوبيس مليانالا من رحم ربه)
شفتو اللى عندو اعاقة فى رجلو عمل اى وبكل اخلاق؟
فضلت بجد أدعيله
ووشه مبتسم فى وش الناس اللى خايفة منه ومشمئزة منه وكله رضا وقناعة مشفتهاش فى حد
الواحد دلوقتى على أقل حاجة :لى يا رب عملت فيا كدة ويبقى مش طايق نفسه الا من رحم ربه
دة معندوش صحة ومعندوش مال بدليل البهدلة اللى هو فيها وبيسعى احسن من اى حد سليم وكمان وهو راضى بأمر ربنا
فيه ناس زيه عندها اعاقة بتقعد تشحت وكأنها بتشتكى للناس من ربنا ويبينو اى عيب عندهم او اى اعاقة عشان يثيروا استعطاف الناس
وهو فوق كل دة بيعامل الناس بكل اخلاق



بعد ما كرسى فضى كان فيه واحد واقف معاه قعد هو طلب من اللى واقف معاه يقعد جنبه لكن يظهر انه قرف يقعد
انا بجد كنت هعيط هو فى وسط كل دة والنظرات دى رضا وسعادة واخلاص لربنا مفيش بعد كدة
حسيت انه بيعامل ربنا وبــــس ومش هامه اى حد تانى
ولا راضى يبص على اى بنت ووشه فى الارض حتى البنت اللى قام وقعدها
لحد ما نزل وهو بيقر قرآن



الشاب اللى شكله مقزز دة اللى عنده اعاقة دة فى رأيي الشخصى مثل مشرف للمسلم بجد حسيت ان مقامه عند ربنا احسن من شباب غيره كتير حسيت انى ضئيلة اوى جوا نفسى انى اخدت بمظهره دة
الشخص دة بجد ربنا مبتليه بجد وهو بيحمده بجد
يا جماعة اسألكم الدعاء ليه بجد ربنا يكرمه ويجعله من رفقاء الرسول
آمين يا رب
ويهدى شباب وفتيات المسلمين جميعا يا رب ويهدينا أجمعين

اللهم رد المسلمين الى دينك مردا جميلا

والسلام عليكم ورحمة الله اتمنى مكونش تقلت عليكم
منتظرة الردود