تعالوا نشوف قصة احمد اللى كلنا احمد زيه او اغلبنا


أحمد دخل المسجد يصلي ,, شوفوا معايا ايه اللي حصل :


استغفـر الله العظيـم


إستووا.. إعتدلوا.. إستقيموا يرحمكم الله

الله أكبر..

أحمد ركز بأه في الصلاة وبلاش تسرح، طيب خلاص،

إمممم.. هو الراجل اللي جنبي ده صوابع رجليه عاملة كده ليه؟

صباعه الكبير ده كبير أوي

، آه بمناسبة الصوابع هي صوابع زينب دي اللي هيا إيه؟

بيتهيألي دي اللي عاملة زي الزلابية، زلابية؟؟ زلابية إيه بس وبتاع إيه


الله أكبر

أحمد ركز يا أحمد، طيب ماأنا مركز أهوه،

مركز إيه طيب إنت قريت سورة إيه؟

أنا قريت سورة اللهب شفت بأه أنا مركز إزاي؟

لألأ دي كانت سورة الفيل

سمع الله لمن حمده


ربنا ولك الحمد،

أنا جعت، بس مش عارف أفطر إيه النهاردة؟

آه المطعم الجديد اللي كانوا بيتكلموا عنه إمبارح، بيقولوا عليه أكله حلو، بس هو في شارع إيه؟

لما أخلّص الصلاة أتصل بالتليفون أعرف العنوان

الله أكبر


هيا الساعة كام دلوقتي؟

زمانها أربعة وخمسة، على فكرة هيا الساعة التانية الجلد كنت حطيتها فين؟


آه.. ياإما في الدرج ياإما في الدولاب،

دولاب ايه بس يا أحمد ركز ياأحمد إنت بتصلي، أستغفر الله

الله اكبر


أهوه أنا مركز أهوه، إنظر لمكان السجود (من شروط وواجبات الصلاة) وركز في الأيات اللي بيقولها الإمام

الله أكبر


الشيطان ده أعوذ بالله بيخلي الواحد يسرح


، مش هو الشيطان بيتسلسل في رمضان، يعني بيتسلسل تلاتين يوم،

أيوه بس هو رمضان ده تسعة وعشرين ولا تلاتين؟

هو إبتدى إمتى؟

تعالى نحسبها كده..


هو كان يوم السبت في السعودية وفي مصر الأحد


غريبة أوي الحكاية؟

طيب لو واحد على الحدود ورجل بره ورجل جوه يصوم ولامايصومش؟

أحمد.. شفت أهوه إنت رجعت تسرح تاني

الله أكبر


هو إحنا في الركعة الكام؟

يعني هانقوم ولا هانقرأ التشهد؟

لا دي التانية، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد

الله أكبر


أيوه دي الركعة التانية، شفت بأه عشان سعادتك عمال تسرح،

لأ خلاص أعوذ بالله من الشيطان الرجيم

الله أكبر


السجادة دي مريحة ولونها حلو،

هيا سجادة ولا موكيت، لاموكيت بنسيج السجاد

، آه على فكرة إبقى إفتكر تكنس السجادة اللي في البيت بالمكنسة،

بس لازم أنضف كيس المكنسة عشان بقالي مده مانضفتوش

الله أكبر


الراجل اللي جنبي ده، رجليه بتزق في رجلي، طيب أحرك رجلي شوية، الله ده بيلزقها فيا تاني، أستغفر الله

الله أكبر


فيه صوت موبايل، الناس دي ليه مش بتقفل الموبايل ساعة الصلاة..

مش عارفين ان ممكن ده يخلي الواحد مايركزش في الصلاة


مع إن فيه يافطة محطوطة على الباب مكتوب عليها إغلق الجوال من فضلك وعليها صورة موبايل عليه علامة إكس..


بس هو الموبايل ده كان نوعه إيه؟

بيتهيألي سيمنس.. هيا إيه الرنة دي؟

آه أنا عايز أبقى أغير الرنة، فاكر الموضوع اللي كتبته عن رنات الموبايل

الله أكبر


الراجل اللي جنبي ده عمال يتحرك كتير، أستغفر الله مافيش خشوع خالص، أنا أهوه مش باتحرك

السلام عليكم ورحمة الله


السلام عليكم ورحمة الله

إيه هيا الصلاة خلصت ؟

السلام عليكم ورحمة الله

السلام عليكم ورحمة الله


أستغفر الله العظيم !!!!!

( هذا النص منقول ( نص قصة أحمد ) )

طيب يا جماعه كده أخونا أحمد خلص صلاه ,,,

طيب وهي دي تبقي صلاه ,,؟؟؟؟؟؟

وياترى كام وقت من أوقات الصلاه عندنا بنعمله بالشكل ده ؟؟ ,,


و كامـ وقت بنبقي مركزين و خاشعين في الصلاه ؟؟


طيب ,, إيه أسباب عدمـ الخشوع في الصلاه ؟؟

الموضوع خطير وللأسف فيه كتير صلاتهم بتكون بالشكل ده ,, عايزين نناقش المشكله مع بعض ,,
منقوووووووووووووووووووووووول للافااااااااااااااااااااااااااااااااااادةةةةةةةةةةةةةةةة

فعلا يا فوءا قصة السرحان في الصلاة دي بتواجه اغلب الناس وانا فعلا عانيت منها بس الحمد لله بعد ما بحثت في النت وقريت لقيت الحل وطبعا قلنا عنه نبينا الكريم صلى الله عليه وسلم وهو انه نستعيذ بالله من الشيطان الرجيم ونتفل عن يسارنا ثلاثا ونحاول اننا نركز في الصلاة ونتدبر في الكلام اللي بنقوله ونعيش مع معناه والاهم اننا نعرف ان احنا بين ايدين ملك الكون ولا يعرف احد قد تكون لحظة صلاته هي لحظة موته فليتق الله ويركز في صلاته
وربنا يتقبل صلاتنا ويرزقنا فيها الخشوع

فعلا طرحك مميز يا فوءا بارك الله فيكي

عندك حق يا عاشقة في كل كلامك شكرا لدك الجميل ومناقشتك
شكرا لك دينا لمتابعتك وردك جزاكم الله كل خييييييييير ونورتو يا قمرات