هل انتى مرتبطه ؟؟؟؟؟؟

موضوع: هل انتى مرتبطه ؟؟؟؟؟؟ 2010-11-18, 8:55 pm

أيوة أيوة بكلمك انتى ماتبصيش يمين و شمال... ها.. مرتبطة؟...

شايفك مستغربة سؤالى... فى الحقيقة انا شفتك كاتبة على الفيسبوك

انك فى علاقة In a Relationship
يعنى مرتبطة بواحد مش كده؟

طبعا دى كلمة مش معناها و لا مخطوبة و لا متزوجة... لا فقط مرتبطة

للى مش عارف معنى الكلمة أحب أوضح أكتر..

كلمة مرتبطة معناها إن البنت ببساطة بتعرف شاب غالباُ بيكون فى السر و بيكون بينهم ما يسمى بعلاقة عاطفية
و ممكن يتقابلوا و يخرجوا كمان..اه عادى و ماله

و ايه المشكلة لما تتقابل بنت مع ولد و يخرجوا؟

إذا كانت مش عاملة حساب لربنا ..حتعمل حساب لأهلها؟؟
انا ليه شايفك منزعجة من كلامى؟ هو انا بقول حاجة غلط لا سامح الله؟

آآآه انتى مافهمتيش قصدى ايه لما قلت مش عاملة حساب لربنا صح؟
طيب أنا حوضحلك
هو انتى لما تقابلى أو تعرفى شاب فى السر من ورا أهلك ده يبقى حلال و لا حرام؟
مش عاوزة تردى عليا؟
تحبى أرد عليكى انا؟

حرد عليكى و لكن بكلام ربنا اللى شايفك و مضطلع على كل افعالك

بَعْضُكُمْ مِنْ بَعْضٍ فَانْكِحُوهُنَّ بِإِذْنِ أَهْلِهِنَّ وَآتُوهُنَّ أُجُورَهُنَّ بِالْمَعْرُوفِ مُحْصَنَاتٍ غَيْرَ مُسَافِحَاتٍ وَلَا مُتَّخِذَاتِ أَخْدَانٍ... (إلى أخر الآية فى سورة

النساء:25)..عرفتى الرد؟

المسافحات يعنى اللى بيرتكبوا فاحشة الزنا

و كلمة متخذات أخدان يعنى ليهم أخلاء (حبيب) فى السر.. يعنى بتعرف شاب فى السر ن ورا أهلها

يعنى ربنا قال على النساء المؤمنات انهم محصنات علشان مش بيعملوا سفاح و لا بيتخذوا أخدان..

عرفتى حجم الغلط بتاعك قد ايه؟

طيب انتى قريتى كلام ربنا فى الآية الكريمة

وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلًا ﴿الإسراء: ٣٢﴾

لاحظى هنا إن ربنا مثلاً لم يقل لا تزنوا... لا ده قال وَلَا تَقْرَبُوا الزِّنَا

ده يعنى ايه؟؟
يعنى نبعد عن الأسباب اللى تؤدى إلى الزنا علشان لا نقع فى الزنا

طيب يا ترى ايه الأسباب اللى تخالينا نقع فى الزنا؟؟

أفندم؟؟ انتى حتعملى نفسك مش عارفة؟

هو انتى بتعملى ايه زيادة عن اللى مكتوب؟

أيوة طبعا حضرتك لما بتكلمى شاب و بتعرفيه فى السر و بينكم ما يسمى بعلاقة عاطفية

مش بتخضعى فى القول ؟ يعنى بتتكلمى بدلع معاه... ما تنكريش و خالليكى صريحة مع نفسك
و لما يسمع صوتك و انتى بتدلعى بيطمع فيكى و زى ما ربنا قال

فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَعْرُوفًا

تعرفى يطمع فيكى يعنى ايه؟ يعنى شهوته تقوم عليكى لانك بتشجعيه على كده

طبعا كلامى نرفزك و بتقولى فى نفسك ايه الكلام ده و انت ازاى تكلمنى كده؟

إهدى بس شوية و اسمعينى لحد الآخر و ماتكابريش ..الجرح لما حد بيلمسه.. بيؤلم

لما بتخرجوا مع بعض مش بيحاول يمسك إيدك ؟

طبعا فى مناسبات كتير لكده..بيعديكى الشارع مثلا؟

هااا.. حصل مش كده؟

كل اللى بقوله ده و مش شايفة أى أسباب تدعو للزنا فى المستقبل؟

ده حتى الحكمة بتقول نظرة..فابتسامة..فموعد..فلقاء

مش ماسكة إيد و كلام بدلع؟؟!!

طيب تعالى بقة نجمع الكلام كده و نلخصه و نبص للصورة من بعيد

إنتى تعرفى شاب من ورا أهلك

بتكلميه بدلع و بيحصل بينكم كلام غرامى فى السر

بتخرجوا سوا و سعات بيمسك اديكى أو على الاقل بيلمسها

يا ترى عندك تعليق على الكلام ده؟

ربنا قال مُحْصَنَاتٍ غَيْرَ مُسَافِحَاتٍ وَلَا مُتَّخِذَاتِ أَخْدَانٍ

و انتى متخذة خليل فى السر

ربنا قال فَلَا تَخْضَعْنَ بِالْقَوْلِ

و انتى بتتكلمى معاه فى كلام غرامى من نوعية بحبك وحشتنى !!

دلوقتى بقة فهمتى لما انا قلت من شوية انك مش عاملة حساب لربنا؟
كان عندى حق مش كده؟

عارفة... الولد اللى تعرفيه ده لو كان فعلا ابن ناس و محترم و مؤدب و بيحبك

زى ما هو مالى دماغك كان عمل ايه؟

كان قالك إحنا لازم علاقتنا تكون فى النور

و ماينفعش نكون فى السر من ورا أهلك...انا لازم أخطبك
لكن طبعا هو مش فى دماغه كده..إذا كان قدر يوصلك و بيسمع الكلام اللى بيحبه

و ضحك و دلع يبقى ياخد خطوة رجالة ليه بقة؟

طيب أقولك على معلومة حتضايقك أوى ؟

الشاب اللى تعرفيه ده ما يرضاش ان أخته تعرف شاب فى السر زى ما بيعمل معاكى
عارفة ليه؟ لإن بالمعايير الواقعية أخته أغلى منك عنده
مهما قال و ضحك على عقلك بكلام معسول .. انما الواقع حاجة تانية
======================

شايف فى عنيكى سؤال بيقول بس إزاى حتجوز واحد من غير ما يكون بيننا حب؟

عاوزانى أرد عليكى؟

انتى تعرفى القاعدة اللى بتقول ما بنى على باطل فهو باطل؟

إنتى عندك علم إن أكتر من 70% من اللى بيدخلوا فى علاقة غير شرعية قبل الزواج (مرتطبين عاطفيا) بيحصل بينهم طلاق؟

من ضمن الإحصائيات الكتيرة فى الموضوع ده

فى أستاذ فى علم الإجتماع فى فرنسا إسمه الدكتور سول جور دون

عمل دراسة ميدانية و توصل إلى نتيجة صادمة

حوالى 85% من الزيجات اللى تمت عن طريق علاقات غرامية قبل الزواج انتهت بالطلاق !!

بينما لا تتجاوز تلك النسبة ( 5 % ) في الزيجات التقليدية التي تعتمد على العقل

والتريث ولا تستند الى الإندفاع العاطفي فتنهار عند أول منعطف ..سبحان الله

دى نتيجة بحث من متخصصين فى مجال علم الإجتماع

يعنى بإختصار شديد انتى بتعملى غلط بيغضب عليكى رب السموات و الأرض

و علاقتك دى ربنا لا يبارك فيها

بل غالباً ما سوف تنتهى بفشل ذريع و مؤلم و لو مش مصدقانى افتحى عنيكى كويس

و شوفى الناس و اعرفى اخبارهم حتسمعى قصص كتييرة أوى غرام و حب و كلام من ده و فى النهاية

نكد و قرف و خناق و طلاق فى سنوات الزواج الأولى (فى خلال 5 سنوات) عادةً

تعرفى ليه؟؟... لسببين

أولاً.. لإن ربنا لا يبارك فى علاقة غير شرعية و يكون الجزاء من جنس العمل

ثانياً .. علاقات ما قبل الزواج تكون مبنية على أقنعة كاذبة و ردود أفعال معظمها مصطنع غير صادقة

شخصية الطرفان مهما كانت درجة العلاقة و بينخدع

الطرفين و بيعتقد إن دى الشخصية الحقيقة و بيفتكر انه يعرف كل عيوب الطرف التانى

و لإنك مش عايشة معاه و لا تعرفى حاجة عن عيوبه إلا اللى ظاهر منها..و ما خفى كان أعظم

و طبعا بيحصل الصدمة فى الزواج بعدها لان العِشرة بتبين

اللى دايما كان بيبقى مستخبى عنك فى الشارع أو الكافيه اللى كنتوا بتتقابلوا فيه.

لإنه مش بيظهر ليكى غير اللى هو عاوزك تشوفيه او تعرفيه عنه

يقول د. سول : إن الإندفاع العاطفي يعمي عن رؤية العيوب ومواجهتها ويوهم الشاب والفتاة أن الحب يصنع المعجزات بينما يعمل الطرفان في الزواج

التقليدي على انجاح ارتباطهما ويعرفان أن الزواج مسؤولية وأعباء وتسامح وتنازل ،

في الوقت الذي يعتقد العاشقان أن الزواج رحلة حب لا نهائية تخلو من المشاكل

==================================================

لو بتحبى ربنا اقطعى علاقتك بالشاب ده و استغفرى لذنبك و ربنا غفور رحيم

و الشاب ده لو محترم بجد حيخبط على بابك و يخطبك زى الرجالة من أهلك..

أنا بقول الكلام ده لإنك غالية ..و شايفك مش حاسة بقيمتك لإنك لو حاسة فعلا بقيمتك

كنتى قولتى لنفسك أنا جوهرة غالية ماحدش يقدر يقرب منها

إلا راجل واحد بس يستاهلها.. زوجى.

و افتكرى كلام ربنا

يَا أَيُّهَا الَّذِينَ آمَنُوا لَا تَتَّبِعُوا خُطُوَاتِ الشَّيْطَانِ وَمَنْ يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنْكَرِ

ما تنزعجيش من كلامى بس فعلا انتى كنتى محتاجة اللى يفوقك من اللى انتى فيه

واحد يكون كلامه مباشر من غير دبلوماسية و مجاملة

و ربنا يهديكى و يهدينا جميعاً إن شاء الله

موضوع: رد: هل انتى مرتبطه ؟؟؟؟؟؟ 2010-11-18, 9:18 pm

السلام عليكم ورحمة الله وبركاته
اولا انا بشكرك على التوبيك الاكثرمن رائع دا
انتِ ناقشتى الموضوع من زاوية اللى بيحصل بين الشاب
والفتاه ماشى تمام
وعلشان اكون واضح من البدايه انا موش مع انو شاب يعرف بنت
ويغنى عليها ويستغل ضعفها
لكن مفكرتيش ايه اللى خلانا نشوف اللى بيحصل دا
ومكنش موجود من 100 سنه مثلا
انا اعتقد انا دا موش ضعف ايمان من الشاب او الفتاه
وان كان النوعيه موجوده من الطرفين
لكن الموضوع له اسباب تانيه اجتماعيه واقتصاديه
ونفسيه وحاجات تانيه
واعداد الشباب والفتيات اللى عدا سنه الزواج بالنسبه لهم
وانا قولت دا ميسمحش لهم بعمل شئ محرم
انت عارفه الرقم كام او بيتراوح بين كام
المشكله هى اننا بنفرغ كبت وبنهرب من تركة
هموم ابائنا ورثهالنا اما احنا اصلا موش عاوزين نعمل
حاجه مبنفكرش علشان نطلع من الوضع العام
يبقى لازم نتغير والتغيير هيجي ازاى
ومنين هتبدأ وامتى كمان مشاكل العولمه
وعصر السماء المفتوحه من غير سيطره
وحكومات بتغيب العقول علشان تفضل بعيد عن التقدم
وحل مشاكلها
سلام عليكم

موضوع: رد: هل انتى مرتبطه ؟؟؟؟؟؟ 2010-11-19, 3:52 am

طيب كويس
هل انتى مرتبطه ؟؟؟؟؟؟ 47760

موضوع: رد: هل انتى مرتبطه ؟؟؟؟؟؟ 2010-11-19, 4:59 am

توبيك اكتر من رااائع بجد احيكي بشده
وانا اتفق معكي تمااما
وايضااا للموضوع ابعاد اخري

موضوع: رد: هل انتى مرتبطه ؟؟؟؟؟؟ 2010-11-19, 7:36 am

طبعا انا معاك تأخر سن الزواج دى مشكله كبيره ولكن ممكن تعملها موضوع ونتناقش فيه لاء مشاكلها والنتائج بتاعتها كتيره
لكن انا حاليا اتكلم عن الصح والغلط ........لان حتى ولو تأخر سن الزواج زى ما انت قولت ده مش حيله اننا نعمل الغلط (محدش هيأخد غير نصيبه)
انا معاك فى كلاامك لكن عايزين نقاش اكتر فى الموضوع ده

مرسى على مرورك يا مروه .......
مرسى ليكى يا دعاء ويا رب يكون نال اعجابك

موضوع: رد: هل انتى مرتبطه ؟؟؟؟؟؟ 2010-11-19, 1:35 pm

بجد احييك يا هدي للموضوع الرائع ده
انتي في الموضوع ده قلتي بالظبط ايه اللي بيحصل بين الشباب والبنات اليومين دول
ولعلمك مسك ولمس الايد في الوقت ده حاجه هينه
والله ده غضب من ربنا علينا اللي بيحصل
واللي احنا فيه من فساد واستغلال وغش كل مننا احنا
زي ما ربنا قال
(ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ)

وربنا يتولانا برحمته
بجد تسلمي يا هدي

موضوع: رد: هل انتى مرتبطه ؟؟؟؟؟؟ 2010-11-19, 3:02 pm

موضوع روووووووووووووووووووووووووووووعة
بجد جامد جدااااااااااااااااااااااااااااااااااااا
تسلم ايدك
جزاكى الله خيرا

موضوع: رد: هل انتى مرتبطه ؟؟؟؟؟؟ 2010-11-20, 3:08 am

مرسى يا محمد ربنا يخليك ومعاك وعايزه ااقول (ان الله لا يغير ما بقوم حتى يغيروا ما بأنفسهم) وشكرا على مرورك

ربنا يخليكى يا لؤلؤه ةجزاكى الله خيرا

موضوع: رد: هل انتى مرتبطه ؟؟؟؟؟؟ 2010-11-24, 2:04 pm

مفيش احلى من كدا كلام

بارك الله فيكى بجد انتى تعتبرى خير قدوة تقتدى بيها اى بنت

تسلمى على الموضوع الرائع ده بجد

اللهم احفظ بنات المسلمين واحفظ فروجهن