رجل يوصي ولده بثلاث وصايا قبل وفاته (لا تفوتكم جنان )

رجل يوصي ولده بثلاث وصايا قبل وفاته (لا تفوتكم جنان )

هذي السالفة تدور حول رجل شايب صاحب مال

وجاه وله ولد وحيد ويوم اقتربت وفاته وعلى فراش الموت نادى ولده

وقال ياوليدي بوصيك بثلاث وصايا ابيك تحفظها وتعمل بها .

قال ولده:ابشر يابوي

قال الأبو:الوصيه الاولى :ابن لك بيت في كل ديرة

والوصيه الثانية :ام البنتي وام الكنتي وام المسمار الي ينتي لا تتزوجها

والوصيه الثالثة :لاتخون من آمنك لو كان خاين

وإذا ضاقت عليك السنين وحتجت شي عليك بصحيبي فلان في الديرة الفلانية

قله انا ولد هاك الرجال وإن شاء لله مايقصر معك.

بعد هذي الوصايا الثلاث توفى الأبو واحتار الولد في وصايا ابوه .

راح الولد وبنى له بيت في الشمال والجنوب والشرق والغرب

المهم سوى مثل ماقال له ابوه وبنى بيت في كل ديرة.

بعد كم شهر نوى الولد الزواج وكان في الديرة عجيز ولها بنت مزيونة

مطلقة ولها ولد من زوجها الاول ويوم سمعت انه يبي الزواج جته

وقامت تمدح في بنتها له وعن زينها لين اقنعته بالزواج من بنتها

وفي النهاية تزوج الولد بنت العجيز المطلقة .

وبعد كم سنه قالت العجيز لبنتها يابنتي افطني في العلم إلي اقوله لكِ

انا مازوجتك الرجل هذا إلا طمع في ماله وابيكِ تتسلطين عليه وتحفضين كل ماله لولدك

كل ماجاب مال من تجارتة تاخذينها منه و تحفضينها لولدك

يابنتي لا تنسين ولدك

قالت البنت ابشري يمه.

مرت السنين وكل ماجاب الولد مال وربح من تجارته اخذتها زوجته

وحجتها انها تبي تحفظ ماله وسوت الزوجة خزانة في ركن المجلس و بنت عليها

تكنز فيها الاموال وهو مايعرف عن الخزانة شي .

مرت السنين والولد احواله المالية صارت تعبانة

وراح وباع بيته الى في الشمال ويوم جاب فلوس البيت اخذته منه زوجته

مثل العادة وتكنزه في الخزانة وتعطي زوجها قدر يسير من المال يتصرف فيه .

انتهت السنة ورجع الوضع على ماكان راح الولد وباع بيته الى في الجنوب

وعلى هذي الحال لين باع كل مايملك من بيوت وزوجته تاخذ منة وتكنز

في هالخزانة وكل ماسألها زوجها وين المال الى اعطيتك اياه تعذرت انها

صرفته في لاوازم البيت .

مرت السنة وطلع الولد ماعنده مايملك شي من مال وتذكر وصية ابوه

يوم يقول إذا احتجت شي وضاقت عليك الدنيا عليك بصحيبي فلان.

ويوم من الايام بلغ الولد زوجته وقال لها انا مسافر ادور رزق الله

شد على مطيته وحط زهابه عليها وسافر لديرة صحيب ابوه.

ويوم وصل ديرة صحيب ابوه قلط عنده

وقال انا ولد هاك الرجال وابوي يطلبك الحل توفى

وقبل وفاته وصاني بثلاث وصايا.

الاولى :قال لي ابن لك بيت في كل ديرة

والثانية :ام البنتي وام الكنتي وام المسمار إلي ينتي لا تتزوجها

والثالثة:لا تخون من آمنك لو كان خاين

وسويت مثل ماقال لي ابوي بنيت لي بيت في كل ديرة وتزوجت حرمة مطلقة

ولها ولد وبعد زواجي منها تغيرت احولي المادية وصرت بعد كم سنة ماملك

شي وجيتك انا ومالي إلا الله ثم أنت
قال صحيب ابوه:

هلا فيك وحياك الله والله يرحم ابوك عزالله نعم الصاحب

لكن وش لي إذا رديت مالك لك

قال الولد: والله لصير ولد لك طول حياتي

قام صحيب ابوه ونادى بناته الخمس

وقال للولد اختر من هن وحدة زوجه لك اختار الولد وحدة منهن .

قال صحيب ابوه:

اللهم إني وهبتها لك ( كلمة كانت تقوم مكان عقد النكاح )

وقال له ابيك تحفظ إلي بقوله لك

ابيك ترجع لديرتك انت وزوجتك واذا سألتك زوجتك وش جبت من سفرتك

من مال قل لها ماجبت إلا هذي العبدة الخادمة الصماء البكماء.

وأنتي يابنتي

قالت بنته:سم يبه

روحى واضربي جسدك بالفحم لين يصير لونه اسود وابيك إذا وصلتم بيت

زوجك لا تتكلمين ولا كلمة على إنك صماء بكماء وابيكِ تسمعين وش تقول

زوجة زوجك من كلام في غيابه وتخبرين بها زوجك اذا رجع.

قالت البنت :ابشر يبه.

قال صحيب ابوه:

وأنت ياولدي امانة الله وامانتك لا تكشف ستر بنتي
( المقصود بة الجماع ) لين ترجعون

قال الولد :ابشر ياعمي
سافر الولد هو زوجته يم ديرته ويوم وصل بيته قابلته زوجته

وقالت له:بشرعساك في طرقتك جبت لنا مال

قال الولد: لا والله ماجبت من عند صحيب ابوي الا هذي العبدة الصماء البكماء

ابيها تخدم لنا

قالت زوجتة:وحنى عندنا شي ناكله عشان نصرف على هذي الخادمة

قال الولد:الشكوة لله هذا الي حصلته في طرقتي ( رحلته)

المهم صارت الخادمة كل شي تقوله زوجة عمها من كلام لمها تخبر به عمها إلي هو في الاصل زوجها .

ويوم من الايام جت العجيز ام زوجت الولد لبنتها

وقالت لها يابنيتى المال كله انتي كانزته في الخزانه إلي في ركن المجلس

لولدك ورجلك مايملك شي ولا نستفيد منه شي

ابيكِ تطلبين الطلاق منه عسى إنه يطلقكِ وتقولي له انت ماتملك شي يالفقير تصرف علينا

وإذا طلقكِ،،،، زوجتك زوجك الاول صار ميسور الحال

والخادمة جالسة جنبهم تسمع وش يقولون.

المهم يوم جا تالي الليل راحت الخدامة يم عمها( زوجها) وقالت له

كل السالفة

قال الحين عرفت وين ضاع كل مالي
يوم اصبح الصبح جت زوجته يمه تشتكي الحالة والفقر

وتطلب منه الطلاق

قال لها زوجها ماعندي إلا ابيع البيت واليوم العصر ابجيب الدلال

وابيع البيت

راحت الزوجة وبلغت امها العجيز

وقالت لها يايمه زوجي يبي يبيع البيت والبيت كانزه المال فيه لولدي تصرفي لا يفوتكم البيت

قالت امها: ابشري ابروح يم زوجك الاول اخليه يحضر المزاد على البيت

عشان يشتريه

راحت العجيز يم زوج بنتها الاول

وقالت له: يابو فلان زوج بنتي يبي يبيع البيت والبيت بنتي كانزه المال فيه

لولدك لا يفوتك البيت زود فيه لين تشتريه تكفى يابو فلان

قال : ابزود في البيت لين اشتريه

المهم يوم جا العصر وحضر الدلال يبيع البيت حضر الولد وتجار الديرة

وحضر زوج بنت العجيز الاول

بدا المزاد وكل مازودا تجار الديرة زود عليهم زوج بنت العجيز الاول

لين وقف البيت علية وشراه

قال الولد :عندي شرط وهو ماسلمه البيت إلا بعد ثلاث ايام لين احصل بيت ثاني

اسكن فيه

قال المشتري( زوج زوجتة الاول) :مايخالف .

رجع الولد للبيت وطلق زوجته وطردها يم بيت امها

وراح ودخل المجلس وكسر ركن المجلس ويوم كسره

حصل الجنيهات والفلوس والذهب مكنوز فيه

قال لزوجتة( الخادمة) :عطينى خيشة اشيل فيها المال

قالت زوجته:ابشر

المهم اخذ الولد المال كله إلي في الخزانة وحمل الولد على المطية

وشال المال عليها وقفل البيت وراح يم الدلال

وقال يافلان خذ مفاتيح البيت عطها المشتري وأنا ترى لقيت بيت في جنوب

الديرة

وسرى الولد هو وزوجته من الديرة متوجهين يم عمه

يوم جا الصبح ودخل المشتري( زوج بنت العجيز الاول) هو والعجيز وبنتها

وولدها البيت حصلوا المال إلي فيه كله ماخوذ وصاحب البيت مايدرون

وين راح اختفى من الديرة.

المهم يوم مشو الولد وزوجته حوالى ثلاث ايام بلياليها ومروا غدير مليان ماء

نزل الولد عن مطيته وبركها وقام وشب ناره وسوا قهوته وراحت زوجته

يم الغدير وتسبحت فيه ونظفت ماعليها من فحم وصارت مثل قمر اربع طعش

وجت تمشي لين جلست عند زوجها.

وقالت له:

انا زوجتك رحت معك وجيت وماعطيتنى حق من حقوقي عليك

قال زوجها يابنت الحلال ابوكِ قال لي امانة الله ثم امانتك لا تكشف سترها

من يوم تروح لين ترجع.

قالت له: والله اذا ماتعطيني هذا الحق إني ماأعيش معك طول حياتي

قال زوجها: الشكوة لله

المهم يوم وصلوا ديرة عمه

قال عمه: من طول الغيبات جاب الغنايم

قال الولد: ابشر ياعمي بالغنايم والمال والحلال كله

قال عمه: بشر عساك ماكشفت ستر زوجتك

قال الولد: لاولله ياعم هي إلي غصبتني على نفسها امس

قال عمه: ياخاين الامانة قم ياصبى دخل يده مع فتحة الجدار هذا

ورح من الجهة الثانية واقطع يده

يوم دخل الولد يده مع فتحة الجدار جت زوجته وطلعت يد زوجها ودخلت يدها

مكان يده

وقالت: يابوي لو قطعت يده كيف تبيه يأكلني ويصرف علي.

قال ابوها: شفت ياولدي أنت مامسكت من وصايا ابوك شي

يوم يقول: ابن لك بيت في كل ديرة

قصدة معرفة الرجال تعرف على الرجال الطيبة في كل ديرة تحتاجهم

ويوم يقول:

ام البنتي وام الكنتي وام المسمار إلي ينتي لاتزوجها

قصدة لاتزوج إلي لها بنت من زوجها الاول وكل شوي رايحه يم بنتها تمشط شعرها

او تتفقد احوالها

ولا تزوج ام الكنتي الي تزوجت واحد قبلك وكل شوي تعايرك وتقول لك

لو كنت مثل فلان كان يسوي كذا وكذا

وام المسمار الي يانتي لاتتزوج إلي لها ولد وكل حلالك تحفظه لولدها

عليك بالبكر إلي قلبها على قلبلك وانت شفت بنتي وش سوت لجلك

اما قول ابوك:

لا تخون من أمنك لو كان خاين

وانت خنتني يوم قلت لك لا تكشف ستر بنتي
لكن تراك مسامح ياولدي مدام حلالك رجع لك وإن شاء لله تكون استفدت

أن شاء الله تكون القصه عجبتكم
منقول

» رجل يوصي ولده بثلاث وصايا قبل وفاته (لا تفوتكم جنان )
» معاني جميلة جدا لا تفوتكم !
» قصة طلاق فريدة من نوعها .... لا تفوتكم

رجل يوصي ولده بثلاث وصايا قبل وفاته (لا تفوتكم جنان )

رجل يوصي ولده بثلاث وصايا قبل وفاته (لا تفوتكم جنان )

مواضيع مماثلة

مواضيع مماثلة