شبكة فضة وإزاز.. ولا تقعدي من غير جواز

غمضي عينيكِ واحلمي معانا كده..

أيوه.. هو ده اليوم اللي هتموووتي وتعيشيه.. أيوه دي اللحظة اللي العريس قاعد فيها في الصالون مع بابا،وبيتفقوا على المهر والشبكة والذي منه.. وكلها كام يوم وتنزلي تشتري شبكتك.

بس تعالي كده نعترف بحاجة بسيطة.. إنك برغم كل فرحتك دي بإنك هتطيري أخيراًعلى بيت العدل، حاطة إيدك على قلبك وخايفة من الاتفاق على الماديات، أحسن الجوازة هي اللي تطير مش إنتِ..

سامعة عريسك بيحاول يوصل لباباكي بخجل كده إن ظروفه ماتسمحش يجيب شبكة بالمبلغ اللي باباكي عايزه.. أخخخ!! اللي كنتِ خايفة منه حصل.. وربنايسترررر..

الشبكة.. تأمين مستقبل ولا فشخرة كدابة؟
دلوقتي تعالي معانا كده، وإنتَ برضه تعال معانا؛ بما إن حضرتَك اللي هتكع ثمن الشبكة.. تعالوا نشوف سوا يا ترى الشبكة دي الهدف منها إيه أساساً؟ هل هيتأمين لمستقبل العروسة في عين الأهل؟ ولا هي مجرد تظاهر وتفاخر قدامالقرايب والمعازيم؟بنات وشباب كتير شايفين الشبكة دي مجرد حاجة للتفاخر والتظاهر بالمستوى العالي والغنى قدام الناس والمعازيم في الفرح أو الخطوبة؛ بدليل إن ناس كتير بتضطر تبيعها قبل ما تتجوز أصلاً عشان تجيب باقي العفش!

في نفس الوقت بعض الفتيات والولاد قالوا إن الشبكة مش تفاخر، لكن هي تأمين لمستقبل البنت والبيت كله؛ لأن بمجرد ما يحصل ظرف مادي بتبقى الشبكة هي المنقذ.

لكن كان فيه آراء لبنات بتقول إن الشبكة دي تقدير للبنت، وإن لازم العريس يدفع دم قلبه قبل ما ياخد البنت عشان يحطها في عينيه.

وتفرد رأي أحد الشباب محذراً إن اليومين دول بقوا بيلعبوا بالبنات كتير،والشاب منهم يدخل البيت ويخطب البنت بدبلتين، واسمه بقى مرتبط بيها رسمي،ويعمل معاها اللي هو عايزه، وبعدين يخلع! علشان كده الشبكة حاجة أساسية؛لأنه لما يدفع هيخاف على الفلوس اللي دفعها، وهيحافظ على الارتباط ده ويبقى جاد فيه.

الشبكة فضة أو صيني علشان تمشي الجوازة يا عيني

وبعد ما لقينا الإصرار على وجود الشبكة هو الغالب على إجابات الشباب، تعالوا نشوف حل في موضوع الشبكة ده.. نحاول نسهلها شوية.

لو مافيش في مقدرة عريسك يجيب شبكة من إياها.. ترضي تكون شبكتك طاقم فضة من باب التيسير على العريس والاقتصاد في المصاريف؟ ولا تجيبي طاقم ده بصيني ماحدش يقدر يفرقه عن الدهب الحقيقي؟ وأهو تبقي عملتي الشو اللي نِفسك فيه في الفرح أو الخطوبة، وفرجتي كل المعازيم على شبكتك "الدهب"؟!

الغالبية العظمى من البنات مش موافقة على الفضة، ومنهم اللي شايفة إن الشبكة ممكن تبقى فلوس، وممكن تبقى جنيهات دهب عشان دي قيمتها ثابتة فيها،ومافيش في تمنها المصنعية اللي بتغلي الدهب العادي.. ومنهم اللي قالت إنها ممكن هي وأهلها يساعدوا العريس ويجيبوا شبكة كويسة، عشان تظهر بالشكل اللائق.

بعض البنات قالوا إن الشبكة الفضة حل كويس جداً ويرضي جميع الأطراف..وقالت إحداهن وهي متحمسة جدا: جاء الوقت عشان المجتمع يغير فكره وعاداته البالية، إيه المانع إننا نتطور مع تطور العالم والظروف الاقتصادية؟ فيحين بررت فتاة أخرى حماسها للفضة بأن الشبكة هي أصلاً هدية تحتفظ بيها الزوجة من زوجها لآخر العمر؛ فإيه الفايدة إني أبيعها مع أول ظرف ما سيئ؟ لكن الشبكة الفضة مش هتقدر تبيعها؛ لأنها عارفة إنها مش هتجيب فلوس،وبالطريقة دي هيتحقق مفهوم الشبكة.

بالنسبة للدهب الصيني بقى؛ فالأكتر من البنات والشباب كمان شايفين إنه فلوس مرمية في الأرض وحرام.. وفيه ناس شافت إنه زيف وخداع للناس، ومبالغة في التظاهر.

ولكن بعض الشباب قالوا: إن مافيش مانع من شبكة الدهب الصيني؛ خصوصاً إن شكله قريب جداً من الدهب العادي، وتقريباً ماحدش يقدر يفرقهم، وأضاف أحدهم: لو عروستي كانت عايزة كده هاعمله وأنا مجبر.

وشاب آخر قال إن ممكن الدهب الصيني يكون من باب التيسير على العريس، وفي نفس الوقت العروسة ماتكسرش خاطر مامتها وقرايبها اللي نفسهم في شبكة دهب لبنتهم، والرسول صلى الله عليه وسلم قال لواحد رايح يتجوز: "التمس ولو خاتمًا من حديد"؛ فبهذا وفق بين عادات وتقاليد المجتمع وبين الحالة المادية للخاطب.

ودلوقتي بعد ما قرينا كل الآراء المختلفة دي.. إيه رأيك إنت؟ وإيه رأيك إنتِ؟

شايفين الشبكة دي تقدير للبنت فعلاً ولا مجرد منظَرة قدام الناس؟

ممكن تقبلي.. وإنتَ ممكن تقبل عريس بنتك أو أختك يجيب لها شبكة فضة أو دهب صيني؟

مرسي علي التوبيك

هي بتكون حسب ظروف الموقف

ميرسى لمرورك يا clever اسعدنى جدا

والله الظروف الايام دى بقت صعبة جدا ولو كل اب وام
اتزمدوا وصمموا ع الشبكة اللى بمبالغ كبيرة دى محدش
حيتجوز خالص ومن المفروض يكون فى شوية رحمة يعنى
يعنى لو مكانش فى مقدرة الى انه يجيب الذهب ممكن يكون بديل
وباتفاق كل الاطراف وع حسب الظروف يعنى ايه المشكلة
لو شبكة فضة هو الفضة مش وحش ولا حاجة واظن دى حاجة
بتبقى خاصة بالعريس والعروسة والاهل الناس ملهاش دخل بيهم
فلو حكمت الظروف انه تكون شبكة فضة او دهب صينى اى المشكلة
مدام هو ابدى النية فى انه يجيب حاجة يبقى طبعا خلاص وممكن تتعوض
مرة تانية لما الظروف تتحسن
موضوع مهم اوى بجد ياجوجو تسلمى ياجميل

ههههههههههههههههههههههههههه

الله عليكى ياجوجو والله انتى شكلك بنت ديموقراطية جدا جدا

انا عن نفسى ممكن استغنى عن الشبكة خاااااااااالص فى سبيل انى ارتاح مع الانسان

اللى بحبه هههههههههههههه

تسلمى ياست المصلحة ربنا يخليكى للشباب ياحلالة العقد

ههههههههههههههههههههههههههه كده يا مشمشه
اصلهم ياعينى غلابا هههههههههه

السلام عليكم ورحمة الله وبركاته

انا عاوز اعرف حاجه الموضوع دا خرب كام بيت
وافشل كام جوازه انا مبرفضش الموضوع لكن
بصراحه دي حاجه تضايق تلقى ام العروسه بالذات هى
اللى مصممه وتقلب البيت على اللى فيه ازاى البنت تتجوز من غير
شبكه طب ما بنت عمها وينت خالتها وبنت وبنت
والله حرام حرام اللى بيحصل دا شوفوا معدل العنوسه بين
الشباب والفتيات والله حرام
وكل اللى يعمل حاجه زى كدا ويفرق اتنين هيعملوا اسره
مسلمه تجيب ذريه توحد الله وتعرف سنة رسوله صلى الله
عليه وسلم اقول لهم اتقوا الله واحذرو
لأنه يجوز رفض انسان ملتزم متدين يعرف الله ورسوله
صلى الله عليه وسلم
قال صلى الله عليه وسلم: " إذا جاءكم من ترضون دينه وخلقه
فزوجوه إلا تفعلوه تكن فتنة في الأرض وفساد كبير "
رواه الترمذي وغيره.

تسلمى بجد موضوع رائع

اقولك انا بقى ياستى

والله العظيم راضيه بدبله بلستك ههههههههههههههههههههههه بس اهم حاجه يكون محترم وابن ناس وشرينى
بجد والله هوه طبعا مينفعش بلستك بس عادى لو دبله دهب مش لازم اتفشخر ادام الناس بكزى حاجه يعنى اى حاجه تقوم بالواجب وخلاص
وبعدين مالو الفضه فعلا شيك ولزيز ومش ههيتباع وبعدين نازل منو الايطالى دلوقتى تحفه هههههههههههههههههههههه يجنن بجد
وانا مش مع الدهب الصينى ده بحس انو فشخره فارغه ايه لزمتو حتى والله قله الدهب شياكه دلوتى وكترو فلح

وبعدين خدوهم فقراء يغنيكم الله منتو شيفين ظروف الشباب اليومين دول عامله ازاى
نداء اللى كل اب وام بيمسكو فى الحاجات دى هههههههههههه
ارحمو علشان ربنا يرحمكم
وبعد كده تيجى تقول ده مطلع عين بنتى مهو ملى عملتو فيه يامعلم هههههههههههههههه

بجد موضوع جميل اوى ياجوجو ومفيد ياريت الكل يدخل يشارك

تسلم يا احمد بمرورك وفعلا انا معاك فكل كلمة قولتها وربنا يسترها على بناتنا وشبابنا
وتسلمى يا ايمى وانا معاكى فكلامك برضو بس انا هجبلك الواد عتريس المكنيكى الا تحتنا بالدبله البلاستيك هههههههههههههههههههههههههههههههههههههههه وربنا يقدم الا فيه الخير بقى

ههههههههههههههههههههههههه ينهار ابيض اصوم اصوم وافطر على عتريس الميكانيكى
اوك موفقه ياستى كفايه انو تحتيكو ههههههههه بس عوزه الدبله دهب صينى لو سمحتى

احمد مرعى كتب:: السلام عليكم ورحمة الله وبركاته

انا عاوز اعرف حاجه الموضوع دا خرب كام بيت
وافشل كام جوازه انا مبرفضش الموضوع لكن
بصراحه دي حاجه تضايق تلقى ام العروسه بالذات هى
اللى مصممه وتقلب البيت على اللى فيه ازاى البنت تتجوز من غير
شبكه طب ما بنت عمها وينت خالتها وبنت وبنت
والله حرام حرام اللى بيحصل دا شوفوا معدل العنوسه بين
الشباب والفتيات والله حرام
وكل اللى يعمل حاجه زى كدا ويفرق اتنين هيعملوا اسره
مسلمه تجيب ذريه توحد الله وتعرف سنة رسوله صلى الله
عليه وسلم اقول لهم اتقوا الله واحذرو
لأنه يجوز رفض انسان ملتزم متدين يعرف الله ورسوله
صلى الله عليه وسلم
قال صلى الله عليه وسلم: " إذا جاءكم من ترضون دينه وخلقه
فزوجوه إلا تفعلوه تكن فتنة في الأرض وفساد كبير "
رواه الترمذي وغيره.

تسلمى بجد موضوع رائع

ترجعيلنا بالسلامه ان شاء الله
refresh

» جواز عتريس من غير النيش باااااااااااطل
» بعد 60 سنه جواز تكشف له عن السر هههههههههههههه وهى تصارع الموت
» ميكانيكى راح يتجوز شوفو خد شبكة اية

شبكة فضة وإزاز.. ولا تقعدي من غير جواز

شبكة فضة وإزاز.. ولا تقعدي من غير جواز

مواضيع مماثلة

مواضيع مماثلة