فى اخت سالتنى هو انتا ابن مصر بصراحه الكلمه ضيقتنى جدا
ممكن الظروف ما سمحتلى انى اعيش حياتى كلها فى مصر
مولدى كان خارج مصرممكن سنوات قليله الا عشتها فى مصر
وانكتب عليها تانى انى اسافر واتغرب فى بلاد كتير خارج مصر
لكن كل ما كنت بروح بلد كان استحاله القى مكان زى مصر
برغم الظروف الا بتمر بيه لكن انا بعشق تراب مصر
فى مثل مصر جميل بيقول
ما تعرفش قيمه امك الا لم تشوف مرات ابوك
ودة فعلا الا انا بحس بيه فى كل بلد بزورها خارج مصر
مصر مش جميله بتاريخها ولا حضارتها ولا بالجمال الطبيعه الا ربنا رزقها بيها
لكن جميله بشى تانى وهما شعبها ودة شى ممكن يحس بيه اى انسان فى الجامعه فى الشارع على القهوة
اما بالنسبه ليه فا مصر تمثل ليه اشياء كتير
حبيت اشاركم احساسى اتجاة مصر
وليه انا فعلا بحمد ربنا انى ابن مصر

اكثر شعب أثار فضولي
هو الشعب المصري

تحس كده انه شعب طيب جداا

شعب يبضحك .. ابن نكتة زي ما بنقول

حتى في المصايب بيضحك

ممكن تلاقي اكتر من ألف نكتة جديدة في اليوم بتتقال

متعة الشعب ده كتيييييرة جدااا

بس بجد احلى حاجه تلاقيها فيه

ان كلنا بنحب بعض وبنخاف على بعض

حلاوتنا ان اي حاجه بتحصل في الدنيا تلاقينا على طول بنتكلم فيها

بالذات الرجالة الكبار اللي طالعين على المعاش وهما قاعدين على القهوة

ناس تسمع منهم حكمة بتدل على سنين عاشها في تعب

علشان يجوز ابنه او بنته

تلاقيه بيرجع بيته يلاقي زوجة بتعمل الاكل

وتحكيله على كل اللي حصل طول اليوم

الراجل اخر الشهر بيرجع زعلان ومخنوق علشان مادخلش البيت ومعاه حاجه لولاده

واول الشهر ده عيدهم .

تلاقيهم بيتكلموا في الدين والعلوم وحتى الكورة..

وممكن كمان تلاقي الواحد راجع من بيته ونازل يقعد قعده جميلة مع صحابه اللي من ايام السبعينات

ويقعدوا يضحكوا مع بعض.. اللي يقول نكته .. واللي يتكلم في السياسة .. واللي واللي واللي.

احنا شعب دمنا حر .. حر جدا كمان

اجدع ناس ممكن تلاقيها بتشارك في القضايا المعاصرة

وتعمل مظاهرات .. ناس بتحب الحركة

مش بتحب تقف واقفة وحاطة ايدها على خدها

اجمل حاجه في مصر

تلاقي راجل غلبان بيبيع عيش

واقف جنب محل ودكان كبييير وفخم

تلاقي المدير.. صاحب الميكانيكي

تلاقي المسلم.. بيصاحب المسيحي

عندنا وحدة وطنية جميلة جدااا

الغلبان مش بيسال حد

ولو سال تلاقي وشه في الارض من كتر الكسوف

باختصار همنا على بعضنا

ويا سلام على ولاد الحارة الواحدة

رجالة بحق وحقيق ناس بتجيب عيشها بعرق جبينها

مش مهم المرتب صغير

المهم انه بينام وهوا راضي عن نفسه.

وعلى فكرة احنا برضة ناس بتتنرفز بسرعة شوية

بس مش على الفاضي والمليان

وناس خدومة بطريقة جميلة

يعني اللي يزور مصر .. باختصار البيت بيته

مش هضحك عليكم في ناس بتحب تعيش حياتها على ظهر ناس تانية بالنصب او او او

بس لو دخلنا جوا قلب الناس دي هتلاقي كمية من الحنان مدفونة.

عندنا تاريخ .. وحضارة .. واساطير

عندنا الاهرامات .. وابو الهول .. والنيل

النيل ده بقى حكاية لوحده

أطيب قلب في العالم هو قلب النيل

مجمع طبقات المجتمع المختلفة في مكان واحد

جوا قلبه

تلاقي الراجل الغلبان بيصطاد سمك .. ومن جنبه تلاقي مركب كبير فيها سياح

على جنبه اليمين تلاقي المساكن الشعبية

على جنبه الشمال تلاقي الفنادق والعمارات العالية

بس ارجع مرة واحدة كده وبص معايا بتركيز شوية

هتلاقي ان الاتنين بيبوصوا على النيل

مش قلتلكم النيل مجمع كل شعب مصر

أطيب ناس عندنا .. النوبة

ناس طيبين بجد وتلاقي عندهم الدين بحق

ناس غلابة جدااا بس أغنياء

غناهم طيبة قلبهم... وهما عارفين كده كويس

عندنا الأزهر .. ولما أقول الأزهر يبقى دين بجد

يبقى ناس بتخاف من ربنا ومش بتخاف من حد

عندا مسجد الحسن والحسين والسيدة زينب

بس المشكلة اننا ماشين تبع عرف او تقليد من زماااان قوي

وده في حد ذاته مش جهل ..

شعب مصر .. مطلع علماء كتييير واسألوا التاريخ

علماء كانت بتذاكر على الشموع والمصابيح

اهلها كانوا ناس طيبين جداا وغلابة

بس بصوا الناس دي طلعت مين

طه حسين .. محفوظ .. طهطاوي .. شعراوي .. زويل

ناس بتحب بلدها بجد

الشباب بقى دول حكاية تانية خاااالص

الولد ممكن يقول انا مش عايز اقعد في مصر علشان مافيهاش اكل عيش كويس

بس بالليل بيعيد حساباته تاني

وهوا مسافر بالطيارة .. بيبص من الشباك بصة اخيرة على بلده

وبيتمنى انه يسيب الدنيا ويرجع بلده تاني

ولو حتى اكل عيش وملح .. بس بلده

عارفين ليه ؟؟؟ لأنه مش هيلاقي حضن ادفى من حضن بلاده

حضن مصر

واسألوا الناس اللي عايشة بره مصر

مشكلتنا ..

اننا مش عارفين نوظف نفسنا بطريقة سليمة

علشان كده ممكن تلاقي نسبة بطالة عالية جداا

بس عندنا دماغ توزن العالم ده كله .. ممكن تقول ما فيش دخل كويس

علشان احنا نسبتنا كبيرة

بس برضه بنحمد ربنا على كل حاجه

عارفين اكتر حاجه مدايقانا ايه دلوقتي ؟

اللي بيحصل في العالم اليومين دول

بس برضه ادينا عايشين مرتاحين شوية..

مش هقدر اقول الا الحمد لله رب العالمين

انا مش عارف اصلا كتبت الكلام ده ليه .. ومش عارف اذا كنتم هتوصلوا لاخر كلامي ولا لأ

بس في حاجه جوايا حبت تكتب الكلام ده ..حبي لبلدي

حبي للغلابة للناس الطيبة حبي لصحابي ممكن يكون حبي ليكم
منقول