الإيغور


سمعتها كتير .. لكن الحقيقة مش عارف ايه الموضوع بالظبط ..

شعب الإيغور أو الإيجور أو اليوغور

بيعيشوا فى جمهورية تركستان الشرقية
تحت الحكم الصيني

ومساحة تركستان الشرقية بتمثل خمس مساحة الصين ..
ومنها أخرجت لنا علماء أثروا الحضارة الإسلامية زي السمرقندي والزمخشري
بعد ما دخل فيها الإسلام على يد قتيبة بن مسلم الباهي 96 هـ
وساعدوا فى الفتوحات الإسلامية التي وصلت رومانيا وغيرها من دول أوروبا

ودلوقتي
عدد المسلمين فيه ما بين 12 - 16 مليون نسمة
أى حوالى 90 - 95 % من سكان بعض المدن التركستانية

والله .. ما شاء الله ده احنا أغلبية
أومال ايه المشكلة .؟؟

آه إحنا أغلبية .. لكن الإقليم مقهور

ليــه ؟




شوف الخريطة

الإقليم قدره انه يكون بين روسيا والصين .. فضل فى صراع لمدة قرنين
فترة يكون تحت حكم الروس .. وفترة تحت حكم الصين
لحد ما نجحت الصين فى ضم إقليم تركستان الشرقية سنة 1299 هــ

وعملنا ايه .؟
طبعا حاول سكان الإقليم التصدى للصينيين بالإنتفاضات على مدار السنين
فكان رد الصين هو تهجير ملايين من سكانها لتركستان الشرقية

سكانها ولا السكان المسلمين ؟؟
تهجّر سكانها .. إلى تركستان الشرقية

غريبة أوي دي ..إشمعنى ؟؟
مش المسلمين كانوا الأغلبية وبيمثلوا 90 %
عن طريق انها تهجّر ملايين من سكانها للإقليم هتقل نسبة السيادة المسلمة

ونجحت للأسف ووصلت نسبة المسلمين لـ70 %
واكتملت بتغيير إسمها لسيكنكانج بمعنى المقاطعة الجديدة ..
فى محاولة جادة لمحو أي هوية إسلامية
ويدار تحت حكم ذاتي ( لكن ده إسما فقط )

ثورات المسلمين فضلت مستمرة ضد الصين
ومنهم ثورة 1966 فى مدينة كشغر لما حاول المسلمين آداء صلاة عيد الأضحى فى مسجد
لكن رفضت القوات الصينية وكأنها جريمة وارتكبت مذبحة بشعة
فانتشرت الثورة فى الإقليم وبدأ المسلمين فى حرب عصابات ضد الصينيين

فى شهر واحـد
قتل الصينيين حوالي 75 ألف مسلم

75 ألف .. وعمرنا مسمعنا عنهم ؟؟؟
تخيلوا..
لكن رغم المذابح مازال الوجود الإسلامي قوى
فلجأت الصين لحيلة .. مكشوفة

تحديد النسل

سنة 1988 رفعت الصين شعار
"تحديد النسل وتطبيقه على الأقليات"
متحججة بكثرة المواليد وقلة الوفيات

وكانت السمة هي الوحشية

1944
اختارت السلطات الصينية بلدة توقسوا مركز لتجربة سياسة تحديد النسل
وبدأت فى عملية " فحص حالات الحمل غير القانونية " فى قرية من القرى
واكتشفت سيدة ايغورية مضى على حملها " الغير قانوني " 9 أشهر
فطلبت من زوجها غرامة 3 آلاف ين ,, وإسقاط الجنين
فاضطروا للهرب بعد اجبارها على دخول المستشفى للإجهاض
واستطاعت انها تلجأ للمقابر وولدته بنفسها وحافظت عليه

تفتكروا رد فعل مديرة مركز تحديد النسل كان ايه ؟؟
خنقت بنفسها الطفل قدام أمه
فاصيبت الام بانهيار وتوفيت بعدها

فقامت مجموعة من المجاهدين في 18 يوليو 1994م بتفجير مقر تحديد النسل بقنبلة

لكن الصين مصرة على إبادة الشعب الإيغوري
فلجأت لعمليات تعقيم للنساء الإيغوريات فى القرى
فى بلدة توقسو لوحدها
تعقيم 18765 سيدة
865 عملية إجهاض بالإجبار
!!

هو ليه الصين متضايقة كده من المسلمين ؟؟
علشان خايفة يستقلوا
والخوف وصلهم لدرجة منع الإيغور خاصة الشباب للسفر بره

منع؟؟ طب مش دي فرصة ان عدد المسلمين يقل فى الإقيلم..انهم يهاجروا بره ؟؟
هو ده الظاهر .. لكن الصين خايفة من انهم ينضموا للمنظمات والجماعات اللى موجودة فى اكتر من 20 دولة فى العالم
وكل مدى بتزيد قوتها ..ويتحدوا ضد الإحتلال الصيني .. ويطالبوا بالإستقلال وتخسر الصين الإقليم الغني

وهو الإقليم يهمها فى أيه ؟؟ اللى اعرفه ان الصين مساحتها كبيرة جــــدا
آه كبيرة .. لكن الاقليم مش محتاجاه كمساحة

تركستان الشرقية فيها أكتر من 8 مليار طن من إحتياطي البترول
ونص احتياطي الفحم فى الصين
وفيه حوالي 118 نوع من المعادن .. من 148 نوع بتنتجه الصين
غير الأراضى الزراعية الخصبة

الإقليم ثروة بالنسبة للصين ..

طب ده له علاقة بالإسلام خاصة .؟

بعد انهيار الاتحاد السوفيتي واستقلال جمهوريات آسيا الوسطى الإسلامية سنة 1991
الصين خافت طبعا من انتقال عدوى التحرر دي لتركستان الشرقية خاصة
بعد ما استقلت تركستان الغربية عن الروس الشيوعيين

والاستقلال ده مش هيجيي إلا بمعرفة الدين صح
وزى ما قلنا ان الاسلام واضح بشكل ملحوظ فى الإقليم ..
علشان كدة الصين بتعتبره تهديد مباشر لها ,,
وبيعتبروا المساجد والمدارس الإسلامية مراكز خطر

فلجأت الصين للإرهـاب
سنة 1997 .. هدمت 133 مسجد
وقفلت 105 مدرسة إسلامية
ومش بس كده..الصين اصدرت قرارات عنصرية ضد المسلمين كتيـر

زي أيه ؟
حظرت التعليم الإسلامي فى المساجد , وخدت تعهدات خطيّة من أئمة المساجد
انهم مش هيجمعوا أطفال المسلمين ويعلموهم علوم الإسلام فى المسجد !
ومنعت بناء مساجد جديدة
ومنعت رفع الآذان من مكبرات الصوت
ومنعت طبع الكتب الإسلامية او ادخالها لتركستان
وعلشان تمحى الهوية تماما .. منعت استخدام الحروف العربية
وغيرها من القوانين السخيفة
والعالم كان ساكت !!

الصين بدأت مؤخرا فى توطين ذوي اصول قومية الهان فى الإقليم
الهان ؟ دول صينين مش كده ؟
أيوة , الهان قومية من 56 قومية بيتكون منها الشعب الصيني
قومية شيوعية

طب وأثروا على تعداد المسلمين فى الإقليم ؟
تخيل ان المسلمين بعد ما كانوا 90 %
بقوا 50 % !!

وياريت تواجد سكاني بس
لأ كمان سيطرة على الوظائف الرئيسية والنشاط السياسي

يعنى زي الغريب فى بلده
بالظبط ..

طب وايه اللى فجّر الموضوع فى الساحة ؟
الصين استغلت أحداث 11 سبتمبر .. علشان تغطى على حربها ضد المسلمين
بغطاء " الحرب على الإرهاب "

الصين كمان !!
يعنى هي جت على الصين !

ورغم ان الاضطهاد الديني للمسلمين من قبل أحداث سبتمبر بسنين
إلا ان الصين حاليا بتتهم الإيغور ان لهم علاقة بمنظمات إرهابية المتطرفة
والموالاة لتنظيم القاعدة

طب والإيغور رد فعلهم ايه ..؟؟
سنة 2004 أسسوا حكومة لتركستان الشرقية فى المنفى برئاسة أنور يوسف
واتهم السكان الإيغور الحكومة الصينية لمساعدة عرق الهان على الاستحواذ بثروات الاقليم والمناصب العليا ,
فى حين انها بتجبر الفلاحين الايغور ببيع القطن بأسعار رخيصة لمصانع النسيج

والعـالم بيتفرج ؟
لأ , العالم العربي والإسلامي بس اللى بيتفرج
مفيش إلا تركيا اللى اهتمت لأمرهم واتهمت الصين بعمل إبادة جماعية

والحكومات العربية ؟
انت بتهزر؟؟




لكن المنظمات الأجنبية اتهمت الصين بإجراء اكتر من 40 تفجير نووي شمال الإقليم
وده أدى لإصابة السكان بالإشعاعات
بل ووفاة حوالي 200 ألف شخص بالأمراض والتلوث اللى نتج عن التفجيرات

ودعت منظمة هيومان رايتس ووتش ومنظمة هيومن رايتس فى الصين المجتمع الدولى
للضغط على الصين لإلغاء القوانين والحد من التمييز العرقي ضد الإيغور

تخيل لو اتنين عايشين مع بعض
كل واحد شايل من التاني سنــــــــين
هيبقى كل واحد مستنى فرصة يطلع فيها للى جواه
والفرصة دي جت

موظف من الهان ..في مصنع ألعاب للأطفال
قرر يطلق شائعة عن ان 2 من الإيغوريين فى المصنع اغتصبوا فتاتين من الهان
فقام الهان فى المصنع بمهاجمة الإيغوريين وقتلوا 2 وجرحوا العشرات
وبعد أيام أعلن مسئولين محليين ان الموضوع كان
" شائعة اطلقها الموظف الناقم على إدارة المصنع " !!

اومال ايه اللى سمعته عن 400 ايغوري تقريبا اتقتلوا ؟؟
مش بقولك كانت فرصة
الإيغور اتجمعوا فى تجمع سلمي وطالبوا بالتحقيق فى الحادث

سِلمى ..أومال جم منين القتلى ؟؟
الشرطة الصينية كانت شايفة الحل انها تفرق الحشد بالعصيان وطلقات فى الهوا

ومن هنا بدأ رفض الإيغورين ..وطالبوا بحقوقهم
ورافضين انهم يعيشوا حياة الهـوان والخضوع لحياة الإضطهاد الديني والسياسى والإقتصادي
فبدأت الحملة الصينية ضدهم تأخذ طابع القسوة والعنف
ومن هنـا بدأت إسالة الدماء

اللى هما الـ400 قتيل إيغوري ..
أيوة..

ده كمان رئيس الجمعية الايغورية للتعاون من تركستان الشرقية
قال ان عدد القتلى 600 وآلاف الجرحى
ومئات المعتقلين


للأســف صرنا فى زمن
كل من كان دينه الإسلام
يتهم بالإرهاب

وليتنا كنا إرهاب فعلا

كما قال الله تعالى
( وَأَعِدُّواْ لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ تُرْهِبُونَ بِهِ عَدْوَّ اللّهِ وَعَدُوَّكُمْ
وَآخَرِينَ مِن دُونِهِمْ لاَ تَعْلَمُونَهُمُ اللّهُ يَعْلَمُهُمْ ...) سـورة الأنفال

لكنا الآن أمة يخشاها الغرب..ويفكر ألف مرة قبل ان يمس دم مسلم
او يتعدى على حرية مسلم

لو كنا نأخذ بأسباب النصر
لو كنا متمسكين بدين الله بصدق وإخلاص..

لو كنـا ....

( وَكَانَ حَقّاً عَلَيْنَا نَصْرُ الْمُؤْمِنين )الروم:47