بسم اللة الرحمن الرحيم
.......................

** صيـــــــــــاد **

صياد وفارد شباكي ف بحر الهوى
لاجل ما اصيد لي ف يوم بلطية
صياد وقلبي دايب من كتر النوى
ومن كتر عومى يوماتى ف الميه
وإمتى يابحر بقى تحضن شباكى ؟
والاقى موجك كله حنيه ...
ويكون نصيبي حتى شلبايه !!!
ترحمنى منك واشيلها ف عنيه
ده انا ياما غزلى قطعه موجك
ولقيت عوازلى بيشمتوا فيا
أتاريك يابحر قاسي وغدار
لايوم بترحم ولا تحس اللى بيّ
وانا فيك يابحر .. هايم ومحتار
وقلوع مراكبي دابت من شواشي
يابحر شطك علي بينادي ......
ويقوللى أغنيلك غنى المراكبيه
وانا صوتى اندبح ، وكان شادي
بيشجى العذارى بأحلى أغنية
وعروسة البحر ياما رقصت قصادي
وقالت لى : بادوب ف عشق السواحلية
وان كنت عايزنى .. مهرى محيط هادي
ماليان محبة وشوق ،.. وكل ده لى
وانا يابحر صياد وراس مالى ......
قلبي وحبة صبر ، ومروءة منسيه

وعجبى........