هو ليه كل اللى بيدخلوا الإسلام بنات؟؟؟

السلام عليكم

بالبلدى كده:

هو ليه كل اللى بيدخلوا الإسلام بنات ؟

ده سؤال بيتسأل كتير جداً سواء على الفيس بوك أو خارجه..والغريب الكئيب المريب الرهيب إن اللى بيسال السؤال ده أغلبهم مسلمين !!! وكمان مسيحيين بيسألوا نفس السؤال !!
وبصراحة مكذبش عليكم اللى بيسال السؤال ده مبستريحلهوش لإنه سؤال يدل على جهل متعمد .. أو هدفه التشكيك فى إسلام الأخوات ..وبيدعوا إن الموضوع وراه إثارة فتنة..أو فعلاً مش عارف .....ما علينا !!

ببساطة !!

لازم نوضح الفرق بين (( الدخول فى الإسلام)) وبين ((إشهار الإسلام))..

الدخول فى الإسلام شرعاً: ان الفرد ينطق الشهادتين ..

طيب ينفع الواحد يدخل فى الإسلام وينطق الشهادتين..لكن لا يعلنها أمام الناس ويخفى إسلامه؟ أيوة طبعاً ينفع وتمام التمام .

طيب يعنى أيه ((إشهار الإسلام)) ؟! زى ما حضرتك بتشوف كده فى الفيديوهات,,بيطلع شخص معاه (وثيقة إشهار) بتكون من الأزهر..

طيب وثيقة الإشهار اللى جابها من الأزهر دى هتفيده فى أيه ؟! دى هتفيده علشان مثلاً يغير إسمه فى البطاقة ويبقى دخل فى الإسلام شرعاً وقانوناً .

طيب يا عم متزعلش نصحح السؤال ..
ليه كل اللى بيشهروا إسلامهم بنات ؟!!!

برضه ببساطة!!

طبعاً أنت عارف ان السن القانونى لإشهار الإسلام لازم يكون( 18 سنه على الأقل)..جميل جداً

ولو تلاحظ إن ده سن الزواج فى مصر لمعظم البنات .

طيب لما البنت تكون مسيحية..وتدخل فى الإسلام .. ينفع تتزوج من شخص مسيحى؟ أكيد لأ لإن ده حرام شرعاً بنص القران الكريم..ولو مسلمة تزوجت من مسيحى هيبقى زنا .

طيب أعيرنى إنتباهك بقى وركز معايا !!
لنفرض ان فى بنت مسيحية..وأعتنقت الإسلام..وأخفت إسلامها وعايشة فى وسط أهلها تمام التمام..وفاجئة !! جالها عريس ..هترفضة علشان هى بقت مسلمة ومينفعش تتزوج مسيحى...جالها عريس تانى ..هترفضة برضة عادى..طيب لغاية أمتى ؟!!!!!
تفتكر لما بنت مصرية تقعد ترفض فى كل عريس يتقدم لها !! هيكون أيه موقف أهلها منها يا ترى؟!! هيطعنوا فى شرفها أو هيغصبوها على الزواج لإنها بترفض بدون مبرر .

يلا أنا طرحت عليك المشكلة..حلها بقى أنت يا اللى كنت بتسأل ليه كل اللى بيشهروا إسلامهم بنات !!
فين الحل بتاعك ؟ انا لسه منتظر !
طيب أنا عندى مشوار بعد بكرة..ولو فضلت منتظرك هتضيع عليا المشوار.
خلينى أقولك أنا الحل بقى ...
الحل هنخرجه من السؤال اللى كنت بتسأله ( ليه كل اللى بيشهروا إسلامهم بنات ؟! )
لإن البنات المسيحيات لما بيدخلن الإسلام مش هينفع يتزوجن من مسيحى..فلازم طبعاً يشهرن إسلامهن فوراً فى الأزهر ويكون معاهم وثيقة رسمية معترف بها إنها مسلمة ولا يحل لها الزواج من مسيحى .... ها وصلتك الإجابة ولا لسه ؟
بالله عليك بقى أيهما أفضل:
تشهر إسلامها وتحافظ على نفسها ودينها ومتبقاش زانية ؟! ولا تكتم إسلامها وتتزوج من مسيحى ومتحافظش على دينها وتبقى زانية؟!

انا عارف بيدور فى جمجمتك سؤال: طيب ولزمته أيه تتصور فيديو وينزل على النت؟!
بالمناسبة تم تصوير الفيديوهات بعد قصة (الأخت كاميليا شحاتة) وأتعلمنا الدرس كويس من ساعتها..لإن لو كانت الاخت كاميليا أتصورت فيديو فى البداية..مكنش الموضوع بقى كده.
المهم !!
أى بنت مسيحية بتعتنق الإسلام وبتروح تشهر إسلامها أكيد هتترك منزلها..ولما بنت تترك منزلها ؟! هيقولوا عليها((مخطوفة)) وفعلاً أهلها بيقدموا بلاغ إنها مخطوفة ..
ولما بينزل الفيديو على الإنترنت لأى بنت أشهرت إسلامها بيدحض تماماً فكرة إن البنت تكون مخطوفة..وبيكون ده دليل ضد أهلها إن البنت مش مخطوفة ..والبنت فى سن قانونى (18 سنه على الأقل) وأشهرت إسلامها والموضوع بينتهى... فهمت يا مولانا ولا لسه؟!

طيب ليه مش بنشوف شباب بيشهروا إسلامهم بنفس عدد البنات ؟!
أولاً يا أبو الشباب..لو أى شاب مسيحى وأعتنق الإسلام .. ينفع يخفى إسلامه زى ما قولنا سابقاً..ويعيش فى وسط أهله عادى جداً.
طيب لو أهل الشاب المسيحى عرضوا عليه الزواج من بنت مسيحية ؟ هل يرفضها؟!
لا ميرفضهاش لإنه حلال شرعاً ان الشاب المسلمي تزوج من بنت مسيحية ...وهنا بقى الفرق بين إعتناق البنت للاسلام وإعتناق الشاب للإسلام...إن البنت المسلمة مينفعش تتزوج من مسيحى..لكن ينفع الشاب المسلم يتزوج من بنت مسيحية.
وبكده يبقى الشاب مش محتاج لإشهار إسلامه..ولا محتاج انه يترك بيت اهله..ولا هيبقى زانى لو تزوج من مسيحية ... عرفت بقى ليه مفيش شباب على الساحة بيشهروا إسلامهم؟!

طيب ليه الشباب لما بيدخلوا فى الإسلام مش بيتصوروا فيديو؟!
ما إحنا لسه قايلين لإنهم مش محتاجين لإشهار إسلامهم بنفس مقدار حاجة البنت لإشهار إسلامها.
وكمان قولنا انه هيبقى قاعد فى وسط اهله ويتزوج من مسيحية كمان..وحتى لو تغيب عن منزله..أهله هيعملوا محضر أيه؟ محضر (خطف) ؟ هو فى شباب بتتخطف؟!
أعتقد الإجابة وصلتك.

طيب النصارى بيقولوا إن البنات بيدخلوا فى الإسلام علشان بيكونوا فى علاقة حب مع شباب مسلمين ؟!
ينهار مش فايت ! ينهار مش تمام أبداً ؟
وجالك قلب ونفس تقول كده؟! بقى كل العدد ده من البنات بيدخلن الإسلام علشان يتزوجن من شباب مسلم؟!
ليه هى المسيحية مفيهاش رجالة ولا أيه يا كابتن ؟! الله يرحمك يا رجولة
خلاص أنعدمت الرجولة وسط شباب النصارى علشان البنات يروحوا يدوروا عليها فى شباب المسلمين؟! عيب لما تقول كده يا جنتل ..مش كده ولا أيه؟!
وبعدين بقى لما كل البنات دى بيدخلن فى الإسلام علشان علاقات حب وكلام من ده.. يبقى أنت كده بتشكك وبتعيب فى أبوك وامك .. لإن أبوك وأمك معرفوش يربوا أختك النصرانية اللى بتدخل فى الإسلام .. اما أبهات وأمهات آخر زمن صحيح ..بقوا مش عارفين تربوا بناتكم لدرجة انهم قربوا كلهم يدخلن فى الإسلام ؟! يا عيب الشوم !!!

طيب معلش بقى ليه البنت بتكون لابسه نقاب..ولما بتتصور بتكشف وشها امام الناس؟!
سؤال جميل بس ملهوش معنى بصراحة ..
لإن ده بيكون بداية إرتداء البنت للنقاب.. يعنى بعد ما بتتصور الفيديو ..بترتدى النقاب ومش بتكشف وشها تانى.. وصلتك المعلومة ولا لسه شوية؟!
وبعدين بالله عليك يعنى لو لابنت أتصورت ونزلها فيديو وهى لابسه النقاب..هتقدر تعرف منين ان البنت دى هى اللى صورتها فى وثيقة الإشهار اللى أخدتها من الازهر؟! وبسهولة أهل البنت هيقولوا اللى ظهرت بالنقاب دى مش بنتنا..ويبقى كده الفيديو ملهوش لزمة !

همسة:
أنت نسيت يا مسلم حديث رسولك عليه الصلاة والسلام((لا يبقى على ظهر الأرض بيت مدر ولا وبر إلا أدخله الله كلمة الإسلام بعز عزيز أو ذل ذليل إما يعزهم الله, عز وجل, فيجعلهم من أهلها, أو يذلهم فيدينون لها .))
وده معناه إن الإسلام هينتشر بكثرة على ظهر الأرض..طيب إزاى يا ترى؟!
طيب إزاى الإسلام هينتشر بالكثرة دى على ظهر الأرض والنصارى بيتكاثروا؟
إما ان النصارى يدخلوا فى دين الله أفواجا ..
أو إن النصارى لا يتكاثروا ..
أو الأتنين مع بعض: يدخلوا فى دين الله أفواجا..ولا يتكاثروا .
طيب يدخلوا فى دين الله أفواجا وعرفناها..
إزاى بقى النصارى مش هيتكاثروا؟!
طيب بص يا سيدى..التكاثر محتاج ( رجل) و(أمرأة) جديدة المعلومة دى عليك صح؟!
طيب لو موجود عدد نساء كثير..ويوجد عدد رجال قليل...هل يمكن التكاثر وبكثرة؟ اه ينفع طبعاً وبمنتهى السهولة..
طيب تعالى نعكس الوضع بقى
لو عدد الرجال كثير .. وعدد النساء قليل.. هل يمكن التكاثر بكثرة؟! لا طبعاً مش هينفع التكاثر بكثرة لإن عدد النساء أقل بكثير من عدد الرجال.
يبقى لما النساء بيدخلن فى الإسلام أكثر من الرجال يرجع إلى أمرين:
الاول: وهو ان عامة عدد النساء يفوق عدد الرجال على مستوى العالم بأضعاف مضاعفة.
والثانى: لكى يقل عدد التكاثر بين النصارى..وينتشر الإسلام على ظهر الأرض كما أخبرنا رسولنا الكريم عليه الصلاة والسلام..
وبالمناسبة فى شباب كتير دخلوا فى الإسلام وإلى الان شمامسة ويمارسون مهام التدريس فى الكنيسة ويحضرون القدسات بإنتظام..ومنهم من أعلن إسلامه وله فيديوهات مقل (الشماس أشرف قسطندى) (والشماس عماد المهدى) و(الشماس فوزى السعيد) وهناك أسر مسيحية مكونة من أب وأم وطفل أو طفلين..واعتنقوا الإسلام..فما الحاجة لإشهار إسلامهم وتصويرهم بالفيديو إذا كانوا مستقرين فى حياتهم وظروفهم مش هتضطرهم لإرتكاب مخالفات شرعية مثل الزنا وخلافة؟!
رسالة أخيرة:
كتير حلو يا مسلم لما تخاف على وطنك من الفتنة وتحب الإستقرار لبلدك..لكن وحش أوى يا مسلم لما تحاول ترضى غيرك على حساب عقيدتك..عقيدتك يا مسلم دى المفروض تكون أغلى شىء فى حياتك.. حب عقيدتك..حافظ عليها..تعايش مع الآخرين فى سلام لكن مش على حساب عقيدتك لإن عقيدتك يا مسلم هى أساس السلام.

الحمد لله على نعمة الاسلام
توبيك اكتر من رااااااااائع ومهم جدا جدا
جزاك الله خيرا وجعله فى ميزان حسناتك

موضوع بجد راااائع جدا جدا ومهم كمان
واستفدت معلومات مكنتش اعرفها

جزاك الله خيـــــرا

شكرا للمرور القيم ده يا
اميره وساره
جزاكم الله خيرا