كل ما تهل البشاير .. أحمد فؤاد نجم

كل ما تهل البشاير
من يناير كل عام
يدخل النور الزنازن
يطرد الخوف
والظلام
يا نسيم السجن ميل
ع الشجر وارمي السلام
زهر النوار
وعشش فى الزنازين .. الحمام
من سكون السجن
صوتي

نبض قلبي
من تابوتي
بيقولولك يا حبيبتي
كلمتي
من بطن حوتي
سلمى لي ع الحبايب
يا حبيبتي
سلمى لي
كل حب
وله نصيبه من سلامي
بلغي لي
احضنى العالم عشاني
بين عيونك
وابعتى لي
نظره
منها اشوف حبايبي
واشفي قلبي
واساليلي
كل عالم فى بلدنا
كل برج وكل مادنة
كل صاحب من صحابنا
كل عيل من ولادنا
حد فيهم شاف علامه
من علامات القيامه
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها
نومه
تلعن الجوع والمذله
والمظالم
والحكومه ؟
سلمى لي ع الولاد السمر
خضر العمر
فى عموم الحواري
سلمي لي ع البنات
المخطوبين فى المهد
لسرير الجواري
واساليلي بالعتاب
كل قاري فى الكتاب
حد فيهم
كان يصدق
بعد جهل
بعد موت
ان حس الشعب يسبق
واي صوت
هى دي مصر العظيمه
ياحبيبتي
هى مصر
اللي فضلتى ف هواها
عشنا
على الف قصر
هى دي يا عزة
مصر

*

للشاعر : أحمد فؤاد نجم