قصه حُبِى ليكى

موضوع: قصه حُبِى ليكى 2011-07-03, 2:42 pm

السلام عليكم ورحمه الله وبركاته

اللهم صلِ على سيدنا محمد وعلى اله وصحبه وسلم

حبيتك لإلتزامك . . . . . حبيتك لاحترامك

حبيت فيكي التواضع . . . . .والعزة اللي ف ...كلامك

مبســـوط منك لأنك . . . . .إســـلامك كل همــــك

أنـــا أصلي قابلت بابا . . . . . واداني فكــــرة عنك

وســـألته عن طباعك . . . . . إن كانت يعني هاديــة

فحكالي عن سمـاعك . . . . . لكلامه وانت راضية

وازاي بتسلي نفســــك . . . . .بذكــرك وانت فاضية

وحلاوة صوت تلاوتك. . . . . .وإزاي بتكوني شاديه

وسألته إن كنتي فاهمة . . . . معنى كلمة زوجين

قالي هتكونوا ورقـــة . . . . . . مطبـوعة نسختين

غنـي كنت أو فقيــر . . . . . . ليك عند بنتي ديـــن

سرك هيكون في بير . . . . . معرفش مكانه فيــــن

تفضل دايماً كبيـــر . . . . . . . في نظرها حبتيــن

لو جيت بفلوس كتيــر . . . . . تطمن جت منيــــن

هتكون دايماً معاهــا . . . . . . سيرتك هتكون هواهــا

والشوق اللي فـ خيالك . . . . .. . . تلقــاه لحظة لقاهــا

لو جيت زعلان ف مرة . . . . . . . إرمي همومك وراها

ومهمــا شوفـــت بـــره . . . . . . مش هتشوف مستواهـــــا

واطمــن يابني خـــالص . .. . . . عقـلها مافيهوش تفـــــاهــة

وزي مــا هــي بنتـــــي . . . . . .. بنت حماتهـــا وحماهـــا

وســألته عن ولادي . . . . . . . . منك هيكونوا إيــــه؟

قاللي هيكونوا عــادي . . . . . . . فسألته يعني إيــــــه؟
قاللي العادي إللي كان . . . .. . . . عند الناس من زمـان

العادي بتاع ســــراقة . . . . . .. . . وحذيفة بن اليمــــان

العادي بتاع أســـــامة . . . . .. . . وابن الحكيم لقمـــــان

ده العادي بتاعنا إحنا . . .. . . . . بنربي عليه عشان

لو جينا ولا رحنـــــــا . . . . . . هنقابل الرحمــــــــــن

عمرك ما تخاف عليهم . . . . . . . . ولادك في الأمان

أنا بنتي هتربيهـــــم . . . . .. . . ع السنة والقــــــــرآن

هتشـوف ابنك بيصحى . . . . . . . مادام سمـــع الأذان

ينزل في الفجر يقــرا . . . . . .. . . بالسجدة والانسـان

هتشوف في حجاب بناتك . . . . . . . . العفة والإحسان

هتشوف إزاي مراتــك . . . . .. . . هتعينك إنت كمــان

وسألته عن حياتــك . . . . . . . من قبل الالتـــــزام

قال أتذكر في ليلة . . . . . . . . مش فاكر أنهي عام

أذان الفجــــر أذن . . . . . . . وقالتلي سيبني أنـــــام

فدخلت الأوضه جوه . . . . . . .. . أجيب منها الحزام

وعبال ما رجعت تاني . . . . .. . . كات رجعت ف الكلام

الله يجازي الشيطــــان . . . .. . خلاها تقول نـــــــــام

بس اطمـــــن خلاص . . . . . دلوقتي بقت تمــــــــــام

قدملي مكة كـــــولا . . . . . . . . قاللي اتفضل وسمي

أحسن من سكة كولا . . . . . . . . صدقني وخدها مني

قلتله طيب ياعمي . . . . . . . يسعدني أقولك إنــــــي

بطلب بنتك ونفسي . . . . . . . تناسبني وترضى عني

راح شادد فجأه لبسي . . . . . . وقلب وشه وسألنـــــي

حافظ كم جزء يابني . . . . . . . . وقاري كم كتاب

احكيلي كده عن مؤت . . . . . . أوغزوة الأحزاب

وسمع كم حديث . . . . . . . . في الأخذ بالأسباب

وكمان سمعلي آيه . . . . . . . ذكرت فيها الدواب

ولو شايفها صعبة . . . . . . . . قللي بتاعة الذباب

واحكيلي حلم يوسف . . . . . . . . وبراءة الذئاب

واخواته لما جولوه . . . . . . . دخلوا من أنهي باب

واديني فكرة برضه . . . . . .. . بتقبض كم ثواب

وناوي ازاي تحسن ..............أنا شايفك لسه شاب

وسأل نفسه وسألني . . . . . . . . هيعوز إيه يعني مني؟

لو عندي كل حاجـــه . . . . . . . وديني مش شاغلني

أحسن لك تنسى بنتي . . . . . . . ومهرك مش لازمني

قلتله صبرك ياعمــي . . . . . . . . وبراحتك امتحنــي

يبقى اما أسأل تجــاوب . . . . . خليك دايماً فاهمنـــــي

سألتك وانت ســـــاكت . . . . . . . . خليتني أظن ظـني

وفضل يسأل واجاوب ... . . . . وعشان خاطرك عصرني

وظهرت النتيجــــــة . . . . . . . .. وبفضل الله قبلنـــــــي

قاللي مقبول في نظري . . .. . . . مبروك عليك ياسيدي

لكن في نظرها هــــي . . . . . . . . نجاحك مش بإيــدي

وهي زمانها راجعة . . . . . . . . من تمرين السويـــــدي

خليك قاعد شويــــــة . . . . . . . . .استنا لما تيجــــــــي

هعملك من إيديـــــــا . . . . . . . كباية شاي صعيـــــــدي

سابني وقعدت أفكر . . . . .. . . . هل ممكن ترفضيني

طاب قولي حتى أفكر . . . . . . . . مش يمكن تفهميني

وفضل مخي يلاعبنــي . . . . . . . . يجيبني ويودينـــي

وخايف م المقابلــــة . . . . . . . . .مرعوب بينك وبيني

ودق الباب في ثانيــــة . . . . . . . وشوفتك مرة تانيـــة

مش قادر أنسى يومهـــا . . . . . . . . وفاكر كل ثانيـــة

ونده والدك عليكــــي . . . . . . . عشان أول لقــــــاء

دخلتي وشوفت وشك . . . . . . . . . عليه نور الحياء

نور والله فعـــلاً . . . . . . . . مش نور بودرة وزواء

كان أول مرة أخــــاف . . . . . . من فتنة النســــــــاء

أخلاقك مش عـــــــادية . . . . . وجمالك كان شفـــــاء

قعدتي جنب والـــدك . . . . . . . . وسألتيني وجاوبتــــك

وفكل مرة أجــاوب . . . . . . . . كنت باشوف ابتسامتــك

ف أقول من جوه نفسـي . . . . . . . . يارب أكون عجبتك

وبعد شوية قمتــــــي . . . . . . . ندهت عليكي مامتــــــك

ورحتي دخلتي جــــوه . . . . . . . وراح وراكي والـــدك

وانا قلــت مش مروح . . . . غير لما أكون خطبتــــــــــك

وابوكي جاني تانــي . . . . . . . . وقرب من وداني

لابس كرفته ســـوده . . . . . . . . وبدله لون فرانــي

المنظر يعني كلــــه . . . . . . . . ميدلش ع التهانــي

قلتله مالك ياعمـــي . . . . . . من فضلك قول عشانـي

عرقي غرقلي كمـــي . . . . . . . سايبني ليه أعانـــي

قاللي مستني إيــــــه . . . . . . . فين إيدك إديهـــانـي

البنت مش موافقـــــة . . . . . . . تتجوز حد تانــــــي

كان أول مرة أعرف . . . . . . . . إزاي الناس بتفرح

سعادتي كات غريبــة . . . . . مش ممكن هقدر أشــرح

من كتر حبي ليكـــي . . . . . . نويت أضحي وادبــــح

رحت اشتريت خروف . . . . . . وكان خروف بينطح

ده أخيراً هبقى جــوزك . . . . وشجرة صبري تطــرح

خطوبتنا كات بسيطة . . . . . . . . مكانش فيها زيطة

وفرحنا كان في جامع . . . . . . . يعني مش خلطبيطة

ومامتك جت في يومها . . . . . . ورقعت كام سويطة

هاتولي بنتي منــه . . . . . . . دي مش فاهمة العبيطة

إنه هيخطفها منـــــي . . . . . . وهتوحشني الغتيتــــة

صعبت عليا مامتك . . . . . . . . . الموقف كان شديد

لكن فعلاً خطفتـــــك . . . . . . . ورحنا مكان بعيـــــد

فاكرة ولا انتي ناسية . . . . . . . أكيد فاكرة أكيـــــــد

من يوم ما بقيتي زوجتي. . . . . . وانا متهني وسعيــد

معايا ف كل يـــــــوم . . . . . . . ويوم لؤاكي عيــــد

عمرك ما دقتي نــوم . . . . . . وانا تعبان أو مريــض

فلوسي كات بتكتــــر . . . . . . . والخير عندك يزيـد

وعامله ليه دفتـــــــر . . . . . . . ومرتبه المواعيــــد

وبفضل الله قدرتــــــي . . . . . . . وجبتيلي الوليــــد

وبعديها بشويـــــــة . . . . . . . . جبتيلنا عليه يزيــد

وبعديه جت سميـــــة . . . . . وآخرهم كان حميــــــد

بدعيلك كل يوم . . . . . . . . . وأفضل أعيد وازيد

ربيتي عيالي دول . . . . . . . . ع القرآن المجيــــد

طول عمرك وانتي صافية . . . . . قلبك لون الجليـد

أخلاقهم مش عادية . . .. . . . . طلعنلك مش بعيــد

وليد دلوقتي ضابط . . . . . . . ومعاه رتبة عقيــــد

ودعوة قلبي صابت . . . . . . . ويزيد أهو مات شهيد

وبنتك صيدليـــــة . . . . . . . . . وحميد أصبح معيد

الله برحم أبوكي . . . . . . .. . راجل من نوع فريد

كل اللي قاله فيكــــي . . . ... . أنا عشته بالتحديــــد

عشت معاكي ف حكاية . . . . .. . أحلى وأجمل رواية

حكايتي كات معاك . . . . . .. . . وحكايتك كات معايا

اديتك كل عمري . . . . . . . . . وهمك كان رضايـــا

وعمرك خدته منك . . . . . . . . . وقربك كان دوايـــا

وخلاص العمر راح . . . . .. . . . راحت أيام صبايـــا

ومسافر رحله صعبة . . . . . . . وزادي مش كفايــــــه

مش عاوز أشوف دموعك . . . . . . بالذات ف يوم عزايا

أنا عارف إنتي عارفة . . . . . . إن الموت مش نهايـــــة

دي لسة الرحلة طالعة . . . . . . والموت خط البدايــــــة

إدعيلي يمكن أوصــــــل . . . . . . . وأشوف هناك حمايا

أنا عارف إنه فيهـــــا . . . . . . . محجوزله هناك سريــر

وسلامي في النهاية . . . . . . . أنا خلصت الحكاية

لو يوم فكرتي فيه . . . . . . إقري شعري وغنايا

وأمانه ف كل مرة . . . . . . تدعي لي بالهداية

عسى ربي بدعائك . . . . .. يغفر ليا الخطايا

منقول

موضوع: رد: قصه حُبِى ليكى 2011-07-03, 2:48 pm

بجد جميييييييييييييله ياايمان
تسلم ايدك

موضوع: رد: قصه حُبِى ليكى 2011-07-03, 10:39 pm

marwa adel كتب:: بجد جميييييييييييييله ياايمان
تسلم ايدك

نورتى التوبيك ياقمر

موضوع: رد: قصه حُبِى ليكى 2011-07-04, 2:45 am

جمييل اوي
تسلمي

موضوع: رد: قصه حُبِى ليكى 2011-07-04, 2:48 am

روووووووووووووووعة بجد
تسلم ايدك

موضوع: رد: قصه حُبِى ليكى 2011-07-04, 3:36 am

عليكم السلام ورحمة الله وبركاته

صلى الله عليه واله صحبه وسلم

خطوبتنا كات بسيطة . . . . . . . . مكانش فيها زيطة

وفرحنا كان في جامع . . . . . . . يعني مش خلطبيطة

تسلم الايادى يا شذى الالحان روعه

موضوع: رد: قصه حُبِى ليكى 2011-07-07, 8:47 pm

نورتوا التوبيك
استاذ محمد
الاء
استاذ احمد