في تصور كوميدي ليس أكثر لشخصية الكابتن حسن شحاته المدير الفني السابق للمنتخب المصري والحالي لنادي الزمالك عن طريقة تعامله مع النادي الأبيض خلال الموسم القادم ..حيث تناولت العديد من القضايا والمواقف التي ستواجه المعلم خلال تجربته مع الزمالك خلال الموسم القادم وضعت لها تصور كوميدي في طريقة عرضها من خلال جميع المواقف التي ستقف أمامه :





التعاقدات الجديدة

شحاته لنفسه : أنا عايز حسني عبدربه و عمرو زكي ..عمرو أيه بس مهو عندي صحيح! .. ياه لو ينفع اجيب لاعيبتي الي أنا طلعتها ياه ياه لو معايا فتحي وعماد متعب كنت شألط الباكات والهجوم.

شحاته للإعلام : ازاي يعني هتفاوض مع اللاعيبه اللي كنت بدربها .. أنا عمري ما هعمل كدة عمري و بعدين اللعيبه دي مرتبطة مع فريقها بعقود ومش معنا أن أحنا حبايب أني اجبهم معايا في الزمالك .. ومش معنا أن حسني عبدربه اللي كان متمسك بالدراويش ثم الدراويش ثم الدراويش لمح بالرحيل هكون أنا السبب .. أرحموني بقا !!.

علاقته بميدو

شحاته لنفسه : يا عم أنا بتخنق منك أصلاً ومش بطيقك .. بس عمل أيه بقا هستحملك وخلاص .. يوه أنا كده هضطر أني هلعبه كل متش حتي لو مستواه وحش كالعاده عشان محدش يقولي أني أنا بضطهده من ساعة ما فضحني في كأس الأمم و حسسني أني مليش فيها.

شحاته للإعلام : ميدو لاعيب كبير وأفضل محترف في تاريخ مصر .. وتواجده داخل القلعة البيضاء اضافة قوية لنادي الزمالك .. ومعنديش خلاف مع أي لاعب و كريم أبني خلاص ظبط علاقتي معاه.

في حالة الفوز

شحاته لنفسه : أنا صح أنا صح .. أنا جامد ياما انتا كريم يارب أنا كنت حاسس أن الزمالك مش هيقوم غير على أيدي بس يا رب بقا محدش يرجع يقولي بتكسب بدعاء الوالدين دة الزمالك واقع بقاله 7 سنين و مخدش غير الكأس بس .. حد يفكرني يا رجالة هو الموسم اللي فات حسام كان متقدم على الأهلي بفارق كام نقطة قبل ما الأهلي يبهدله!!.

شحاته للإعلام : مش قولتلكوا الزمالك الجديد هيرجع في أول تصريحاتي وقد كان .. وأحنا مركزين في بطولة الدوري من أجل جمهور الزمالك الطفشان عشان الأهلي مش مضمون وانتوا فاكرين الموسم الماضي .

الهزيمة:

شحاته لنفسه : ينهار أزرق ومنيل أنا أيه اللي جابني هنا .. يلهوي الناس هتفضحني وهتقول أن جوزيه هو اللي كان مدلعني وكان بيديني اللاعيبة جاهزة أيام كأس الأمم .. وانا لما بعدت عنه اتكشفت ياتري انتا فين يا تريكة و يا جمعة و يا فتحي و ياحضري .. مليش دعوة أنا عايز الحضري دة كان شايل عني بلاوي !!.

شحاته للإعلام عقب الهزيمة (وبعد أن يتذكر تصريحات جوزيه بعد التعادل مع المقاصة في بداية تجربته الثالثة) يقول شحاته : أنا لا أملك عصا سحرية .. أنا عائد لبناء فريق شاب و قوي يكون لديه القدرة على الدفاع عن تاريخ القلعة الحمراء .. قصدي البيضاء ، فالفرصة سانحة لوجود العديد من اللاعبين الصاعدين مثل محمد بركات أسف قصدي حسام عرفات ! ، ولن اتقدم بالاستقاله بالرغم من امتلاكي عروض من عمان و الجزائر و قطر و الصومال .

الحكام :

شحاته لنفسه في حالة تغاض الحكام عن احتساب أخطاء على فريقه : الحمد الله مخسرناش ..بس ياريت بقا محدش يطلع يقولي الكابتن سمير زاهر بيجيب حكام بيضاء لتحكيم مبارياتنا عشان علاقتنا الحلوة مع بعض و البطولات إلي ظبطه بيها .

شحاته لنفسه في حالة خسارة فريقه بسبب الحكم: يا تري أعمل أيه أعمل أيه الجهاز الفني اللي كان قابلي كان بيحمل الحكم كل جون وكل فرصة وكل تمريرة وكل هزيمة.. أنا عايز أعمل حاجه مختلفة أعمل أيه أعمل أيه ،أه ممكن أقول هو مصر ليه مفيهاش ثلج زي النمسا!!.أو حد عامل عمل للحكم في غرفة خلع الملابس قبل المباراة.

قبل مباراة الأهلي

شحاته لنفسه : أنا هعمل معسكر خارجي في غانا أو أنجولا قبل البطولة الخاصة أمام الأهلي عشان اللاعيبة تحس أننا كلنا أسرة مع بعضينا.

شحاته للإعلام : المباراة مش سهلة و ليها حساباتها الخاصة خاصة أن هدفنا هو تحقيق بطولة الدوري للجماهير البيضة الغلابة بس ربنا يستر الأهلي مبيرحمشي الغلابة وعنده مدرب ساحر .

لقدر الله .. حقق الزمالك بطولة

شحاته لنفسه : هو ده الزمالك الجديد اللي قولت عليه مش قولتلك يا كريم .. الله عليا يا حبيب والديا .. اللي هيفتح بوقه ويقولي مين كان بيظبط في كأس الأمم تاني هطلع عينه.

شحاته للإعلام : وعدتكم بزمالك جديد وقد تحقق .. والفوز بهذه البطولة عوضنا عن البهدلة اللي تعرض لها الزمالك خلال الـ7 سنوات الماضية .. بس هتزودوا مرتبي ولا هتسيبوه كده حرام عليكوا!!



كتبه : شـــادي ألمــاظ فى السبت 16 يوليو 2011, 01:53

ههههههههههه هو دة حسن شحاتة

مالة شبة الارموطى كدة لية

ههههههههههههههه