دين ابوهم اسمه ايه

موضوع: دين ابوهم اسمه ايه 2012-01-15, 2:09 pm

فيديو وكلماااااااااااات قصيده
دين ابوهم اسمه ايـه ؟؟
للشاعر الكبير جمال بخيت

قصيـده إلى كل من حكموا مصـر وسرقوها ونهبوا ثرواتهـا عبر كل الازمااان
القصيده دى اقل مايقال عنها من وجهه نظرى المتواضعـه انها احد القصائد العظيمـه
واللى هيكون ليها بصمـه كبيـره جداً فى تاريخ الشعر فى العصر الحديث
_______________

اولا الفيديو

ثانيا كلمات القصيده كامله

دين أبونا يا مسلمين
في يقيني
أعز دين
كلمة النور الأمين
كلمة الحق المبين
حكمة يكتبها الإله
فوق جبين الطيبين
دين أبونا يا محمد
انت سره
ومبتداه
انت إحساسه ومداه
دقة عارفينها في قلوبنا
لما نخشع للإله
لما نطلب يوم رضاه
لما نركع
لما نسجد
لما نفرح بالحياة

دين أبونا إبراهيم
رش جمر النار حنين
ع الخرايط والأماكن
اتولدنا طوافين
ذاكرين

دين أبويا لو مسيحي
رحمة لاجل العالمين
نصرة لاجل المظلومين
كلمة الحب اللي بايس
الصليب جوه الكنايس
ندهة الأجراس لمريم
والأمان للمجدلية
رحمة ليكو
ورحمة ليا
المسيح شايل آلامنا

لاجل يهدينا السلامة
خد أيمن
خد أيسر
العبادة مهيش كلام
عيش بإسم الإنسانية
وانسى نية
تدفعك للانتقام

دين أبويا دين إلهي
أينما كان اتجاهي
حتى لو كان دين يهودي
احنا مش ضد اليهود
موسى في القرآن وليد
يحضنه نيل الخلود
بين إيديه
تسعى عصاته
حية
وجدودنا شهود
سحرة آمنوا برب موسى
انقسم له بحر عاتي والجبل عرف السجود
رجعت الحية عصاية
حضنت التوراة وصايا
إوعى تقتل
إوعى تسرق
إوعى تزني
إوعى تقبل بالخضوع
بحر خير االكون يواتي
لما نفرد له القلوع
والجحيم ياكل سنينكم
لو فقير فيكم يجوع
الوصايا هي هي
أرتضيها زي ما هي
في ضميري وفوق شفاهي

دين أبويا دين إلهي
أينما كان اتجاهي
حتى لو كان مش إلهي
المجوسي يترعب من النار ويعبد
الإله اللي في خياله
ليه حرامه وليه حلاله
تسمعه في معبد دعاء
تلهمة رعشة رجاء
للبقر ناس يعبدوه
ويدينوله بالولاء
مش غباء
تعرفوا في البقرة إيه بيقدسوه ؟
العطاء

دين أبويا
أي دين
فيه عصاة أو مخطئين
بس في نهاية المطاف
فيه ملايكة ومؤمنين
ولرضا للصالحين
والهنا للصابرين
فيه مالاذ للعابدين الشاكرين
المشتاقين رغم الضياع
لليقين

دين أبويا
أي دين

اللي انا بقى معرفوش
الوحوش
الكروش
اللي لو طالوا رقابينا
بينهشوا مبيرحموش
دين أبوهم إسمه إيه ؟
اللي داسوا فوق رؤوسنا بالبيادة
اللي مشيوا بالببلاد للبلادة
اللي فتاويهم فساد للعقل
يقضى على العبادة
اللي مسحوا من الآيات معنى الشهادة
دين أبوهم اسمه إيه؟

لوثوا الدم في عروقنا
سدوا عين الشمس فوقنا
سرقوا ضوئنا
صادروا نيلنا
ودفعونا تمن وضوئنا
دين أبوهم اسمه إيه؟
اللي باع وطن بحاله
خضرته وصفرة رماله
نسوته وشهوة رجاله
بهجته ودمه وعياله
خطوته وسنين نضاله
ثورته ضد احتلاله
دين أبوهم اسمه إيه؟

مين إلهه ؟
مين رسوله؟
فين كتابه؟
فيه ملايكة وللا غابوا؟
فيه شياطين وللا تابوا ؟
لما شافوا التابعين
شرهم زاد عن جهنم شر لا يمكن حسابه
دين أبوهم اسمه إيه؟

حتى فرعون اللي صدق
انه من نسل الإله
واللي قال انه الإله
كان بيبني الأهرامات للمات قبل الحياة
كان له بعث ويوم حساب
كان له دولة
حضور
إدارة
كان منارة ترشد الكون للحضارة
كان له جيش فارض وجوده
كان محارب بين جنود
واما يتجاوز حدوده
كان له رب يغرقه وينقذ يهوده
حتى فرعون اللي صدق
انه من نسل الإله
واللي قال انه الإله
كان له كهنة في العلوم
يقروا في كتاب الكواكب
يرصدوا سير النجوم
يفتحوا له سكك بيبان
في سراديب الزمان
ويقولولو ازاي يدوم
حنطوه
خلدوه
بالمعاني والمباني والرسوم
كانوا كهنة مؤمنين
خلوا كلمة مصر دين
حاضرة في العهد القديم
حاضرة في العهد الجديد
حاضرة في القرآن حضور
الآيات فيها تدور
مفردة عز وجلال
معلنة وبين السطور
تخترع
ثانية وشهور
تخترع شعر وبحور
حتى فلاحها الفصيح
شكوته بتشع نور

إيه يا مصر
إيه يا أرض الطبيبين
اللي حكموا في الزمان ده يبقوا مين ؟
دين أبوهم اسمه إيه؟
حد يعرف فيكوا دين
كل أتباعه لصوص أو قوادين ؟
في المعاصي مولودين
في الكراسي مأبدين
في التفاهة معدودين
في السفاهة مفرودين
ع البلاهة مسنودين
للشراهة مجندين
ع القرف متعودين
ع الشرف متمردين
ع الوطن متنمردين
بالخيانة موحدين
اللي يعرف دين كده يقوللي عليه
دين أبوهم اسمه إيه؟
****************

تمت

موضوع: رد: دين ابوهم اسمه ايه 2012-01-15, 7:20 pm

جميل جميل جميل
الحمد لله على نعمة الاسلام
شكرا استاذ نشأت

موضوع: رد: دين ابوهم اسمه ايه 2012-01-15, 10:39 pm

رائعة بكل معنى الكلمة
سلمت استاذ نشات ع النقل المميز

موضوع: رد: دين ابوهم اسمه ايه 2012-01-16, 7:18 am

شكرا ليكم على وجودكم المميز
واشكركم على اهتمامكم الدائم
مع خالص تحياتى

موضوع: رد: دين ابوهم اسمه ايه 2012-01-17, 1:03 am

جمال بخيت رائع جدا

والقصيده معبره قوى عن منتهى الفساد اللى وصلنا له

واللى لا يعترف بيه اى دين او مله

تسلم ع اختيارك

موضوع: رد: دين ابوهم اسمه ايه 2012-01-17, 10:13 am

شكرا يا ايمان على ردك الجميل
ومرورك الاجمل والله
مع خالص تحياتى

موضوع: رد: دين ابوهم اسمه ايه 2012-07-25, 3:39 am

جميـــــــلة جدا جــدا جـــــــدا القصيدة دي
وحسبـــي الله ونعــم الوكيــل ف كل اللي يخرب ف مصر وينهب خيراااتــها
شكرا استاذ نشأت ع الموضوع

موضوع: رد: دين ابوهم اسمه ايه 2012-09-24, 10:40 am

ونعم بالله هو المنتقم الجبار
شكرا يا تريكاويه على اهتمامك وردك
مع خااااااااااااااااااااااااااااااااالص تحياتى

» كوكب اسمه ....
» الى كل شخص اسمه احمد
» حمار زهقان من اسمه

دين ابوهم اسمه ايه

دين ابوهم اسمه ايه

مواضيع مماثلة

مواضيع مماثلة