انت بتتفرج علي الكوره :ايوة طبعا بتفرج على كورة وعلى فكرة مش بس الكورة انا بتابع اغلب الرياضات لانى بحب الرياضة عموما بس ليا تحفظ على الرياضات النسائية بصراحة اغلبها ان لم يكن كلها فيها حاجات حرام كلها
انما عموما الكرة بتاخد من حبى نصيب الاسد ومراته وعياله
وتشجع نادي: طبعا الاهلى دى مش محتاجة سؤال والا ابقى عبيط وعلى فكرة بشجع الاهلى فى كل الالعاب وكل الاعمار
ايه هي الاسباب اللي بتخليك تعمل كده :اولا انا من رأيى ان تشجيع نادى معين هو نوع من الانتماء وهو صورة مصغرة من الانتماء للوطن والانتماء الرياضى فعلا جزء من الانتماء للوطن عموما وكمان مسألة اختيارى للاهلى انا بشارك ايات فى كونى فعلا راضع حب الاهلى من صغرى وحب الخطيب طاهر وزيزو وربيع ياسين واكرامى وشوبير وغيرهم وغيرهم وبعدين الكرة بالنسبالى كانت هى الفسح وهى العيد وهى السينيما وهى زيارة قرايبنا اللى فى البلد كانت بتمثلى كل حاجة حلوة بحبها وانا صغير وعلى فكرة انا والدى وعمى كانوا يقعدوا يتفرجوا على الماتشات ويحللوا قدامى الخطة والاداء والتغييرات اللى لازم تتعمل وكده وانا كمان اخدت منهم الموضوع ده وفعلا الحمد لله بتمتع برؤي فنية كروية مش بطالة
واظن انى عبرت عن حبى للكورة وللاهلى على وجه الخصوص بالشعر اللى بحبه ايضا
عرفت ليه بحب الكورة وليه بشجع الاهلى
وايه الفايده اللي بتعود عليك من كده:هاقولك على حاجة انا بعد ماتش الاهلى والصفاقسى فرقت صندوق حاجة ساقعة ( على قدى ) امى سألتنى وهو انت واخد منهم ايه تفتكر انا واخد من وراهم ايه
وخد من وراهم فرحة وسعادة بتدخل قلبى لما بشوف ابو تريكة الفنان مبسوط وفرحان واشوف حسام البدرى بيتنطط زى اى ناشئ صغير من الفرحة وفرحان وانا بشوف شادى محمد بيسجد لله شكرا وعرفانا بمنته عليهم
واخد من وراهم انى بحس انى بشجع نادى محترم له مبادئ وقيم واخلاق وسلوكيات
ما بتتوفرش فى نادى تانى فانتمائى للاهلى فخر ليا انا وفرحة ليا انا وطبعا لما بتحب حد زى ما بتشاركه فرحه بتشاركه اكيد لحظات الحزن على الهزيمة وبتشاركو بحرصك على انه يكون احسن دايما وكل حاجة كل حاجة
ياريت كل وحد يقول الحقيقه من غير زياده او نقصان: انا حاولت اقول رأيى بدون نقصان لكن ماعتقدش ابدا انى قلت حاجة زيادة
اسف على الاطالة
وشكرا على سعة الصدر