زيارة المسؤول الـ ( V-I-P ) للمدرسة

زيارة المسؤول الـ ( V-I-P ) للمدرسة

كانت الأمور تختلف تماما في صباح هذا الحي الشعبي، فقد بدت الشوارع واسعة نظيفة مزينة بالشجر الأخضر و الأحمر ( لا تسألوا عن الشجر الأحمر ) بينما كانت أضواء عواميد الإنارة تعلن عن نفسها و هي التي غابت طيلة السنوات الماضية و كيف تظهر أساساً و لم تكن هناك عواميد إنارة من الأساس. بينما اصطف الضباط بملابسهم البيضاء في محاولة لمنع أي بائع جائل أو غير جائل من أن يأخذ مكانه في ساحة الحي الشعبي لذا لم يكن من المدهش أن يلزم معظم السكان بيوتهم .
داخل المدرسة الوحيدة بهذا الحي الشعبي كانت الأمور تجري على قدمٍ و ساق و ربما ذراع و بعض الأصابع، و يبدو أن مكان هذا الحدث الجلل سيكون في هذه المدرسة العتيقة التي يعود تاريخ بنائها إلى سنواتٍ طويلة للغاية، و هي المدرسة التي يديرها هذا الرجل الممتلئ الجسم القصير القامة ( هذا هو الوصف المعتاد لكل هذه الشخصيات، حسناً سأجعله طويل القامة نحيف الجسم ) .
تحرك مدير المدرسة و المسمى الأستاذ عبد الشكور بعصبية شديدة تنم عن توتره الغير عادي و أخذ يصرخ مطالبا بأن يأتي الأستاذ مرقص أستاذ اللغة الإنجليزية و بعد أقل من خمس دقائق جاء مرقص و هو يتصبب عرقا رغم أن الجو معتدل و قال :
- صباح الخير يا باشا .
- منين خير يا مرقص، خلاص الناس في طريقهم لهنا و العيال إياهم ما وصلوش .
- العيال وصلوا يا باشا و المسيح وصلوا .
اندفع الأستاذ عبد الشكور نحو مرقص بفرح و قال له و هو يمسك كتفيه :
- طيب دخَّلهم .
خرج مرقص من الغرفة و بعد دقيقة دخل و معه مجموعة من الشباب و ما أن رآهم عبد الشكور حتى تحول لون وجهه إلى الأحمر و بدا و كأنه على وشك الانفجار و بغيظٍ مكتومٍ توجه نحو مرقص و سحبه من ذراعه نحو ركنٍ من أركان الغرفة و قال له :
- مرقص .. العيال دي جبتهم منين .
- من المدرسة الإمريكية يا ريس .
- امريكية يا جاهل .. دول عيال هيقفوا قدام المسؤول الأمريكي و كأنهم عيال مدرسة شعبية .. أنت عبيط يا مرقص .
- يا باشا ما أنت اللي قلت لرئيس الحي عايزين عيال يشرَّفونا .
- ايوه عيال مدرسة خاصة يبقوا نص نص ... لكن دول حرام عليك .. دول عيال نضاف أوي .. و بعدين الواد الطويل أوي ده، لابس سلسلة دهب أتقل من كل دهب مراتي .. و الواد القصيَّر حالق شعره زلبطة و كاتب برتيني .. بذمتك نقول للراجل ايه ... نقول للراجل ايه يا مرقص ..
- يا باشا العملية سهلة جداً .. نقول للواد الطويل يقلع السلسة و للقصير يلبس برنيطة و كأنه متعور أو عنده قراع .
- طيب و دول شكلهم بيتكلموا انجليزي جامد أوي ..
- دول طحن يا باشا .
- ربنا يطحنك يا مرقص .. يا مرقص أنا عايز عيال نص نص برضه في الإنجليزي، الراجل مش هيصدق الكلام ده .
- ما تقلقش يا باشا هفهمهم كل حاجة .
أشار له عبد الشكور بالتحرك و ما أن خرج مرقص و الطلبة حتى دخلت الأستاذة فادية أستاذة اللغة العربية و قالت بعصبية شديدة و بصوتٍ صارم :
- أستاذ عبد الشكور .. اللي بيحصل ده اسمه نصب ..
رد عليها عبد الشكور مبتسما محاولا تخفيف شدتها :
- ما ينفعش يبقى كسر أو ضم ..
لكنه صمت بعد أن أزداد تجهم وجه فادية فجلس على المقعد و قال بهدوء مصطنع :
- احم احم طيب ... خير بقى يا فادية
- إزاي يا ريس، الولاد بتوعنا مش هما اللي هيقابلوا المسؤول المهم .
قام عبد الشكور من مقعده و قال بتعجب شديد :
- فادية أنت عايزه عيال مدرسة الأمل الفريد يقابلوا المسؤول الأمريكي .
- هما مش الطلبة بتوعنا .
- ايوه بس دول يفضحونا و ممكن الراجل يطالب بمنع معونات المنظمة عن مدارس مصر، ده ممكن يتنقله انفلونزا الطيور منهم .
- بس دول ولادنا سواء رضينا أو لم نرضى .
- يعني و ولاد المدرسة الأمريكية ولاد من نيجيريا و لا بتسوانا ما هم مصريين برضه يا فادية .
- يا ريس دول ما يعرفوش حاجة عن مصر، ده أنا بسأل واحد فيهم قريت حاجة لأحمد شوقي ، قالي أنا ما أعرفوش بس أعرف أخوه محمد شوقي بيلعب في الأهلي، و التاني بقوله ايه الحدث اللي شد مصر سنة 1988 و شرَّفنا كلنا، قالي فوز هولندا بكأس الأمم الأوروبية .
- فادية فادية ... و التانيين يعني اللي عدلين ... هتلاقيهم لا يعرفوا شوقي الشاعر و لا شوقي اللاعب .
- ايوه يا ريس أنا معاك، بس إحنا منهم و هما منا و كفاية إنهم بيتكلموا عربي ده التانيين بالكاد بيتكلموا عربي ده ......
قاطعها عبد الشكور قائلاً :
- فادية الموضوع خرج من ايدينا ده شغل كبير و إحنا بننفذ بس، و أرجوكي روحي شوفي شغلك و سبيني لشغلي .
خرجت فادية غاضبة للغاية و لكنها لم تملك أن تفعل شيئاً في حين ظهر الضيق على وجه عبد الشكور فهو يعرف عِند هذه المدرسة و يخشى أن تتسبب في مشكلة و لكن ما باليد حيلة و في نفس اللحظة رن الهاتف و ما أن رفع السماعة حتى تنهد بقوة و قال :
- كله جاهز.
على مسافة مائتي متر كانت هناك سيارة سوداء عليها علامة المنظمة العالمية لحقوق التعليم قبل الجامعي في دول العالم الثالث ( لا توجد منظمة أساساً بهذا الاسم ) و تتبعها سيارة سوداء ضخمة للغاية مليئة برجال حرس يبدو من هيئتهم أنهم أجانب و من الجانبيين كانت هناك عدة سيارات للشرطة المصرية، و كان هذا الموكب يتوجه نحو المدرسة و هذه الزيارة تأتي في إطار حملة عالمية من المنظمة لرفع مستوى التعليم في دول العالم الثالث، و قد جاءت هذه المدرسة ضمن مجموعة من مدراس الجمهورية لكي تأخذ معونات لمساعدتها في تحسين خدمات التعليم لديها .
و بعد أقل من دقيقتين كان مستر مايكل اس بولاند مدير المنظمة للشرق الأقصى يقف و بجواره مدام هالة صاحبة البشرة السمراء و رئيسة الوفد المرافق للمسؤول الأمريكي و رئيسة جمعية توثيق العلاقات التعليمية بين مصر و أمريكا ( أيضا لا يوجد شيء بهذا الاسم )، و بهدوء توجها نحو المدرسة و من حولهما العديد من الشخصيات المهمة و طبعا الحرس،واتجهوا نحو طاقم المدرسين و وضح أن مستر مايكل لا يستمع إلا إلى مدام هالة التي تترجم له ما يقوله الجميع .
كانت الخطة المدرسية تقوم على أن يتجه هذا الوفد نحو الفصل الأخير من الدور الثاني و هو الفصل الذي يجمع كل المتناقضات، طلبة المدرسة الإمريكية و الطلبة الشعبيين، حتى يبدو الأمر و كأن المدرسة تجاهد و لكنها تريد المعونات لأن المنظمة لم تكن لتمنح أي مدرسة معونات طالما أنها سيئة جدا أو قوية جدا لذا كان التخطيط جيداً و لكن حدث ما لا يحمد عقباه ...!!!
بمجرد أن توجه الجميع نحو السلم الصغير الذي يؤدي إلى الفصل المراد أولا، سقطت لوحة كبيرة على مدخل السلم و تسببت في كسر ماسورة المياه فأصبح لزاما على الجميع أن يستخدموا السلم الآخر .
حسنا ما المشكلة في استخدام السلم الآخر؟؟ ببساطة شديدة السلم الأخر يؤدي إلى بداية الدور الثاني و سيضطرون إلى أن يمروا بكل الفصول في رحلة الفصل الهدف .
لو رأى أحدكم وجه عبد الشكور و بقية المخططين لأصيب بنوبة ضحك هستيرية، و لكن ما باليد حيلة و بدأت الرحلة و مر الفصل الأول و الثاني و الثالث و الرابع و لم يتبق سوى فصلين فقط و لكن سقط باب الفصل الخامس ليس بفعل قنبلة و لكن بسبب رغبة الطلبة في أن يروا من بين شقوق الباب هذا الوفد الهام .
توقف الجميع للحظات و هم يتأملون هذا الموقف العجيب و قام بعض المدرسين بإرجاع الطلبة إلى أماكنهم، و ظهرت بسمة على وجه مستر مايكل و قد قرر أن يدخل هذا الفصل، فما المانع ؟؟.
على غير المخطط تماما كان هذا الفصل الذي لا يمكن بأي حال من الأحوال أن يحقق هدف عبد الشكور و يكفي أن من بين طلبته مصطفى الذي وقف مشدودا في مكانه و هو يقول لزميله :
- واد يا أحمد مش ده الأستاذ جورج بوش و الأبلة السودا دي تبقى ليزا .
- بس يا مصطفى .
لمحت رئيسة الوفد المرافق مصطفى و هو يتحدث فقالت له :
- فيه حاجة .
نظر إليها مصطفى و قال :
- حضرتك بتسأليني .
- أيوه قوم و قول عايز تسأل في ايه ؟
قام مصطفى و هو ينظر حوله يمينا و يسارا و قال بتلعثم شديد :
- أسال مين ؟
- مستر مايكل .. تحب تسأله تقوله ايه ..
- أصل الصراحة يا أبلة أنا لسه ماذاكرتش درس الباستر برتسبول و بعدين الكلمات بتاعة الأستاذ منير في درس مجموعة الجامع لسه يعني ما حفظتهاش و كده ..
ابتسمت رئيسة الوفد و قالت :
- طيب أنا ممكن أترجم أي شيء عايز تقوله
و بعد ثوانٍ قليلة من حديث بينها و بين مستر مايكل التفت إلى مصطفى و قالت له :
- اسمك ايه و يا ترى ايه رأيك في المدرسة ؟؟
- أنا مصطفى و المدرسة كويسة أوي و بتعلمنا عربي و كيميا و فيزيا و كمان إحياء و الله .
لمح مصطفى الأستاذ عبد الشكور يقف من بعيد و يشير له بطريقة توحي بأن يغير كلامه فمثل هذا الكلام ربما يجعل مايكل يعتقد أن المدرسة لا تعاني من مشاكل فقال مصطفى بسرعة :
- لأ حضرتك أنا اسمي وائل و المدرسة وحشة أوي و ما فيش تعليم و ما عندناش مدرس فيزيا و بيدرسولنا في الأحياء أن الست بتولد بعد 13 شهر ..
رغم علامات الاندهاش التي ظهرت على وجه رئيسة الوفد لكنها ترجمت ما قاله مصطفى لمستر مايكل ثم التفت إلى مصطفى مرة أخرى و قالت :
- يا ترى يا مصطفى المدرسة بتهتم بالألعاب .
حاول مصطفى أن يرى وجه الأستاذ عبد الشكور ليعرف ماذا يقول و لكن الحرس حجبوا الرؤية عنه فلم يملك سوى أن يرد و أمره لله فقال بعد أن قرر أن يمسك العصا من الوسط:
- آه ... أيوه ... المدرسة بتهتم بالألعاب حضرتك بس يعني الحوش بتاعنا مليان مباني، بس الجدول برضه مليان حصص ألعاب الصراحة.
- أنت بتلعب ايه يا مصطفى .
- أنا بلعب حضرتك طاولة عادة و محبوسة .
- طاولة !!؟؟؟ يعني ايه طاولة .
أخيرا ظهر الأستاذ عبد الشكور و هو يرمق مصطفى بنظرات صامتة صارمة فقال الأخير بسرعة :
- تنس طاولة حضرتك و بعدين بصطاد برضه و كده .
قالت رئيسة الوفد بتعجب :
- بتصطاد في المدرسة ..!!!
- لأ أنا قصدي بصطاد سمك من النيل بحب الصيد الصراحة و العوم برضه و كده .
- هايل .
أثناء ترجمة رئيسة الوفد لمستر مايكل ما دار بينها و بين مصطفى كان الأخير يحاول أن يفهم من وجه عبد الشكور ما الأمر و لكنه لم يستطلع شيئا إلى أن عادت رئيسة الوفد للحديث مع مصطفى و قالت :
- عمرك ما رحت عند راس محمد ؟
قال مصطفى بتعجب :
- و لا مؤاخذة هروح عند راسه ليه .. هحلقله مثلاً ..
مسحت جبهتها بكفها و زفرت بضيق و قالت :
- أنت بتمارس الصيد و ألعاب الماء فين؟
- في الميَّه
كادت أن تصرخ و لكنها تمالكت نفسها بصعوبة و قالت و هي تجز على أسنانها :
- أكيد في المية أقصد النادي أو المنطقة كده يعني ؟
- لأ حضرِتِك أنا بعوم في النيل ..
- أوكي أوكي .. مستر مايكل كان عايز يسألك شوية أسئلة ثقافية ؟
رد و هو يهز رأسه و يغمز بعينه اليسرى :
- أيوه كده ما أحلى الثقافة الأمريكاني ... ده أنا هجاوب و باستفاضة ..
- طيب اسكت لحد ما أعرف عايز يقول ايه ؟
ما هي إلا دقيقة حتى استدارت صوب مصطفى و قالت له :
- هو عايز يعرف منك وجهة نظرك حول التأثيرات التي أحدثتها الشيوعية منذ قيام الثورة البلشفية و حتى نهاية الثمانينات ؟
اتسعت حدقتا مصطفى و قال بتلعثم :
- ثورة مين حضرتك .
- الثورة البلشفية اللي قام بيها البلاشفة ..
- دي غير ثورة الأستاذ عبد الناصر ... لأ اصل يعني بصراحة و من غير كتر كلام يعني أنا الدش عندي بايظ و القنوات مقفولة قفلة طين و الواد كيمو واعدني يجبلي سوفتات و حاجات كده يعني .. فيعني ربنا يكرم و أول ما يجيب الحاجات هتابع و أعرف بقى أخبار الموضوع ده ...
- أنت ما تعرفش ماركس و لا لينين و لا ستالين، معقولة دي .
- و الله لو هما قالوا إنهم يعرفوني يبقى جايز .. بس أنا مش واخد بالي يعني ..
- أنت بتقرا ايه اليومين دول يا مصطفى ؟
- الفصل الرابع في الأحياء بس الصراحة مش فاهمه ..
- أقصد بتقرا لمين من الكتاب الحاليين ؟ توماس فريدمان في السياسة ، هارولد بنيتر في الأدب، مايكل كيميلمان في الفن ..
- م م م مين ؟؟؟ لأ أنا موضوع القراءة ده مش في بالي الصراحة يعني أنا هواياتي عوم و كده يعني بس يعني أحيانا بقرا للأستاذ أنيس منصور الله يرحمه و للأستاذ نجيب محفوظ ربنا يديله طولة العمر،، و كده ..
استدارت رئيسة الوفد صوب مايكل و تحدثا بالإنجليزية للحظات قصيرة و لكنها كانت كافية لأن يميل مصطفى على أحمد و يسأله :
- واد يا أحمد هو لينين ده حاجة جامدة و لا ايه ؟ و بعدين شيخ الجامع عمره ماجاب سيرته ليه ؟
لم يرد أحمد و وضع يده على فمه ليمنع ضحكة كادت أن تنطلق منه و أنقذ الموقف سؤال رئيسة الوفد لمصطفى :
- آخر سؤال بقى يا مصطفى .. مستر مايكل عايز يعرف مدى الترابط بين المسلمين و المسيحين في مصر ؟
- إحنا زي الفل و الله و أنا ليا واحد جاري مسيحي اسمه بطرس و راجل زي العسل و الله .
- هايل يعني أنت شايف إن مافيش مشاكل ..
- و ايه اللي هيجيب مشاكل بيني و بين بطرس و لا مؤاخذة ..
تنهدت بعمق و قالت :
- يا بني أفهمني أقصد مشاكل بين المسلمين و المسيحين ؟ و خصوصا بعد أحداث الإسكندرية ؟ التقارير الواردة بتقول أن الفتنة الطائفية على وشك التفجر في مصر ؟
- لأ سيادتك مين اللي تنفجر دي هيَّ أنبوبة بوتاجاز و لا ايه، لأ اطمَّـني، ما حدش هيفرقع
- أيوه بس منظمات حقوق الأقليات بتقول إن المسيحين في مصر مقهورين .
- ليه سيادتك يعني، بنخليهم يحتفلوا بعيد القيامة في الجامع، و لا بنطلع نرفع آذان المغرب من برج الكنيسة، و بعدين منظمات الأقليات دي مالهم و مالنا ما يروحوا يشوفولهم شغلة بدل ما هم فاضيين للكلام الفارغ ده.
التفت رئيسة الوفد و دار بينها و بين مستر مايكل حوار قصير و بعده التفت إلى مصطفى و قالت له :
- آخر شيء بقى كلمة تحب توجهها إلى المنظمة العالمية لرعاية حقوق التعليم قبل الجامعي في دول العالم الثالث تقول فيها طلباتكم .
نظر مصطفى إلى عبد الشكور محاولا أن يفهم من ملامح وجهه أي شيء فوجد علامات غضب شديدة على وجهه فقال مسرعا :
- إحنا ما لناش طلبات خالص خالص، و أمورنا كويسة و حياتنا ...
قطع كلامه عندما وجد ملامح التعجب و الاستنكار على وجه عبد الشكور فقال مسرعا :
- و حياتنا سيئة جدا و محتاجين أي شيء منهم، اللي يجودوا بيه علينا، لأننا ....
قطع كلامه مرة أخرى عندما لمح ملامح الغضب على وجه عبد الشكور فقال مستدركا :
- لأننا بكرامتنا و لا مؤاخذة، نشحت آه بس بكرامتنا.
- طيب يا مصطفى أنا بشكرك جدا و يارب يبقى لينا لقاء العام القادم .
- شكرا و بلغي شكري للكل بس افتكر مش هيبقى لينا لقاء العام القادم .
اتسعت حدقتا رئيسة الوفد و تقدمت خطوتين نحو مصطفى و قالت بمكرٍ شديد :
- ليه يا مصطفى خايف يحصلك شيء بعد كلامك معانا هل مسيرة الديمقراطية فيها مشاكل ؟ ها رد بسرعة ؟
ابتسم مصطفى بهدوء و قال :
- ببساطة حضرتك السنة الجاية أنا هروح الكلية.
- احم .. طيب سلام بقا يا مصطفى .
بعد اقل من ربع ساعة غادر مستر مايكل و الوفد المرافق معه المدرسة في حين توجه الأستاذ عبد الشكور و معه كتبية المخططين في غضبٍ هادر نحو فصل مصطفى و ما أن دخلوا الفصل حتى ارتفع صوت عبد الشكور و قال بجنون :
- تعالى با ابن ( ........ تخيلوا الشتيمة اللي تحبوها ) أنت ودتنا في داهية و حياة أبوك لأعلقك من قفاك زي الدبيحة و ....
لكن صوتا صارما قويا قاسيا جاء من الخلف و هو يقول :
- أستاذ عبد الشكور ...
توقف عبد الشكور فجأة و التفت إلى مصدر الصوت و الذي لم يكن سوى حنجرة الأستاذة فادية أستاذة اللغة العربية التي قالت :
- حضرتك كنت ناوي تعمل شيء
نظر عبد الشكور إلى مصطفى ثم إلى فادية عدة مرات و لولا ما يعرفه من عند فادية الذي قد يجعلها تلجأ إلى الصحافة و الإعلام لذا فقد لزم الصمت و غادر الفصل و هو يتمم بكلمات غاضبة للغاية في حين اتجهت فادية نحو مصطفى فقال لها الأخير و صوته يملؤه الرعب :
- هو أنا عكيت الدنيا يا ابلة فادية و لا ايه
نظرت إليه فادية و ابتسمت ابتسامة عريضة لم تلبث أن تحولت إلى ضحكة قصيرة قالت بعدها :
- لا يا مصطفى أنت ما عكتش الدنيا بس نقطة واحدة بس عايزة اقولهالك نجيب محفوظ هو اللي الله يرحمه و أنيس منصور هو اللي ربنا يديله طولة العمر .
هرش مصطفى في شعره و قال و هو يبتسم :
- و الله يا أبلة عارف بس أنا حسيت إن الولية دي بتنقل كلامي بالمعكوس فقلت أعكس المعكوس يطلع مظبوط ..
ارتفعت ضحكة فادية و شاركها الضحك بعض الطلبة الذين التفوا حولها بينما كان عبد الشكور و كتبية المخططين في المكتب ينفجرون من الغيظ ....

تمــــــــــــــت

جميله جدا
ودا حال بلدنا فعلا شىء مؤسف للغايه
عشلن كده عمرنا ماهنتقدم

فعلا وعلى فكرة انتى لماحة قوى وذكية
فعلا تلميذة تشرف

مرسي قوي ليك
تلمذتك بقي يااستاذ
دا من بعضماعندكوا

العفو يا ستى العفو

يسلمووووووووووووووووووووووو على القصة
المشكله عند العرب انهو بيجروا ورا الغرب و بياخدوا منهم كل حاجة سواء الصح او الخطا
غير كده فهم لا يثقون بقدرة الشباب العربي الواعي المثقف على احداث التغير الى الاحسن في المجتمع
مشكووووووووووووووووووووووووووووور مجدي

يسلمووووووووووووو سارة
كلامك تمام ويستحق الاحترام
وبعملك تعظيم سلام
شكرا على مرورك الرقيق

تسلم ايدك

تسلم ايدك يا مجدى

تسلم يا كريش
نورت التوبيك