امتي الواحد يعيش حياه بسيطه..ف الفتره دي من حياتي حاسس اني محتاج اووووووي اني اعيش بالشكل ده

حياه بسيطه بمعني الكلمه..حياه من غير عقد وكلاكيع الحياه..عارف ان احيانا بتكون لذه الحياه ف انها معقده..

بس بجد انا جربت العقد دي وطلعت علي عنيا ف الاخر..نفسي ف حياه صريحه وواضحه..مش بدور علي المدينه

الفاضله اللي تخيلها افلاطون..لانها مش موجوده اصلا الا ف الخيال..انا بس نفسي ف ناس تكون بتتعامل بوضوح

مع كل اللي حواليها..بوضوح مع كل حاجه حتي الجماد..مش عارف اوصف بالظبط انا عايز الحياه دي يبقي شكلها

ايه..ويمكن انا مش عارف اوصف بالظبط لاني فعلا عايزها ابسط من انها تتوصف ونقعد نحكي عنها..

مش عارف ليه وانا بكتب دلوقتي عن الحياه البسيطه اللي بتمناها ..افتكرت قول السيده عائشه عن وصف سيدنا

محمد عليه الصلاه والسلام..قالت..كان قرأنا يمشي علي الارض..هل فيه امل ان تكون فيه مدينه هي القرأن..

اظن ان هي دي الصفه اللي هتريحني وتخليني احس بالبساطه والوضوح ف كل حاجه حواليا..بس ياتري هعيش

ف الحياه دي لوحدي..ده لو قدرت اني اصلا اعمل كده..اكيد عايز ناس حواليا يكونوا بيفكروا زيي كده..

معرفش ليه مش متفائل..بس حتي لو كل اللي بتخيله ده محصلش..ومظنش انه هيحصل بصراحه..بس دلوقتي

بس انا عرفت ليه افلاطون تعب نفسه وفكر ف مدينه فاضله بلا خطيئه..اكيد عشان يهرب من واقع صعب كان

بيعيشه ومش عارف ولا قادر يغيره ولا حتي يغير نفسه..بس علي الاقل عاش لحظات جوا المدينه دي ف خياله..

والله انا شكلي اتجننت خلاص

كلمه احب اقولها لصديق عزيز اوووووي..واللي برغم اننا اصدقاء منذ زمن الا
اني احب اعلن

للمره المليون اني بكرهه..واللي بالرغم بردو انه عارف
المعلومه دي ومطنش خالص ولسه

مقيم عندي تحت السرير ..بس انا بحب كل شويه
اقولهاله يمكن يجي ف يوم ويرحمني

ويمشي..نسيت اقول ان صديقي ده هو
((الاكتئاب))..مش عارف هو حابب انه يقعد معايا

ليه كل الفتره دي برغم اني
بكرهه وهو اول العارفين..يمكن المكان عندي مريح

شويه..يمكن تكون حياتي
تربه خصبه يقدر يعيش فيها بحريه ويمارس كل هواياته..ولا يمكن

هو بيحبني
انا ومش عايز يسبني لوحدي كده..لو كان الاختيار الاخير يبقي فعلا كتر الف


خيره..علي الاقل لقيت حاجه واحده ف الدنيا دي متمسكه بيا للنهايه..
بس برغم كل ده عايز اقوله..يا صديقي العزيز..بكرهك قووووووووووي..