حملة حماية للمطالبة بحجب المواقع الاباحية في مصر

السلام عليكم ورحمة الله
تحية طيبة وبعد

من فترة مش بعيده كنت باتصفح موقع اليكسا وهو من اكبر المواقع لترتيب واحصاء المواقع في العالم
ولفت نظري اني ممكن اعرف ترتيب المواقع في اي دولة تبعا لاستخدامها في الدولة دي ودخلت اشوف ايه هي اشهرالمواقع واكبرها استخداما في مصر

للاسف الشديد كان من ضمن العشر مواقع الاولي حوالي 3 او 4 مواقع اباحية .. معقول !!.. معقول هو دا استخدام مصر للانترنت ؟! بجد حاجة مخجله ومؤسفة
وكنت ناوي ابدا الحملة دي من يومها لكن حصل ظروف ومابداتش لكن انهاردة الحمد لله نويت ابدا معاكم ونحط ادينا فايد بعض ونجمع اكبر عدد من الاصوات ونقول كلنا بصوت واحد للمسؤلين في مصر
" رجــــــــــــــــــــــاء ... احجبوا هذا الفساد عن بلدنا "

دلوقتي بيقعد علي النت اطفالنا وبناتنا -سواء اختك او زوجتك او غيرها- ازاي والانترنت بقا منتشر بصورة واسعه جدا ومتاح في كل مكان وبتكلفة شبه رمزية
معقول نسيب الفساد ده منتشر ومتاح في بلد اسلامي ويتبع الشريعه الاسلامية ؟

دعوه لكل فرد خايف علي شباب وبنات واطفال بلده وعاوز يعمل حاجة تكتب في ميزان حسناته عند ربنا .. حاولوا تتخيلوا الأجر العظيم اللي هتاخدوه لاشتراككم في عمل زي دا

ماتقولش انا مالي .. الانترنت فيه الحلو وفيه الوحش وكل واحد يختار هو عاوز منه ايه
طفل صغير او بنت قاعده علي الانترنت ووقع قصادها حاجة زي كده عن طريق الصدفة او رسالة من صديق سوء او حتي حب يدخل كنوع من الفضول
وحتي لو هو شخص مش كويس وعاوز يعمل ده ليه تساعده وتوفرله ده وانت فايدك تمنعه ؟

الغريب ان المواقع دي محظوره ومحجوبة في دول عربية كتيرة منها السعوديه والامارات علي حد علمي
طب احنا لأ ليه ؟

ايه فايدة اننا نسيب المواقع دي متاحة اكيد طبعا مفيش عاقل هيقول ان ليها فوايد
ولو حبينا نتكلم عن الاضرار والمفاسد اللي بتسببها مش هنقدر نحصيها
اعتقد مصر من الدول الرائدة في الوطن العربي ومن الواجب علي مسؤليها ياخدوا الخطوة دي حفاظا علي صورة وسمعة البلد

اهداف الحملة

1- عاوزين نوصل رأي مستخدمي الانترنت في مصر للمسؤلين بشكل محترم ومهذب ومتحضر
2- حجب المواقع الاباحية داخل مصر بعد موافقة الجهات المختصة -باذن الله-.

المطلوب منك "او ازاي هاتساهم في الحمله"

1- نشر هذا الموضوع لاصدقائك ومعارفك وفي الجروبات والمدونات والمنتديات ومش مطلوب انك تقول مين اللي بدأ الحملة عشان خاطر المنتديات ماتعتبرهاش دعاية لمنتدانا

2- مخاطبة وسائل الاعلام لنشر الحملة وزيادة الفرصة في وصول صوتنا للمسؤلين في مصر
3- مخاطبة الجهات المختصة "ودي اهم خطوة"
طيب ايه هي الجهات المختصة مين هم المسؤلين اللي هنكلمهم ؟

1 - وزارة الاتصالات وتكنولوجيا المعلومات
تقدر تكتب شكوي من هنا

http://www.mcit.gov.eg/ar/Contactus.aspx?x=1

2-شركة تي إي داتا ، لخدمات الإتصالات و الإنترنت في مصر
تقدر تكتب شكوتك وتبعتها من هنا

http://www.tedata.net/new/tedata_egypt/Ar/ContactUs.aspx?type=cu&secId=65

3 - الجهاز القومي لتنظيم الاتصالات
"ودا عبارة عن جهة رقابية على جميع شركات الاتصالات بمصر ويستقبل جميع الشكاوى الخاصة بالاتصالات"
تقدر تكتب شكوتك من هنا
http://www.tra.gov.eg/arabic/Complain_Add.asp?Menu=4

او عن طريق أرقام تليفون

155
او
08003330333

4- رئاسة مجلس الوزراء
يوفر موقع رئاسة مجلس الوزراء قسم خاص لخدمة المواطنين والسادة أعضاء مجلسى الشعب والشورى يمكنهم من إرسـال شكواهم ومقترحاتهم إلى السيد رئيس مجلس الوزراء.

بعد إرسال الشكوى أو المقترح تحصل على رسالة تحتوى على رقم مميز خاص بطلبك.

بإستخدام الرقم الخاص بطلبك يمكنك فى أى وقت الآستعلام ومتابعة ماتم بخصوص شكوتك من خلال الموقع.
(الكلام دا من داخل الموقع مش من تاليفي)

اكتب شكوتك وابعتها من هنا
http://www.complaints.cabinet.gov.eg/newCase.aspx?id=1


ودي ياجماعه صيغة ممكن تكتبوها في اي طلب تقدموه لاي جهة


السلام عليكم ورحمة الله .. بعد التحيه ..
السيد / ....................................
لا يخفي علي سيادتكم كم الاضرار التي يسببها انتشار المواقع الاباحية علي الانترنت وكما تعلمون انها متاحة في مصر .. رغم انها محجوبة في معظم البلدان العربية
واننا نري انه من الواجب علي مصر باعتبارها من الدول الرائدة في الوطن العربي ان تبادر بمنع مثل هذا الفساد الاخلاقي والحفاظ علي شعبها من هذا الوباء الذي تفشي بصورة مزعجة .
ونحن كمستخدمي الانترنت في مصر نطالب بتنقيه الانترنت في مصر من هذه المواقع الخبيثة
ونطالب بحجبها عن اطفالنا وبناتنا
حملة حماية للمطالبة بحجب المواقع الإباحية في مصر
https://www.facebook.com/group.php?gid=58375618744
ونسال الله ان يوفقكم لما فيه الخير والصلاح للامة وللبلاد
ولسيادتكم جزيل الشكر
والسلام عليكم ورحمة الله وبركاته



واخيرا- الاشتراك بجروب الحملة علي الفيس بوك لجمع اكبر عدد من الاصوات

من هنا

https://www.facebook.com/group.php?gid=58375618744




طبعا مفيش اي قلق من ناحية الموضوع دا
الموضوع مالهوش اي علاقة بالسياسة
ومافيهوش اي ضرر لاي حد
وماعتقدش ان حد هيقف ويقول "لأ للحجب" وحتي لو هو من جواه مش عاوز الحجب يتم
مش هيقدر يقول لأ .. وإلا هيتبصله بنظرة احتقار من الجميع.
انا متفائل .. وان شاء الله بمساعدتكم الحملة دي هتنجح

اي استفسار او استعلام
تقدروا تبعتوه علي الايميل الرسمي للحملة
7emaya@treika.com

والله الموفق

اخوكم / أحمد أبومدين

ده الاعلان علي موقع الشركة
وصفحة الخدمة تقدر تشوفها بتفسك من هنا



http://www.familyinternet.net/Ar/Default.aspx?SecId=2

اي نعم هي دي تعتبر مش النتيجة اللي كنا عاوزين نوصللها احنا او اي حد طالب بحجب المواقع دي
بس ده ذكاء منهم بحيث يبقي كده العالم اللي بتطالب بالحجب مالهاش حجة
بس برضو كده في جزء كبير من الهدف اتحقق
وهو حماية البنات والاطفال من المواقف السخيفة اللي ممكن تحصل بغير عمد او نية مسبقة
اما بالنسبة للجزء الاهم وهو الناس اللي ادمنت المواقع دي اساسا واللي بتسعلي اليها
فربنا يتولاهم بقي
دولتهم مش عاوزة تساعدهم
ربنا يهديهم ويهدينا ويهدي ولاة امورنا يا رب

هما فعلا اذكياء
بس اهى خطوه ايجابيه
وربنا يهدى الجميع
جزاك الله كل خير يااحمد