~*¤ô§ô¤*~*¤ô§ô¤*~الحلقة التانية~*¤ô§ô¤*~*¤ô§ô¤*~


نزل جعفر الجامعة اول يوم وعايز يحضر بقى ويتعرف على اصحاب جداد والحياة فى عينه بمبى وكل حاجة زى الفل

وفى الجامعة

جعفر: ايه ده ايه البنى أدمين ده كلها
طب انا ها اتعرف ازاى كده
اخش على اى حد اكلمه يعنى ولا أعمل ايه

يادى النيلة
انا ها ابقى لوحدى حتى فى الجامعة كمان ولا ايه
انا شكلى ها افضل طول حياتى لخمة ولا بعرف اعمل حاجة
وبتكسف من خيالى
جت لى فكرة زى الفل
انا اخش المدرج بتاعنا قبل ما المحاضرة تبدأ
وأحجز مكان جنبى
لو ولد قاللى فيه مكان اقولله لأ محجوز
لو بنت جت اقوللها اتفضلى


يا جامد انت ياللى بتفكر يا جعفر
ايوه كده

بينا على المحاضرة

وفى المدرج
" دخل جعفر وقعد فى بينش وحجز كام مكان جنبه وهايبدأ الخطة بقى بتاعته"
جاله ولد عايز يقعد
رامى: لو سمحت فيه مكان
جعفر: اه اتفضل فيه مكان
جعفر لنفسه " يادى النيلة ايه اللى انا هببته ده
طول عمرى مش بعرف اتصرف فى اى موقف خالص كده
من اول واحد يقوللك فيه مكان تقعده
استلم بقى يا باشا
مفيش بنات هاتتعرف عليها النهارده
قضيها ناشف
فضل جعفر قاعد فى المدرج والدكتور ماجاش فترة وفضلو مستنيينه
وهو أصلا مكسوف من اللى جنبه ومش عايز يكلمه

رامى: هو الدكتور مش جاى ولا ايه ياباشا
جعفر: نعم . مش عارف والله
رامى : بتقول ايه مش سامعك
جعفر: بقوللك مش عارف والله جاى ولا لأ
رامى : اه اصل صوتك واطى شوية مش سامعك سورى
جعفر: اه معلش المرة الجاية ابقى اجيب مكروفون اتكلم فيه
" ناقصة قرف هى يا ربى يعنى قعدته جنبى ومفيش بنت جت قعدت
وكمان جاى يستظرف عليا
هو يوم باين من اوله أصلا"
رامى : ايه يا باشا انت قاعد ساكت ليه كده
جعفر : لا عادى والله مفيش حاجة أصلى عايز انام
" هو جعفر كل ماحد يقولله ساكت ليه بما أنه على طول بيبقى ساكت وبيتكسف يتكلم مع حد يقولله اصلى عايز أنام"
رامى :اها الواحد صحى بدرى النهارده أصلا واول يوم
والبنات مش عارف مالها النهارده شكلهم زى العسل
مش هانتعرف بقى ولا ايه

جعفر: اكيد هانتعرف قوم انت اتعرف وسيب المكان أنا ها احجزهولك
" قوم بقى قرفتني . يا ساتر"
رامى : لا عيب عليك يا باشا وأنا اسيبك عشان اتعرف على بنات برضه
انت أسمك ايه يا ابو الزمل
جعفر: أنا جعفر . وانت اسمك ايه
رامى : انا اسمى رامى
جعفر : اهلا بيك
رامى : انا من بولاق يا سيدى وانت بقى منين
جعفر: أنا من مصر الجديدة
رامى: مالك مش بتتكلم ليه كده يا باشا
انت قرفان منى ولا حاجة
جعفر: لا والله ابدا
بس أصلى مش بعرف أخد على حد بسرعة
كويس اصلا انى اتكلمت معاك كده
رامى: ياراجل هو فيه حد أصلا دلوقتى بيتكسف
جعفر: اه انا تصدق بقى
رامى: على العموم فرصة سعيدة يا باشا
يلا بينا نقوم بقى عشان شكل أصلا الدكتور مش جاى
جعفر : أه فعلا هو الواحد جاى النهارده يخنق على نفسه وخلاص
أنا ها اروح بقى عشان اتخنقت
ومش بحب الزحمة أصلا
رامى : خلاص أوك يا مان
أشوفك بكره بقى ان شاء الله فى المحاضرة
جعفر : أن شاء الله
" يا رب ما أشوف خلقتك تانى "
يعنى انا سبت الولاد فى المدرسة عشان يجولى هنا فى الجامعة
مش هانغير الصنف بقى ولا ايه

ومشى جعفر وهو مخنوق ومش طايق نفسه
جعفر لنفسه
" هى الجامعة باينة من اولها يا ابنى
انت أصلا بتتكسف تتكلم مع ولاد
هاتعرف تتكلم مع بنات أزاى أصلا
انت لو واحدة كانت قعدت جنبك ولا هاتقوللها كلمة أصلا
يلا بقى انا مش ناقص انا قرفان من نفسى ومن كل حاجة
انا ها اروح انااااااااام
ومش ها افكر فى أى حاجة
وبكره نبقى نشوف ها اعمل ايه فى الحكاية الزفت ده

رجع جعفر البيت وهو مخنوق ومش طايق نفسه
دخل اوضته كالعادة وقفل على نفسه الباب
وقعد يفكر
" انا زهقت بقى عايز اتلحلح شوية واعرف اتكلم
ها اعيش أزاى كده مع الناس
ولا عارف اتكلم مع حد ولا ولاد ولا بنات
الواد عمال يرغى معايا
وانا عامل زى البت برد عليه الكلمة بكلمتها ومكسوف وانا بكلمه
اذا كنت كده مع الولاد
بتحسب بقى لما تتكلم مع بنت هاتبقى لبلب
لا يا عبيط
انت هاتسكت وتتكسف وهى هاتسكت وتتكسف
وماحدش هايفتح بقه أصلا





قعد جعفر طول يومه قرفان وقضا كام يوم كده فى الجامعة
كل يوم يروح الجامعة يوقول ها اتعرف على بنت واتكلم معاها
وكل يوم يرجع ولا اتعرف على بنت ولا كلم بنت
ولا حتى اتعرف على ولاد
وكل يوم زى مابييجى زى مابيروح
مع نفسه يروح يحضر
ويرجع فى ساعتها
وشايف كل الناس معاه فى المدرج
اللى اتعرف على بنات
واللى شباب اتعرفو على بعض عشان عافين ان هما مش هايتكلمو مع بنات
وهو تايه مش عارف يعمل ايه
هايتعرف اصلا على بنات ولا مالوش فى الحكاية ده وهايبقى شلته ولاد وخلاص

عامل زى التايه
مش عارف هو عايز ايه
ولا هو يقدر يعمل ايه
فضل جعفر فترة كده فى الجامعة
لحد ماجه يوم فى الجامعة
وزى كل يوم
بييجى بدرى ويحجز على أمل ان تيجى بنت تقولله فيه مكان وتقعد جنبه
وفى اليوم ده

جت بنت وقالت له فيه مكان لو سمحت
قاللها بصوت مش طالع أصلا
اه طبعا
وقعدت جنبه
عمل ايه جعفر بقى مع البنت
؟؟؟؟؟؟؟؟؟؟؟؟؟؟؟؟
كلمها ولا عمل ايه وقضا اليوم ازاى



هانشوف الحلقة الجاية ان شاء الله
انتظرووووووووووووووووووووووووووونا