كارت حرية

بُص يَا عَم ..
قبل الماتش ما يبتدي ..
من حقك تختار ..
ملك ولا كتابة ..
ولو ف نص الليل ..
حد جرك من قفاك ..
قول له بقلب جامد ..
فين إذن النيابة ....
وطالما كده كده مسروق ..
يبقى ع الأقل تعرف ..
مين هما أفراد العصابة ..
إنت بس ..
إشحن حرية ..
كارت من أبو عشرة ..
أو عشرين ..
أو خمسين أو مية ..
تلاقي قلبك بقى زي الحديد ..
وقادر تفوت من أي بوابة ..
وتغني للصبح ..
وتقول ع الربابة ..
بس خلي بالك ..
لو رصيدك خلص ..
أو أنتهت الصلاحية ..
هاتتغير العيشة ..
وهاتعرف إن الدنيا كدابة ..
بنت كدابة ..
وهاتفتكر كل اللي راح ..
وتقول الله يرحمك يا أمه ..
ويرحمك بقى يابا ..
لا هتلاقي عيش وملح ..
ولا أصحاب ..
ولا أهل ..
ولا قانون ..
ولا نقابة ..
ساعتها بس هتعرف تفرق ..
بين العصافير والديابة ..
وإن الكلام الحلو ..
والغنا الجميل ..
كان مجرد سحابة ..
وإنك لسة الواد ..
ابن الناس الغلابة ..
وإن لسة فيه خوف ..
ورصاص ..
وعسكر ..
ودبابة ..
على فكرة مش دايماً
الأسد الجدع النبيل ..
بيبقى هو ملك الغابة ..
يا حاج .....
هو أنا ممكن ..
يبقى عندي خط حرية ..
على مهلك ..
وفكر كويس في السؤال ..
قبل ما تقول الإجابة ...


علي سلامة

والله جامده اوي
مشكور يا مجدي

انتم تأمرو وانا
انفذ
شكرا لمروركم الرقيق
يا احمد انت وندى