(عمي أيوب انتحر)

كان رجلا بسيطا من المصريين البسطاء لم يكن يحلم ان يتملك سيارة او يسكن بعمارة او يرتاد شاليهات السواحل انما كان يحلم برغيف الخبز وشربة الماء تسد رمقه لكن هنالك انات اطفاله ولوعات جيرانه وآهات الرضع تقرع بابه. مات ابنه جوعا ويموت هو كذلك وصاحب الكرسي كما هوماله وايوب المسكين وصرخات الجائعين وآهات المعذبين .


النار بتاكل في الحطب

والوجبه طابتْ

كل اللي جاعوا

بيسالوا الطباخ لامته ننتظر

دا بطونا دابتْ

يرفع بايده المعلقه

يغرف عرقنا

ويهز ايد الهون

ويطحن حلمنا

ويقول خلاص : هانتْ

يصرخ ضنايا

أسكته بحتة جزر

وامسح بأيدي دمعته

يا عم يا طباخ

قلبي انفطر

يا عم يا طباخ حرام

خلص الجزر

ابني الوحيد في البرد نام

من غير غير غطا

من غير عشا

دهره انكسر



انت فاكر عمي أيوب

اللي بات من غير عشا

قالوا انتحر

يا ما كان بيوعظنا

كتير تحت الشجر

ماسك في أيده سبحته

يا سلام على لون شملته

يا ما كان بيغسلها بمطر

انا لسه فاكر لما قال للناس

كفايه عمركم ده مش هدر

لامته يا عباس تنام

وتقوم تقول حكمه وقدر

تتغطى مرة بشملتك

وتنام مريض باقي الشهر

يا عم يا طباخ

النار بتاكل بعضها

خلص الحطبْ

لو كنت خايف ع الضنا

ارميها بالكرسي الخشبْ

لو كنت خايف تنكسر

قوللي السببْ

من غير سبب

بصيت لقيت الناس

بترسم بالرماد خيمة عربْ

تفطر بلقمة من الشقى

تتغدى

تتعشىبتعبْ

علشان يعيشوا بارضنا

لازم يبيعوا

الهدمه والشمله ف مزادْ

مين يشتري ......

هدمه ومصبوغة بسوادْ

مين يشتري شمله

ومقوله بحدادْ

مين يشتري خيمة عرب

خضره ومرسومه برمادْ

فاضل مع المسكين

طاقيه بتستره

وكمان رغيف

تمن العقالْ

وحلف عليه جسمه النحيف

لازم يجاوب عن سؤالْ

مين للعيال؟

يصرخ يقول انا مش ضعيف

يا ناس يا أهلي في المزاد

ردوا عليا هدمتي

هاتوا العقال

مش عار علينا ينتحر أيوب

ويتعذب بلال

......

فاكرين ضنايا

لما غسلته ...

وكفنته ....وداريته بحجر

شفته ف منام

ويقولي فين يا والدي

راح برج الحمامْ

فين عمي صابر

وابن عمي الواد حسامْ

دا ولاد بلدنا ف غربتي

من تربتي

سرقوا الحجر

وعليا وعليك السلام

...

يا ولاد بلدنا

عمي ايوب اللي مات

قبره اتنبش

يا ولاد حارتنا

قالوا هنبني في المكان

فرن وطاحونه

علشان نوفر للفقير

لقمة هَنا ....

عيشة هَنا....

عمره اللي ضاع ..

مافضلش فيه غير كام سنه

يا بيه حرام تزرع مكان الورد حنضل

ما تقولش إن الحي أبدى

ما زمان قتلتوا عمي أيوب

وكلتوه النهاردا

الدود ف تربة عمي أيوب انتحر

وصرخ(ما فيش فايده)



ابو خلاد هشام فتحي

المنيا -مطاي- الكوادي

ماحبيتش اقدم القصيدة ولا صاحبها
لان اخونا هشام اصبح غني عن التعريف وما شاء الله عليه مداوم الاتصال بموقعنا وبيرسلنا كل اعماله اولا باول وكان اخرها قصيدة بعنوان وبدأت اســأل
تحياتي ليك يا اخي هشام وبارك الله فيك يا غالي
وسلمت يداك علي هذه الروائع

تسلم ايدك يا هشام
وتسلملى انت يا اسمرانى يا سكر
يا تريكة
يا ابو مدين