الموضوع كبر يا جدعان.

كل يومين يطلع إعلان مستفز ونقول ماشى..

مش مشكلة..

هوجة الإعلانات اللى بتتحدى الملل جابت لنا شلل رعاش وصبرنا وقلنا ماشى..

أهو كله بثوابه عند ربنا باعتبار اننا بنصبر على المكروه..

هوجة إعلانات دانيت بتاع الشكولاته اللى خلت الطفل يسرق ويكذب

ويتشقلب على الحيطة عشان يحلق لابوه وياخد علبة دانيت..

وقلنا ماشى..

الحكومة عايزة تعلمنا القواعد الجديدة لكى تعيش فى هذه البلد وهى

"ماتقولش إيه ادتنا مصر ..

قول هننهب إيه من مصر"..

وللا إعلان شيبسى فوكس

اللى من يوم ماشفته بقيت باروح أشترى شيبسى

أجيب كل نوع ماعدا فوكس ده أسيبه ..

أظن اللى عامل الإعلان ده شركة منافسة لفوكس يعنى..

وللا إعلان سيراميكا رويال

اللى جايبين سعادة الباشا مهند

عشان يضحك للكاميرا ويرطن بالأجنبى

ويقول مملكة من الجمال.. طب حد فاهم هوه بيقول إيه؟؟

مش ممكن يكون بيقول سيراميكا رويال..

ليه انتوا مابتستحموش؟؟..


كان الأحسن يعلموه يقول الجملة بالعربى

عشان نفهم زى البت الصينية لما بتيجى تبيع حاجات للشقق وتقول

أندى هاجات هلوة"!!

وللا إعلانات السياحة الجديدة

اللى محسسينا اننا عالة على السياح أساسا

والمزة الأجنبية تقول لك: إننى لا استطيع أن أعيش بحرية فى هذه البلد..

ما تمشي وتريحى نفسك من الناس الزبالة اللى زينا..


هوه احنا بنستفيد منكم حاجة..

وبعدين معروف أصلا ان مصر سياحة درجة تالتة..

يعنى السياح النضاف بيروحوا أسبانيا وفرنسا ولبنان كمان..

إنما السياح بتوعنا دول يبقوا عم مايكل بتاع المكواة اللى في نيويورك..


ناس مننا وعلينا يعنى..


يبقى بلاش فزلكة بقى !!

المهم كل الحاجات دى لذيذة وبنعديها

إنما الإعلان الأخير ده ياجماعة اللى مش هيعدى بالساهل أبدا


عيل صغير "بس نضيف قوى بصراحة"


ييجى ويقول لك: أنا باحب الصيف عشان بانزل البيسين..

وواحدة تانية: أنا باحب الصيف عشان باتفسح فى ملعب الجولف

والتالتة: أنا باحب الصيف عشان باروح اشترى من أكبر مول..

وكل واحد جايب أسباب حضرته فى إنه "اسم النبى حارسه وصاينه"

بيحب الصيف

ده كله عشان مكان جديد للمعيشة طبعا مش لينا احنا ..

ليهم يعنى..


هوه انت عمركـ شفت بيسين عشان تنزل فيه ياعم؟؟


طبعا احنا مش بنقر على العالم دى اللى بتنزل البيسين

هوه يعنى إيه بيسين أصلا؟؟..


أكيد حاجة بتتنزل يعنى


ولا على الأمورة اللى بتتفسح ولا على الست هانم اللى بتروح تشترى


أنا بس غرضى اقول ان الإعلانات دى مش لينا فبلاش منها..

يعنى

قاعدين نتكلم عن الفتنة الطائفية..

وفيه فتنة أكبر منها على شفا حفرة ..

وهيه الفتنة البيسينية..


يعنى اشمعنى الواد ده ينزل البيسين وانا لأ؟؟

مما سيؤدى إلى إن أنا هاروح افجّر البيسين ده

اللى انا مش عارف هوه ايه..

وتكبر المسألة..


وتنقسم البلد فريقين ..

فريق اللى عنده بيسين

وفريق اللى مش بيستحمى أساسا..


وتكبر الفتنة ..

ويظهر فى الخارج فريق "بيسينات المهجر"

وفريق "اتحاد البيسينات"

والموضوع يكبر !!

ويكبر




ولهذا ومنعا لكل ما سيحدث

فأنا عملت إعلان موازى لهذا الإعلان ..

وزى ما إعلانهم خاص بالأغنيا بس..

أنا إعلانى خاص بالفقرا بس _ههههههههههههههههههههه

يعنى أنا وانت حضرتكـ_

وهيكون على هذا المنوال


يبدأ الإعلان بصورة من أعلى

على شارع فيصل والعربيات واقفة

والطريق مقفول والناس مش طايقة بعض..

والجو رهيب والناس بتقع من الحر

ثم تبدأ لقطات الإعلان

عيل هدومه مقطعة

وقاعد يشحت على باب جامع

وبيقول للكاميرا وهو بيبتسم

أنا باكره الصيف عشان السبوبة بتقل



بنت ناكشة شعرها

وواقفة قدام الحمام وقرفانة وبتقول:

أنا باكره الصيف عشان المية بتبقى مقطوعة

موظف فى المترو

فى إيده الجرنال ونص كيلو موز

وبيضحك وبيقول: أنا باكره الصيف عشان الدنيا زحمة


وفى الآخر ييجى صوت المذيع :

انت كمان انضم لينا عشان تكره الصيف..


انضم لأكتر من سبعين مليون مصرى بيكرهوا الصيف..

وبأقل الأسعار


وكل إعلان وانتو طيبين