اهداء الى مبارك والشعب المصري

السلام عليكم ورحمة الله وبركاته
بمناسبة الايام الجميله التى تمر بها مصر وشعبها
من تقدم وانجازات واستقرار الحكم

فوق الكراسى فى بلادى
ناس قاعدين من سنين
تحت نفس الكراسى ناس
زى علب السردين
لا اللى فوق بيتحرك
ولا اللى تحت راضين
نفسى اسئلهم سؤال
محيرنى من سنين
ليه واحد بالحكم ماسك
والباقى بالحكم مِسلْمِين
الغريب لما اللى فوق يصلوا
يرد اللى تحت ءامين
ولما تسئل اللى تحت
بتقولوا ءامين وموش راضين
يردو عليك فى نَفَس واحد
وبئدنا ايه عاملين
ويقولولك خليك زينا ساكت
احنا يابنى ناس مساكين
فى السياسه احنا مبنفهمش
خليها للساده المتريسين
وامشى جوا الحيط
وشوف رزق العيلين
الحيط فى يوم هيفرئع
هيستحمل مين ولآ مين
يقولولك دُول زى اللئمه
الناشفه فى الحلق واقفين
طب يا جماعه تبقى
المله اُمال على مين
يقولولك انت اللى هتصلح
الكون يابو العارفين
واللى قابلك يا سيدى
كانو عَدَلو حاله من سنين
الحريه يا ناس موش منحه
تتصرف على كراسة التموين
هى اغلى من كده
علشانها تكونو مضحيين
يقولولك خليها على الله
قادر يزيح القاعدين
زمن المعجزات ولْىَ وراح
احنا فى القرن الواحد والعشرين
عاوزين بس افلام ومسلسلات
والصراحه اللى فوق موش متأخرين
الناس دى من زمان ماتت
لكن فى صورة بشر عايشين
ولو اذنت فى مالطا والله
ما يتحركو البنى ءادمين
وتيجى تكلم اللى فوق
يقولولك بقرف انت مين
كأن الواحد من كوكب المريخ
هبط على القاعدين
واذا طولت الكلام معاهم
تلقى نفسك مع المساجين
امراض وعشوئيات واميه
سوس فى جسم الملايين
وديون وفساد ذمم
خلصت على اقتصادنا المسكين
وفوت علينا بكره
وفتح مخك علشان الروتين
وقولنا بينا ودينا
بنينا الكوبرى الالفين
اخبار اهرام حمهوريه
لافتتاح الكبارى مهللين
وبروح بالدم نفدى
قائدنا زعيم الملايين
وغلابه مطحونين للعلاوه
فى عيد العمال مستنيين
واستفتائات ومن بعدها
انتخابات بالتسعه وتسعين
واحزاب بره وجوا المهرجان
زى حيال المأته واقفين
وكمان الاخوه المحظورين
علشان شعارهم متحصرين
على نوياهم اللى فى علم الغيب
سَبَقو وحكمو القاعدين
وشيخ الازهر كملها
بفتاوى لا فى الشرع و الدين
عن صحة الحاكم يا سيادنا
ما حد يسئل سؤالين
وبدل الطوارئ قانون ارهاب
والله اعلم بكره ايه قوانين
دا حباً فى البلد
ولآ على الكراسى خايفين
وعواجيز تحت الكبارى نايمين
فرشين قوماشه وكرتونتين
حتى المدافن سكنوها اللى
فى صورة بشر عايشين
جمعيات ونوادى خيريه
منشوف منها غير البدل والفساتين
وسلملى على اطفال الشوارع
عددهم الله اكبر يملى العين
والمرأه كمان قالو حرروها
هما كانو محبوسين
طب حررو اسرانا اللى
من يوم النكسه منسيين
وعساكر دوريه على الحدود
كل يوم والتانى مقتولين
تسأل هما ليه ماتوا
يقولولك هما المعتدين
طب ممكن نفهم ازاى
والخزنه ما فيها رصصتين
اما شباب الخرحين
فشغلتهم الطاوله والزهرين
واذا حبوا يغيرو
مراكب الموت فى البحر جاهزين
على بلاد اليورو و الاسترلينى
من بحر ليبيا طالعين
فى شباب فى البحر ماتت
وفى شباب غيرن الدين
ويسألو الارهاب امته
وازاى جه منين
قالو الحل طاقه نوويه
ازاى والرغيف موش لائيين
يعنى بالفتاكه والفهلوه
ولآينئلب الحال فى غمضة عين
ولآ نفتح المندل
ونئرا يا جماعه الكفين
واحد من اللى فوق
قالى اسمع هما كلمتين
الناس دُول كتير
طب نجبلهم منيين
لآبئيت فاهم اللى تحت
ولآ مصدق القاعدين
عملت زى جحا مع ابنه
وحماره فى حواديت الصغيرين
مره لما ركب لوحده
قالو ساب ابنه مع المشيين
ومره لما ركبو الأتنيين
قالو عليهم ناس ظالمين
ولما نزلو وسابو الحمار
قالو عليهم ناس مجانيين
كأنى بتفرج على سيرك
كل يوم والتانى عروضه مكررين
لآ اللى تحت بيزهقو
ولآ اصحاب السيرك مغيرين
الناس دى غلط
ولآ انا اللى مزودها حبتين
ولآ مولد وصاحبه عايش
بيضحك على الاخوه المدروشين
عقلى يئولى ريح راسك
انت مصدعه ويا مين
انا صاحى ولآ نايم
حد والله يخبطنى المين
كل يوم انا بدعى ربنا
يخدنى ويريحنى من اللتنين
بس البلد دى عقلنا
ومين يستغنى عن عقله للاتنين